Pe Ilwor Cako Kwano Baibul ki Dano!
1. I yo ango ma pe walworo “tiyo gin maber” bot dano?
1 Ka watito lok me kwena maber me Ker pa Lubanga ki mit kom, ci nongo pe watye ka kwero “tiyo gin maber” bot jo ma i wang ticwa. (Car. 3:27) Pe tye kwena mo maber ma waromo nywakone ki dano makato kwena me kwo maber ma tye ka bino i te loc pa Lubanga. Romo bedo ni itito kwena me Ker-ri kadi bed ni pe i yubbe iye nyo imiyo bukke, ento pingo pe iket obed yubbi me kwano Baibul ki dano, ka onongo pe itye ka timone?
2. Ngo ma romo gengowa me kwano Baibul ki dano?
2 I kare mukene, ariya madit ma romo gengowa kwano Baibul ki dano obedo tam ma watye kwede i kom lok man. Jo mukene gikwero kwano Baibul ki dano pien nongo gitamo ni gin pe gitwero nyo ni gitye ki tic mapol. Tam ma kimiyo piny kany-nyi romo bedo me kony botwa wek pe wakwer kwano Baibul ki dano.—Mat. 28:19; Tic 20:20.
3. Pingo wan wapore me pwonyo dano ki Baibul?
3 Bedo ki Akalakala: Romo bedo ni pe inongo pwonye matut nyo pi tyen lok mo omiyo itye ki akalakala ka gwok nyo itwero kwano Baibul ki dano. Lukricitayo me cencwari me acel ma gutiyo tic matek me pwony-nyi onongo gubedo “jo mogo ata ma pe gupwonnye.” Ngo ma okonyogi me pwonyo jo mukene ki lok me ada? “Gin yam gubedo kacel ki Yecu.” (Tic 4:13) Gin gunongo pwonyegi ki bot Lapwony Madit, Yecu, ma pwonye kacel ki yo me pwonye tye kigwoko piwa i Ginacoya. Kadi bed pe inongo pwonye matut, dong itye ka nongo pwonye me cwiny maber loyo kit pwonye mo keken-ni.—Ica. 50:4; 2 Kor. 3:5.
4. Ngo ma waromo pwonyone ki i kom lanen pa Amoc?
4 I kare ca Jehovah obedo ka tic ki lunebine me tito bal pa luker i wigi nyo jo ma gitye i rwom mamalo. Dano calo Amoc onongo oa ki i paco mo me rwom ma piny adada. Amoc owacci: “An pe lanebi, an bene pe latin pa lanebi; ento yam an lakwat, ki layub nyig olam me acama.” (Amoc 7:14) Ento kadi bed kit meno, Amoc pe olworo tito kwena me ngolokop pa Jehovah bot lalam dog Amajia ma onongo woro cal latin dyang. (Amoc 7:16, 17) Kare ducu wiwa myero opo ni watye ka tiyo tic pa Lubanga dok en aye miyo wabedo ma wapore me timo tic ma tye.—2 Tem. 3:17.
5. Pingo myero watute me cako kwano Baibul ki dano kadi bed watye ki tic mapol?
5 Tic Mapol: Kadi bed ni ticci tye mapol, olo nongo iketo cawa mo pi nywako i tic me pwony kare ducu. Kwano Baibul ki dano obedo but ticwa me pwony ma kelo yom cwiny adada. En aye miyo waneno teko pa Lok pa Jehovah i kwo pa ngati moni. (Ibru 4:12) Jehovah cwinye bedo yom ka ce wajalle me konyo dano me ‘ngeyo lok me ada.’ (1 Tem. 2:4) Kadi wa lumalaika bene gibedo ki yomcwiny ka ce ngat mo ongut pi balle ci ocako dongo i yo me cwiny.—Luka 15:10.
6. Mot ango ma watye kwede me tiyo miti pa Lubanga?
6 Lubanga “mito laro jo ducu, dok mito ni jo ducu gunge lok me ada.” (1 Tem. 2:4) Obedo twon mot madit adada botwa me tiyo tic ma rwatte ki miti pa Lubanga, kun wamedde ki kwano Baibul ki dano!