Medde ki Dongo Calo Latit Kwena
1. Labol mene me cencwari me acel ma nyuto ni myero wamedde ki dongo macalo lutit kwena?
1 Lakricitayo myero odok latit kwena mucwiny. Man oweko Yecu omiyo pwonnye muromo bot lupwonnyene wek gudong dirogi me pwony. (Luka 9:1-5; 10:1-11) Man bene omiyo Akwila ki Pricikila gutero Apolo i pacogi ci “gumiye pwony matut i kom Lubanga ma niange makato.” (Tic 18:24-26) Pi tyen lok acel meno, Paulo ocuko cwiny Temceo ma onongo latit kwena mucwiny, me medde ki cwalo karene i pwonye, wek ‘dano gunen kit ma en tye ka wot kwede anyim.’ (1 Tem. 4:13-15) Kadi bed dong watiyo bot Rwot macalo lutit kwena pi kare malac nyo pe, myero wamedde ki dongo dirowa.
2. Watwero nongo pwony ki bot jo mukene nining?
2 Nong Pwony ki Bot Jo Mukene: Yo acel me dongo dirowa obedo me nongo pwony ki bot jo mukene. (Car. 27:17) Pi meno, bed ka neno kit ma lutit kwena mukene gimiyo kwede pwonygi. Peny pi kony ma mitte ki bot lutit kwena mucwiny, dok iter iti ka winyo tam ma gimiyo. (Car. 1:5) Tika itye ki ngec manok i kom kit me dok cen ka lim, cako kwano Baibul ki dano, nyo yo mo mukene me tito kwena? Kwany kare me penyo lanen wi gurupwu nyo latit kwena ma tye ki ngec muromo wek opwonyi. Wi myero opo bene ni, cwiny maleng pa Jehovah twero medo kerowa me timo jami, pi man, leg pire kare ducu.—Luka 11:13.
3. Ka kiminiwa tira ma gwok pe wapenyo pire, myero wadok iye nining?
3 Ka kimini tira i kit me dongo dironi, pe iwek kiniga omaki, kadi bed onongo pe ipenyo pire. (Latit. 7:9) Calo Apolo, jol tira meno ki mwolo kun imiyo pwoc. Timo kit meno nyuto ryeko.—Car. 12:15.
4. Tyen lok maber ango ma Yecu omiyo pi dongo macalo latit kwena?
4 Dongowa Miyo Deyo Bot Lubanga: Yecu otiyo ki lapor me cuko cwiny jo ma lubbe me dongo dirogi macalo lutit kwena. I lapor acel, Yecu owaco ni en aye olok dok lulub kore ma kiwirogi gubedo jang olok. En owacci Wonne lonyo jange ducu ma nyak “wek omedde onyak mapol.” (Jon 15:2) Kit macalo won olok mito ni jang olokke onyak nyige mapol, Jehovah bene mito ni wadong i dirowa me tito kwena ma en aye “pwoc ma wamiyo ki dogwa.” (Ibru 13:15) Adwogi maber ango ma wanongo ka wadongo macalo lutit kwena? Yecu omiyo lagam ni: “Man bikelo deyo i kom Abana, ka wunyako nyig mapol.”—Jon 15:8.