Medde ki ‘Nyako Nyig Mapol’
1 Yecu otiyo ki leb me carolok kun loko ni etye macalo olok me ada, Wonne tye macalo Lapur poto olok, ki jo ma lubbe ma kiwirogi ki cwiny maleng gitye macalo jang olok ma nyak. I kare ma en tye ka tito tic pa Lapur me carolok-ki, Yecu onwoyo matek ni bedo jang olok ma nongo pud tye i kom yat pire tek mada. (Jon 15:1-4) Pwony ma tye iye aye ni bedo ki wat macok ki Jehovah bedo calo bedo jang “olok me ada” ma obedo Yecu Kricito, ma nyako nyige mapol-li. Omyero wamedde ki nyako “nyig ma nyak pi cwiny maleng” kacel ki nyig me Ker-ri mapol.—Gal. 5:22, 23; Mat. 24:14; 28:19, 20.
2 Nyig ma Nyak pi Cwiny Maleng: Dongowa i yo me cwiny nen i kit ma wanyutu kwede nyig ma nyak pi cwiny maleng. In tika itute me nyako nyig ma cwiny pa Lubanga nyako ma a ki i kwano kacel ki lwodo Lok pa Lubanga? (Pil. 1:9-11) Pe i kal akala me lego pi cwiny maleng, ma twero nyako nyig mabeco ma keto deyo i kom Jehovah dok miyo imedde ki dongo i yo me cwiny.—Luka 11:13; Jon 13:35.
3 Dongo nyig ma nyak pi cwiny maleng-ngi bene konyowa me tiyo tic me pwony ki mit kom. Me labolle, mar ki niye miyo wakwanyo kare me cito i tic me pwony kadi bed tic odiyowa tutwal. Nyig mogo calo kuc, diyo cwiny, kica, mwolo, ki gwokke ken konyowa me tero jo ma gidagwa i yo maber. Yomcwiny miyo wanongo yengo i ticwa me pwony kadi bed ni dano pe gimito winyo lokwa.
4 Nyig me Ker-ri: Wan bene wamito nyako nyig me Ker-ri. Meno kwako ‘miyo pakwa kare ducu macalo gitum ma en aye pwoc ma wamiyo ki dogwa pi tuco nying Jehovah.’ (Ibru 13:15) Watimo man ki tito lok me kwena maber-ri ki mit kom. In tika itye ka tute me nyako nyig me Ker-ri ki dongo ticci me pwony?
5 Yecu onyutu ni jo ma lugen ma gilubo kore gibinyako nyiggi i wel mapat pat. (Mat. 13:23) Pi meno, omyero pe wapore ki jo mukene ento omyero wati pi Jehovah ki tekowa ducu. (Gal. 6:4) Ngine kekenwa me neno gin ma kerowa twero kun watiyo ki Lok pa Lubanga konyowa me medde ki pako Jehovah kacel ki ‘nyako nyig mapol.’—Jon 15: 8.