Gwokke ki Owic Magi ka Itye ka Kwano Baibul ki Latin Kwanni

Loko Lok Mapol: Pe ibed ki tam ni in aye myero igony te jami ducu. Yecu otiyo ki lapeny me konyo dano wek gutam dok guo i niango matir. (Mat 17:24-27) Penyo peny weko kwan bedo mit dok konyi me ngeyo gin ma latin kwanni niang dok ye iye. (be-E 253 para. 3-4) Ka itye ka penyo lapeny, di cwinyi kun ikuro lagam. Ka latin kwan omiyo lagam ma pe tye kakare, ma ka wacce lagam matir, kel wiye i niango matir kun itiyo ki lapeny mukene. (be-E 238 para. 1-2) Lok motmot wek latin kwan obed ki kare me niang pwony manyen.​—be-E 230 para. 4.

Pwony i Yo ma Niang Iye Tek: Gwokke ki tito jami weng ma ingeyo i kom gin ma wutye ka nyamone-ni. (Jon 16:12) Lok tutwalle i kom pwony ma pire tek ma tye i paragraf meno. (be-E 226 para. 4-5) Duro lok mapol, kadi bed winyone mit, twero umo pwony ma pigi tego woko. (be-E 235 para. 3) Ka latin kwan oniang lok ma pire tek i paragraf moni, medde anyim i paragraf ma lubo.

Miyo Mere Ngec Keken: Mitiwa tye me gudo cwiny latin kwanwa, ento pe me mine ngec keken. (Luka 24:32) Ti ki teko ma tye i Lok pa Lubanga kun iloko tutwalle i kom ginacoya ma pigi tego i pwony meno. (2Kor 10:4; Ibru 4:12; be-E 144 para. 1-3) Ti ki lapor ma niang iye yot. (be-E 245 para. 2-4) Tam i kom peko pa latin kwanni ki gin ma en ye iye, ci pwonye i yo ma lubbe ki jami magi. Peny lapeny mogo calo: “Iwinyo nining i kom gin ma itye ka pwonyone?” “Man pwonyowa ngo i kom Jehovah?” “Adwogi maber ango ma iromo nongone ka ilubo tam man?”​—be-E 238 para. 3-5; 259 para. 1.