Kit me Nyuto Mar Bot Dano Luwotwa

Kit macalo wan ducu waa ki i kom laco mukwongo Adam, watye jo me ot acel. Kadi bed kitamo ni jo me ot acel omyero gumarre dok guwor luwotgi, ento i kare-ni nongo kodi mar meno pe yot. Man aye pe obedo gin ma Lubangawa ma lamar-ri mito.

GIN MA COC MALENG WACO I KOM MAR

“Mar lawoti macalo imarre keni.”​—LULEVI 19:18.

“Wumar lukworwu”​—MATAYO 5:44.

GIN MA MARO DANO LAWOTI KWAKO

Nen kong kit ma Lubanga otito kwede gin ma mar obedo i Lokke i 1 Jo Korint 13:4-7:

“Mar diyo cwinye, dok lakica bene.”

Tam kong: Iwinyo nining ka jo mukene gidiyo cwinygi i komi, ginyutti kica dok pe giteri ki gero ka itimo bal?

“Mar pe lanyeko.”

Tam kong: Iwinyo nining ka jo mukene gitye ki gung cwiny i komi nyo gineni ki wang me nyeko?

Mar “pe yenyo gin mukemo en kene.”

Tam kong: Iwinyo nining ka jo mukene giworo tammi dok pe gimoko i kom tamgi kengi kare ducu?

Mar “pe bedo kun keto cwinye i kom gin marac ma gitimo i kome.”

Tam kong: Lubanga tye atera me timo kica ki jo ma gutimo bal ento i ngeye gungut. “En pe bibedo ka jukowa kun juyowa kare ducu, kinigane bene pe ri nakanaka.” (Jabuli 103:9) Wabedo ki pwoc ka ngat mo ma wacwero cwinye otimiwa kica. Pi meno, omyero wabed atera me timo kica ki jo mukene ka gubalo i komwa.​—Jabuli 86:5.

Mar “cwinye pe bedo yom i kom tim ma pe atir.”

Tam kong: Ka gin mo marac otimme i komwa, pe wamito ni jo mukene gunyer canwa. Pi meno, cwinywa pe bedo yom ka jo mukene gitye ka kato ki i kwo matek, kadi bed guterowa marac i kare mukato.

Me nongo mot pa Lubanga, omyero wamar jo mukene i yo magi labongo paro pi mwakagi, rokgi, nyo dinigi. Yo acel ma watwero timo kwede meno aye ki konyo lupeko.