Ka ma Kikwanyo Iye Pwony pi Yub me Cokke
JANUARI 3-9
LONYO MA TYE I LOK PA LUBANGA | LUNGOLKOP 15-16
“Lok Roro Obedo Gin mo me Lewic Adada!”
Lok Roro [Erupe] Tye Lanyut me Kare me Agikki!
4 Mukwongo, kong dong waneno lok kom Delila, dako ma Langolkop Samson onongo maro adada-ni. Samson onongo cwinye tye me lweny i kom Lupiliciti pi jo pa Lubanga. Rwodi abic pa Lupiliciti onongo gingeyo ni Delila pe ki mar me ada i kom Samson, pi meno, gumiye lim madit wek obwol Samson me titte ka ma tek kome madwong-ngi a ki iye ka dong wek gineke woko. Miti me cente oweko Delila oye lok pa rwodi-ni, ento yellene me nongo ka ma teko pa Samson tye iye oto nono tyen adek kulu. En obedo ka dide “matek ki lokke nino ki nino.” Man oweko Samson ‘ool adada ma onongo dong mito to woko.’ En otite ni tekone bia woko ka kilyelo yer wiye pienni cakke wa ka tinone peya kilyelo yer wiye dok ka kilyelo, tekone bia woko. I nge tite, Delila oweko Samson onino i eme, ci kilyelo yer wiye ka dong olwongo lumone ci omiye i cinggi wek gutim gin ma gimito i kome. (Lungol. 16:4, 5, 15-21) Man obedo gin marac adada! Pi miti me lim, Delila oketo roro i kom ngat ma onongo marre adada.
w05-E 1/15 27 para. 5
Wi Lok Madongo ma Kikwanyo ki i Buk pa Lungolkop
14:16, 17; 16:16. Dido lok ki daa kacel ki ngwiro lok twero balo wat maber ma i kin dano.—Carolok 19:13; 21:19.
Lok Roro [Erupe] Tye Lanyut me Kare me Agikki
15 Jo munyomme gitwero gwoko gennegi bot luotgi nining? Lok pa Lubanga wacci: “Gum obed i kom dakoni [nyo cwari] ma inyomo ka tinoni” dok bene ni, “bed ki yomcwiny kacel ki dako [nyo laco] ma imaro.” (Car. 5:18; Latit. 9:9) Ka luot aryo ducu giwoto ki tii, omyero “gutim jami ducu ma twere” me gwoko margi kacel ki watgi. Man te lokke ni ngat acel acel myero opar pi lawote, ocwal cawa kacel ki lawote, dok obed cok ki lawote. Omyero guket cwinygi me jingo margi kacel ki watgi ki Jehovah. Pi meno, laco ki dako omyero gukwan Baibul i yo matut kacel, gubed i ticwa me pwony kacel kare ki kare, ki dong guleg kacel wek gunong mot pa Jehovah.
BED LAGEN BOT JEHOVAH
16 Tye omege ki lumege mogo i kacokke ma gutimo bal madongo adada ento ‘kicikogi matek adada wek gucak bedo ki niye me ada.’ (Tito 1:13) Jo mukene balgi oweko kiryemogi woko ki i kacokke. Tira ma kimiyo bot jo magi, okonyogi me yubo watgi ki Jehovah. (Ibru 12:11) Ento ka watye ki watwa mo nyo laremwa macok ma kiryemo woko ki i kacokke kono? Man twero temo gennewa pe bot ngat ma kiryemo-ni ento bot Lubanga. Jehovah tye ka nenowa ka ce wabilubo cikke pe me ribbe ki ngat mo keken ma kiryemo woko ki i kacokke.—Kwan 1 Jo Korint 5:11-13.
Yenyo Lonyo me Cwiny
w05-E 3/15 27 para. 6
Samson Oloyo Lweny pi Teko pa Jehovah!
Gin ma pire tek loyo bot Samson onongo obedo cobo yubbe me lweny i kom Lupiliciti. Bedone i ot pa lakwele ma i Gaja-ni onongo tye pi lweny i kom lumone pa Lubanga. Samson onongo mito kabuto i boma pa lumonegi, dok kabuto onongo twero nonge i ot pa lakwele-ni. Samson onongo pe ki miti me donyo i tim me tarwang. En oa woko ki i gang pa dako meno i cwiny dyewor, dok oputo dog cel pa lumonegi ki pagi wirre ducu, ci otingo ocito kwede wa i wi got mo macok ki Kebron, i bor piny me mairo 37 [nyo kilomita 60] kulu. Man otimme pi cwak ki teko ma Lubanga omiye.—Lungolkop 16:1-3.
JANUARI 10-16
LONYO MA TYE I LOK PA LUBANGA | LUNGOLKOP 17-19
“Turo Cik pa Lubanga Kelo Peko”
it-2-E 390-391
Mika
1. Mika onongo a ki i kaka pa jo Epraim. En oturo cik me aboro i kom Cik Apar-ri, (Nia 20:15), kun kwalo lim ryal alip apar wiye acel ki bot minne. I kare ma en otuco balle dok odwoko cente meno, minne owaco ni: “An kikoma adyero ryal man bot Rwot [Jehovah] pi woda me timo cal apaya ki cal ryal ma giliyo aliya; ci kombeddi dong omiyo adwoko boti.” Min Mika okwanyo lim ryal 200 omiyo bot latet ryal ci oteto “cal apaya ma kimwono kome ki ryal” dok lacen kiketo i ot pa Mika. Mika onongo tye ki ‘ot me woro lubanga i gange,’ en oyubo epod ki cal lubange dok oketo wode acel me bedo lalamdog. Kadi bed ni en onongo tamo ni etimo meno me miyo deyo bot Jehovah, ento onongo obedo tim mo marac adada, pien onongo turo cik ma gengo woro cal apaya (Nia 20:4-6) dok onongo pe rwatte ki yub ma Jehovah oketo pi Luicrael me bedo ki kema me woro kacel ki lulamdog. (Lungol 17:1-6; Nwo 12:1-14) Lacen en otero awobi mo ma nyinge Yonacan, lakwar Gercom ma wod pa Moses i gange, ci opango Lalevi man me tic macalo lalamdog pire. (Lungol 18:4, 30) Mika onongo cwinye yom pi jami magi, dok owaco ni: “Kombeddi dong angeyo ni Rwot [Jehovah] bibedo kweda maber.” (Lungol 17:7-13) Ento Yonacan onongo pe a ki i doggola pa Aron, pi meno en onongo pe opore me tic macalo lalamdog, man omedo bal pa Mika ameda.—Wel 3:10.
it-2-E 391 para. 2
Mika
Ma pe otero cawa malac, Mika kacel ki jone gulubo kor jo pa Dan. Ma guo bot jo pa Dan, kipenyogi pingo guringo korgi, ci Mika ogamo ni: “Wukwanyo lubanga ma apayo, ki ajwakana, wucito kwede woko, dong adong ki gin ango?” I nge meno, awobe pa Dan guciko Mika ni kibinekogi woko ka gumedde ki jemo nyo lubo korgi. Ma Mika oneno ni jo pa Dan gitek loyo jone, en odok gang. (Lungol 18:22-26) I nge meno, jo Dan gucito guneko jo ma i Laic dok guwango boma meno woko, ci gugero boma pa jo pa Dan i wi obur me Laic. ‘Jo Dan gucibo cal ma yam Mika opayo-ni me aworagi, dok cal meno obedo kunu pi kare ducu ma ot pa Lubanga onongo tye i Cilo,’ ci guketo Yonacan ki awobene me bedo lulamdoggi.—Lungol 18:27-31.
Yenyo Lonyo me Cwiny
Baibul ma Gudo Cwiny Dano Pien Niange dok Kwanone Yot
6 Caden ma moko ni kitye ka tic ki nying Lubanga i Baibul pe orweny ento tye ka medde ameda. Baibulwa me New World Translation ma kiloko nyig lok mogo ki iye dok kicwalo woko i 2013 tye ki nying Lubanga tyen 7,216, ma man wele kato me 1984 tyen abicel kulu. Kabedo abic mukene ma kimedo iye nying Lubanga tye i 1 Camuel 2:25; 6:3; 10:26; 23:14, 16. Kidwoko nying man kakare pien ni Buk Adola ma kinongo ki i nam me Dead Sea, ma ori loyo buk adola me leb Ibru ki mwaki 1,000 kulu tye ki nying Lubanga i tyeng magi. Ki bene, macalo adwogi me kwano coc macon ki diro, kidwoko nying Lubanga i kabedo acel ma nonge i Lungolkop 19:18.
JANUARI 17-23
LONYO MA TYE I LOK PA LUBANGA | LUNGOLKOP 20-21
“Medde ki Yenyo Tira pa Jehovah”
w11-E 9/15 32 para. 2
Tika Itwero Bedo Calo Finekaci ka Itye ka Kemme ki Atematema?
I kare ma kaki me Icrael mukene-ni guwinyo ni co me Gibea ma gia ki i kaka pa Benjamin gubuto tektek ki dako pa Lalevi mo ci guneko woko, gin gucokke ka lweny i kom jo Benjamin. (Lungol. 20:1-11) Gin gulego pi kony pa Jehovah ma peya gucito ka lweny, ento jo Benjamin guloyogi wang aryo kulu, dok danogi mapol guto. (Lungol. 20:14-25) Tika onongo gibiwacci legagi-ni pe okonyo gin mo? Tika Jehovah onongo mito ni gudok i kom tim marac ma kitimo i kom dako-ni?
w11-E 9/15 32 para. 4
Tika Itwero Bedo Calo Finekaci ka Itye ka Kemme ki Atematema?
Pwony ango ma wanongo ki i gin mutimme-ni? Pekki mogo ma i kacokke twero medde pi kare malac kadi bed luelda gutute matek dok gulego Jehovah pi kony. Ka meno otimme, luelda myero wigi opo i kom lok ma Yecu owaco ni: “Wulegi, ci gibimiyo botwu; wuyeny, ci wubinongo, wudwong doggola gibiyabo botwu.” (Luka 11:9) Kadi bed luneno me kacokke giwinyo calo Jehovah tye ka galle ki gamo legagi, myero gubed ki gen ni Jehovah bigamone i karene kikome.
Yenyo Lonyo me Cwiny
Tika Onongo Ingeyo?
Latangdiyo onongo kitiyo kwede nining me lweny i kare macon?
Latangdiyo obedo gin lweny ma Daudi otiyo kwede me neko twon oluma mo ma nyinge Goliac. Daudi nen calo opwonyo kit me tic kwede i kare ma en pud tye awobi ma kwayo romi.—1 Camuel 17:40-50.
I kare me Baibul, jo Ejipt ki Aciria onongo gigoyo cal latangdiyo. Gin lweny man onongo kiyubo ki del nyo bongo ma kitweyo i kom tol. Ngat ma bayo-ni onongo keto iye gweng mapwot ma rom ki mucungwa matidi. I ngeye, en wiro latangdiyo ka dong weko tolle acel, ma miyo gwengnge cito i cipid matek adada ci celo gin moni litap.
I kupiny me lobo Acia, kigolo piny ci kinongo latangdiyo mapol ma onongo kitiyo kwedgi me lweny. Lulweny ma ludiro nen calo onongo gitiyo ki latangdiyo me bayo gweng i cipid matek adada. Lukwan mapol pe giye ni gweng ma kibayo ki latangdiyo twero o wa ka ma atero o iye. Kadi bed kumeno, latangdiyo onongo pud twero wano dano marac adada.—Lungol. 20:16.
JANUARI 24-30
LONYO MA TYE I LOK PA LUBANGA | RUTH 1-2
“Nyut Mar ma Pe Lokke”
Lub Lanen pa Jo ma Gubedo Lurem Jehovah
5 Ruth onongo twero tamone ni etye ki lupacone i lobo Moab—ka cwar dako mo oto, minne ki wadine mukene onongo gitwero dwoke gang dok gimiye kony ma mitte. Moab onongo obedo lobo me anywaline. Tekwarogi onongo obedo tekwarone, dok gin onongo lutuggi ma bene giloko lebbe. Naomi onongo pe twero cikke bote ni en binongo jami magi ki i Beterekem. Ki lok ada, Naomi ocuko cwiny Ruth ni en odong i Moab. Naomi onongo tye ki lworo ni pe ebitwero nongo laco pi mon wode aryo-ni, nyo gang ka ma kitwero nyomogi iye. Ngo ma onongo Ruth twero timone? Nen kong apokapoka ma tye i kin en ki Orupa, ma ‘odok cen bot lutugi ki bot lubangane.’ (Ruth 1:9-15) Ruth tika onongo mito dok cen bot lubange me goba pa lutugi-ni? Pe wacel.
Lub Lanen pa Jo ma Gubedo Lurem Jehovah
6 Nen calo Ruth onongo tye ki ngec i kom Lubanga Jehovah, gwok nyo opwonyo ki bot cware ma oto woko-ni, nyo Naomi. Jehovah onongo pe tye calo lubange me Moab. Ruth onongo ngeyo ni Jehovah myero me nongo marre kacel ki worone. Ento, bedo ki ngec keken onongo pe romo. Ruth onongo myero omok tamme. En tika biyero Jehovah macalo Lubangane? Ruth omoko tam me ryeko. En owaco bot Naomi ni, “Jo tuwu gibibedo jo tuwa bene, dok Lubangani bibedo Lubangana.” (Ruth 1:16) Pud dong yomo cwinywa adada me tamo i kom mar ma onongo Ruth tye kwede pi Naomi, ento ma dong pire tek loyo aye obedo marre pi Jehovah. Boaj lacen opwoyo Ruth matek pi nongo ka larre i te bwom Jehovah. (Kwan Ruth 2:12.) Meno twero poyo wiwa i kom latin winyo ma tye i te bwom minne me nongo gwok. (Jab. 36:7; 91:1-4) Jehovah odoko lanyodo ma kit meno bot Ruth. Jehovah omine mot pi tam ma en omoko-ni, dok bene Ruth pe okoko ange i kom tam meno.
Yenyo Lonyo me Cwiny
w05-E 3/1 27 para. 1
Wi Lok Madongo ma Kikwanyo ki i Buk pa Ruth
1:13, 21—Tika Jehovah aye okelo kipwola nyo peko i kom Naomi? Pe, dok Naomi pe okok i kom Lubanga ni otimo gin mo marac. Ento en onongo pud tamo ni Jehovah aye okelo pekki magi ducu i kome. En obedo ki keccwiny dok cwinye onongo otur adada. Ki lok ada, i kare meno onongo kitamo ni bedo ki lutino nyuto gum pa Lubanga ento bedo lalur onongo nyuto ni kiceno ngat moni acena. Bedo labongo likwayo ki dong to pa lutino awobene aryo-ni, oweko Naomi onongo tamo ni etwero kok i kom Jehovah pi alano meno.
JANUARI 31–FEBUARI 6
LONYO MA TYE I LOK PA LUBANGA | RUTH 3-4
“Bed ki Nying Maber Dok Imedde ki Gwokone”
‘Dako ma Kite Ber Mada’
Boaj oloko, dok ngene kene ni lokke i yo me niango ki kica ocuko cwiny Ruth. En owacci: “Rwot [Jehovah] omiyi gum, nyara; man inyutta berri madit makato macon, pien pe icito i kor awobe matino, ma lucan nyo ma lulonyo.” (Ruth 3:10) I kare ma Boaj owaco ni “macon” en onongo tye ka waco kit ma Ruth obedo kwede lagen i kare ma oye me gwoko Naomi ki dong bino kwede i Icrael. Lok ma en otiyo kwede ni “man,” en onongo tye ka lok i kom miti pa Ruth me ye nyomme kwede. Boaj onongo ngeyo ni dako ma pud tidi calo Ruth romo yenyo laco ki i kin awobe matino, kadi lacan nyo lalonyo. Ento, Ruth onongo mito timo ber pe bot Naomi keken ento wa bot cwar Naomi ma dong oto woko-ni bene, wek nyinge omedde i kin lutugi. Pe tek me niang tyen lok ma omiyo ber cwiny latin dako-ni ogudo cwiny Boaj.
‘Dako ma Kite Ber Mada’
Tamo i kom gin ma Boaj owaco-ni myero obed ni oyomo cwiny Ruth mada—ni en ngene bot jo ducu calo ‘dako ma kite ber mada’! Ngene kene ni mitine me ngeyo Jehovah ki me tic pire aye okelo nying maber meno. En bene onyuto kica ki niango madit i kom Naomi ki jone, kun ye me loko kwone ma lubbe ki cik me tekwaro ma onongo pat tutwal bote. Ka walubo niye pa Ruth, ci wabitero jo mukene ki cik me tekwarogi ki woro madit. Ka watimo kumeno, ci wan bene wabinongo nying maber.
‘Dako ma Kite Ber Mada’
Boaj onyomo Ruth. I ngeye, wakwano ni: Jehovah “omiyo ogamo ic, onywalo latin laco.” Ci mon me Beterekem gugoyo laa i kom Naomi kun gipako Ruth pi bedo ngat maber mada bot Naomi makato awobe abiro kulu. Lacen, waniang ni, wod pa Ruth obedo kwaro Kabaka Daudi ma oywek-ki. (Ruth 4:11-22) Daudi, ki tungcel, obedo kwaro Yecu Kricito.—Mat. 1:1.
Yenyo Lonyo me Cwiny
w05-E 3/1 29 para. 3
Wi Lok Madongo ma Kikwanyo ki i Buk pa Ruth
4:6—I yo ango ma lalako onongo twero ‘balo’ kwede ginaleya ma mege ka olako jami pa ngat mukene? Mukwongo ka ngat mo onongo tye i peko, ci ocato ngomme ma en oleyo ki bot wonne, lalako onongo biculo cente pi ngom meno i wel ma kimoko muporo wel mwaka mudong me o i Jubili. (Lulevi 25:25-27) Ka lalako owilo ngom meno, en onongo bitic ki cente ma mege dok man dwoko piny wel limme. Ki lok ada, ka Ruth onywalo latin awobi, latin meno aye onongo bilako ngom ma lalako owilo-ni me kaka wadi macok pa lalako.
FEBUARI 7-13
LONYO MA TYE I LOK PA LUBANGA | 1 CAMUEL 1-2
“Wuyab Cwinywu Bot Jehovah i Lega”
En Olego ki Cwinye Ducu Bot Lubanga
12 Dong, Anna onyuto lanen maber bot lutic ducu pa Lubanga i lok kom lega. Jehovah mito ni jone ducu gubed agonya me loko lok ducu ma tye i cwinygi labongo lworo kit macalo latin ma genne loko ki lanywalle me amara. (Kwan Jabuli 62:8; 1 Jo Tecalonika 5:17.) Lakwena Petero otiyo ki cwiny maleng me coyo lok man me kwe cwiny ma kwako lega bot Jehovah ni: “Wuket parwu ducu i kome, pien en tamo piwu.”—1 Pet. 5:7.
w07-E 3/15 16 para. 4
Kit ma Anna Onongo Kwede Kuc
Ngo ma wapwonyo ki i gin mutimme-ni? Ka watye ka lega bot Jehovah pi par ma watye kwede, watwero wacce kit ma wawinyo kwede kun watitte gin ma wamito kikome. Ka pe tye gin mo keken ma watwero timone me cobo pekowa, ci myero wawek jami ducu i cinge. Pe tye gin mo ma watwero timone maber makato man.—Carolok 3:5, 6.
Yenyo Lonyo me Cwiny
w05-E 3/15 21 para. 5
Wi Lok Madongo ma Kikwanyo ki i Buk pa Camuel me Acel
2:10—Pingo Anna olego ni Jehovah omi ‘teko bot kabakane’ kadi bed Luicrael onongo pud gipe ki kabaka? Kitito con i te Cik pa Moses ni Luicrael gibibedo ki kabaka. (Nwoyo Cik 17:14-18) I kare ma Yakobo cok to, en oloko macalo lanebi ni: “Odoo-ker [lanyut me loc] pe bia ki bot Juda.” (Acakki 49:10) Jehovah oloko i kom Cara ma en min rok me Icrael ni: “Luker pa rok mapol gibia ki i kome.” (Acakki 17:16) Man nyuto ni Anna onongo tye ka lega pi kabaka ma bibino i anyim.
FEBUARI 14-20
LONYO MA TYE I LOK PA LUBANGA | 1 CAMUEL 3-5
“Jehovah Paro Piwa”
Jehovah Paro Piwa Kadi Bed En Won Twer Ducu
3 Camuel ocako tic i kema me woro ma onongo pud tidi adada. (1 Camuel 3:1) I dyewor mo acel, i kare ma en onino woko, gin mo me aura otimme.* (Nen lok ma tye i tere piny.) (Kwan 1 Camuel 3:2-10.) En owinyo ka ngat mo lwongo nyinge. Camuel otamo ni Lalamdog Madit Eli aye ma tye ka lwonge. Ki mwolo en oa malo, oringo bot Eli ci owaco ni: “An atye ene, ibedo ka lwonga.” Ento Eli ogamo ni: “An pe alwongi.” I kare ma gin man otimme tyen aryo mukene, Eli oniang ni Lubanga aye ma tye ka lwongo Camuel. Pi meno Eli owaco ki Camuel gin ma myero en ogam ka dok kilwonge, ci Camuel bene olubo. Pingo Jehovah pe owaco ki Camuel atir i acakkine ni en aye ma etye ka lwonge? Baibul pe tittiwa. Ento twero bedo ni Jehovah otimo kit meno pien onongo paro pi kit ma Camuel winyo kwede.
Jehovah Paro Piwa Kadi Bed En Won Twer Ducu
4 Kwan 1 Camuel 3:11-18. Cik pa Jehovah waco ni lutino omyero guwor jo madongo, tutwalle jo ma gitye ki twero. (Nia 22:28; Lulevi 19:32) Pi meno, tek tutwal me tamo ni awobi matidi calo Camuel onongo twero a odiko ci cito bot Eli, kun wacce ki tekcwiny kwena me ngolo kop pa Lubanga. Baibul wacciwa ni Camuel obedo ka “lworo tito bot Eli lok ma Lubanga onyuto bote.” Ento Lubanga onyuto atir bot Eli ni En aye ma elwongo Camuel. Macalo adwogine, Eli owaco ki Camuel ni omyero pe omung lok ma Lubanga otite. Camuel owinyo lok pa Eli ci “otitte lok ducu.”
Yenyo Lonyo me Cwiny
w05 3/15 21 para. 6
Wi Lok Madongo ma Kikwanyo ki i Buk pa Camuel me Acel
3:3—Tika ada Camuel onongo buto i Kabedo Maleng Loyo? Ku. En onongo pe buto kunnu. Camuel onongo Lalevi ma a ki i doggola pa Kokat, dok jo pa Kokat onongo pe gitiyo calo lulamdog. (1 Tekwaro 6:33-38) Pi meno, cik onongo pe ye ni Camuel odony “ka neno kom jami maleng.” (Wel 4:17-20) Ki i kema me woro, Camuel onongo twero gik i dyekal me kema keken. Dok meno aye nen calo ka ma Camuel onongo buto iye. Eli bene nen calo onongo buto ka mo i dyekal me kema. Lok ma kigonyo ni “ka ma canduk pa Lubanga bedo iye-ni” nen calo onongo kwako kema me woro ki dyekalle ducu.
FEBUARI 21-27
LONYO MA TYE I LOK PA LUBANGA | 1 CAMUEL 6-8
“Anga ma Kabakani?”
it-2-E 163 para. 1
Ker pa Lubanga
Gupenyo pi Kabaka. Cokcok i nge mwaka 400 ma Luicrael gua ki Ejipt, dok i nge mwaka 800 ma Lubanga omoko gicikke ki Abraim, Luicrael gupenyo ni gimito dano mo wek ologi macalo kabaka, kit ma rok mukene onongo gitye kwede-ni. Kwacgi-ni onongo nyuto ni gidag ni Jehovah ologi macalo kabakagi. (1Cam 8:4-8) Ki lok ada, Luicrael onongo gitye ki gen ni Lubanga biketo ker mo kit ma yam en ocikke kwede bot Abraim ki Yakobo. Onongo bene tye jami mukene ma moko gen meno, me labolle, lok ma Yakobo oloko macalo lanebi i kom Juda (Acak 49:8-10), lok pa Jehovah bot Luicrael i kare ma gicok donyo i Lobo ma Kiciko Pire (Nia 19:3-6), cik ma kwako Gicikke ma Lubanga omoko ki Luicrael (Nwo 17:14, 15), ki dong lok ma Lubanga oweko lanebi Balaam oloko (Wel 24:2-7, 17). Anna, min Camuel bene onyuto gen meno i lega. (1Cam 2:7-10) Kadi bed kumeno, Jehovah onongo pud peya otuco “mung” ducu madok i kom Ker meno dok bene pe onyuto kare ma ker meno bibino iye, kit ma locce bibedo kwede ki dong ka ma biloc ki iye—ka ce biloc ki i lobo nyo i polo. Pi meno, Luicrael gunyuto dit wic i kare ma gupenyo ni gimito kabaka ma biloyogi.
w11-E 1/1 27 para. 1
En Odiyo Cwinye Kadi Bed Kicwero Cwinye
Nen kit ma Jehovah odok kwede i kare ma Camuel otite jami ma onongo tye ka timme: “Winy dog lwak i gin ducu ma guwaco boti; pien gin pe gukwero in, ento gukwero an, ni pe abed kabaka ma loyogi.” Lok man okweyo cwiny Camuel adada, ento onyuto cac madit adada ma jo magi onongo gitye kwede i kom Lubanga Won Twer Ducu! Jehovah owaco bot lanebine ni ocik Luicrael pi adwogi marac ma gibinongo pi bedo ki dano macalo kabakagi. Ma Camuel otittigi, gin pud gumedde ni: “Pe; wan wabibedo ki kabaka ma loyowa.” Camuel onongo tye lawiny bot Lubanga kare ducu, pi meno, en ocito owiro kabaka ma Jehovah oyero.—1 Camuel 8:7-19.
w10-E 1/15 30 para. 9
Kiilo Malo Twero me Loc pa Jehovah!
9 Jami mutimme i kare macon nyuto ada pa lok ma Jehovah owaco-ni. Bedo ki dano macalo kabakagi okelo pekki mapol i kom Luicrael, tutwalle ka kabaka meno pe obedo lagen. Gin mutimme i kom rok me Icrael weko pe wabedo ki ur ni pe tye adwogi mo maber marii pi naka ma obino pi bedo i te loc pa dano ma pe gingeyo Jehovah. Ki lok ada, luwibye mogo gilego gire ni Lubanga ogo laane i tutegi me kelo kuc ki piny ma opye mot, ento Lubanga twero goyo laane nining i kom jo ma pe gimine i te locce?—Jab. 2:10-12.
Yenyo Lonyo me Cwiny
w02-E 4/1 12 para. 13
Pingo Myero Inong Batija?
13 Ma peya wanongo batija macalo Lucaden pa Jehovah, omyero kong wawek yo me kwowa macon. Ngat ma omoko tamme me lubo kor Yecu Kricito myero oye pire kene me weko yo me kwone macon labongo dic mo. Ngat meno kwero jami maraco ma onongo en timo ci moko tamme me timo jami matir i wang Lubanga. Ki i Ginacoya, nyig lok me leb Ibru ki Grik ma kigonyo ni weko yo me kwo macon bene kwako loko ngewa. Man nyuto lokke bot Lubanga kun nongo waweko timo jami maraco. (1 Luker 8:33, 34) Ngat ma oweko yo me kwone macon myero otim jami ma ‘nyuto ni dong etyeko ngut.’ (Tic pa Lukwena 26:20) Man nyuto ni myero wawek woro me goba, watim jami ma rwatte ki cik pa Lubanga, dok wawor Jehovah keken. (Nwoyo Cik 30:2, 8-10; 1 Camuel 7:3) Man weko watimo alokaloka i tamwa, yubwa, ki dong kitwa. (Ejekiel 18:31) ‘Waloko yo me kwowa’ ka waweko timo jami ma lubanga dagi kun waleyo kakare ki kit pa dano manyen.—Tic pa Lukwena 3:19; Jo Epeco 4:20-24; Jo Kolocai 3:5-14.
FEBUARI 28–MARCI 6
LONYO MA TYE I LOK PA LUBANGA | 1 CAMUEL 9-11
“Caulo Onongo Mwol Dok Wor i Acakkine”
Bed Mwol Dok Inge ka ma Keroni Gik Iye
11 Tam kong gin mutimme i kom Kabaka Caulo. I acakkine, en onongo obedo awobi mamwol. En onongo ngeyo ka ma kerone gik iye dok obedo ki lworo me jolo tic mukene. (1 Cam. 9:21; 10:20-22) Ento, i nge kare mo Caulo odoko lawaka dok ongwette me timo tic ma pe mege. En onyuto kit marac man cutcut i nge doko kabaka. I nino mo acel, en pe odiyo cwinye me kuro lanebi Camuel. Me kaka bedo ki mwolo kun geno ni Jehovah twero gwoko jone, Caulo owango gityer kadi bed en onongo pe tye ki twero me timone. Macalo adwogine, Caulo orwenyo cwak pa Jehovah dok lacen Jehovah okwere woko me bedo kabaka. (1 Cam. 13:8-14) Wanyuto ryeko ka wanongo pwony ki i labol me cikowa man dok wagwokke ki ngwette me timo jami ma wape ki twero me timone.
Kit me Bedo ki Cwiny me Jalle-Ken
8 Kabaka Caulo me Icrael tye lanen me cikowa i kom kit ma cwiny me woro twero rwenyo cwiny me jalle ken ma watye kwede. I kare ma en ocako loc, Caulo onongo tye dano ma bwone kekene dok bene mwol (1 Cam. 9:21) En okwero pwodo Luicrael ma onongo giloko marac i kom locce, kadi bed ni onongo gitye ka jemo i kom twero ma Lubanga omiye. (1 Cam. 10:27) Kabaka Caulo oye ni cwiny pa Lubanga otele i kare ma otelo wi Luicrael me loyo lweny i kom jo Ammon. Lacen, ki cwiny me mwolo, en omiyo pwoc bot Jehovah pi loc man labongo tamo pire keken.—1 Cam. 11:6, 11-13.
w95-E 12/15 10 para. 1
Jo Ammon—Guculo ka Wang Gin Maber ki Timo Gin Marac
Jo Ammon dok guculo ka wang kica ma Jehovah onyuto botgi ki timo gin marac. Jehovah pe ocayo tim gero ki buragi-ni acaya. ‘Ka Caulo owinyo lok pa Nakac ci cwiny pa Lubanga omiye teko, dok kiniga omake matek.’ I te tela pa cwiny pa Lubanga, Caulo oyero co ma romo 330,000 me lweny i kom jo Ammon ci guneko jo Ammon mapol adada, ma oweko ‘jo ma gubwotte guket woko ata ma pe inongo jo aryo ma gudong kacel.’—1 Camuel 11:6, 11.
Yenyo Lonyo me Cwiny
w05-E 3/15 22 para. 8
Wi Lok Madongo ma Kikwanyo ki i Buk pa Camuel me Acel
9:9—Gin ango ma watwero pwonyone ki i lok man ni: ‘Dano ma kilwongo ni lanebi i kare-ni onongo con kilwongo ni dano ma neno piny’? Lok man twero nyutone ni ma wel lunebi omedde i kare pa Camuel ki dong i kare pa luker me Icrael, kicako lwongo “dano ma neno piny” ni “lanebi.” Camuel aye ngat mukwongo ma kicako lwongone ni lanebi.—Tic pa Lukwena 3:24.