Lapeny Pa Lukwan Bukkewa

Angagi ma onongo gubedo askari me ot pa Lubanga? Tic ango ma onongo gitimo?

Lulevi mogo ma onongo pe gubedo lulamdog onongo gitiyo tic mukene, calo tic askari. Onongo gitiyo i te twero pa ladit askari me ot pa Lubanga. Lacoc ma Lajudaya ma nyinge Philo otito tic pa askari magi ni: “Lulevi magi mukene gigwoko doggola ka ma dano donyo kwede iye i dyekal me ot pa Lubanga. Mukene gigwoko doggola ma donyo i kabedo maleng. Gineno ni ngat mo ma pe opore pe odonyo kunnu, kadi bed akaka nyo ma pe ngeyo. Mukene gibedo ka wot gilworo ot pa Lubanga me gwokone, kun gilokke aloka, dyeceng ki dyewor.”

Lukiko pa Lujudaya onongo gitiyo ki askari man me konyogi. Man obedo gurup acel keken pa Lujudaya ma gamente pa Luroma oye ni guting jami lweny.

Lakwan mo ma nyinge Joachim Jeremias otito ni i kare ma askari gubino ka mako Yecu, en openyogi pingo pe gumake con kun onongo ebedo ka pwony i Ot pa Lubanga jwijwi. (Mat. 26:55) Yecu onongo kono pe openyo lapeny man ka onongo Lujudaya magi pe gubedo askari me ot pa Lubanga. Lakwan acel-li ye ni askari ma kicwalogi ka mako Yecu wiati-ni onongo bene gubedo askari me ot pa Lubanga. (Jon 7:32, 45, 46) Lacen kioro askari me ot pa Lubanga kacel ki ladit ma loyo wigi ka mako lukwena pa Yecu wek kikelgi i nyim Lukiko. Nen calo askari magi aye bene guywayo Paulo ki i ot pa Lubanga.​—Tic 4:1-3; 5:17-27; 21:27-30.