Lapeny pa Lukwan Bukkewa
Gin ango ma Baibul waco i kom kero pa Jehovah me ngeyo gin ma bitimme i anyim?
Baibul nyuto ka maleng ni Jehovah twero ngeyo gin ma bitimme i anyim. (Ic. 45:21) Baibul pe tittiwa jami ducu madok i kom kit ma en ngeyo kwede, awene ma en timo kwede meno, ki dong ngec marom mene ma en yero me ngeyone. Pi man, pe waniang jami ducu madok i kom kero pa Jehovah man. Ento, tye jami mogo manok ma waniang.
Jehovah twero timo gin mo keken ma en mito, ento i cawa mukene en yero pe me timo gin moni. Pi ryekone ma lapore pe, Jehovah twero ngeyo gin mo keken ma bitimme i anyim. (Rom. 11:33) Ento pien en ngeyo jukke kene, en twero yero pe me ngeyo gin ma bitimme i anyim.—Por ki Icaya 42:14.
Jehovah weko mitine timme. Meno kubbe nining ki kerone me ngeyo gin ma bitimme i anyim? Icaya 46:10 tito ni: ‘Cakke con i acakki piny, anyuto kit ma gin man bitimme kwede woko ki kit ma bigik kwede bene. Awaco ni gin ducu ma ayubo bicobbe, dok abitimo gin mo keken ma ayubbe me tiyone.’
Dong tyen lok acel mumiyo Jehovah twero ngeyo gin ma bitimme i anyim aye pien en tye ki teko me timo jami ducu. Pe mitte ni Jehovah onge gin ma bitimme i anyim kit ma wan watimo kwede ki pye anyim ci waneno agikki me filim moni. Me ka meno, Jehovah twero moko ni gin moni bitimme i kare moni kikome ci en miyo timme kit meno ka kare meno oo.—Nia 9:5, 6; Mat. 24:36; Tic 17:31.
Pi tyen lok man, Baibul tiyo ki lok calo “yubo,” me tito gin ma Jehovah timo madok i kom jami ma bitimme i anyim. (2 Luker 19:25; Ic. 46:11) Nyig lok man kigonyo ki i lok me leb Ibru ma te lokke tye ni “lacwe agulu.” (Jer. 18:4) Kit macalo lacwe agulu ma ladiro twero cweyo lobo agulu doko agulu mo maleng adada, Jehovah bene twero cweyo nyo yubo jami wek ocob mitine.—Ep. 1:11.
Jehovah woro twero pa dano me moko tamgi. En pe omoko woko con gin ma bitimme i kwo pa ngat acel acel; dok pe en aye miyo jo ma cwinygi atir gitimo jami ma biterogi i to. En weko dano ducu giyero kit ma gimito kwo kwede, ento en pwonyogi kit me kwo i yo ma atir.
Nen kong labol aryo. Labol mukwongo kwako jo me Nineve. Jehovah onongo otito con ni kibijwero boma man woko pi tim maraco pa jone. Ento i kare ma jone gungut i kom balgi, Jehovah “ojuko cwinye i kom gin marac ma onongo nene en owaco ni ebitimo i komgi, ci pe dong otiyo.” (Yon 3:1-10) Jehovah oloko tamme i kom gin ma en otito con pien jo Nineve gutiyo ki motgi me bedo agonya me loko kwogi i kare ma guwinyo kwena magwar ma Jehovah ocwalo botgi.
Labol me aryo obedo lok pa lanebi madok i kom laloc ma nyinge Ciro, ma kitito ni bigonyo Lujudaya ki i opii ci weko kigero ot pa Jehovah odoco. (Ic. 44:26–45:4) Kabaka Ciro me Percia ocobo lok pa lanebi meno. (Ejira 1:1-4) Ento, Ciro onongo pe obedo lawor Lubanga me ada. Jehovah otiyo ki Ciro me cobo lok pa lanebi man, ento en pe odiyo Ciro ni owor en.—Car. 21:1.
Ki lok ada, magi gubedo jami manok keken ma Jehovah tamo iye ka en mito ngeyo jami ma bitimme i anyim. Pe tye dano mo ma twero niang kwicikwici tam kacel ki tic pa Jehovah. (Ic. 55:8, 9) Ento, gin ma waniang i kom Jehovah jingo niyewa ni en kare ducu timo jami ma tye atir—kadi wa ka en tye ka tito jami ma bitimme i anyim.