Kit me Bedo ki Kuc Kadi Bed Lweny Tye
Gary macon onongo obedo lamony owaco ni, “Ma peya acako kwano Baibul, onongo pe angeyo pingo tim gero, ngolo kop alenga, kacel ki pekki onya i lobo. Ento i kare-ni, atye ki wic ma opye mot pien angeyo ni Lubanga Jehovah bikelo kuc i lobo.”
Tye jo mapol ma Baibul okonyogi calo Gary. Nen kong labol mogo.
BAIBUL WACO NI: “Ai Rwot, in iber dok iweko bal pa dano.”—Jabuli 86:5.
TYENG MAN KONYO NINING? William ma bedo i lobo Colombia owaco ni, “Tyeng man cuko cwinya ni Jehovah obedo Lubanga ma lakica. Angeyo ni en tye atera me timma kica pi jami ducu maraco ma atimo i kare ma onongo atye lamony.”
BAIBUL WACO NI: ‘Abiketo polo manyen ki lobo manyen; pe dong gibipo pi jami macon, pe bene dano mo bitamo pigi.’—Icaya 65:17.
TYENG MAN KONYO NINING? Sofia ma bedo i lobo Amerika owaco ni, “Atye ki two wic ma obino macalo adwogi pa jami mutimme i kwona i kare ma atye lamony. Ento tyeng ma malo-ni poyo wiya ni cokcok-ki Jehovah birwenyo tam maraco woko ki i wiya, dok pe abibedo ka leko lek maraco. Jehovah bijwayogi woko matwal. Man pud dong bibedo twon mot mamwonya ya!”
BAIBUL WACO NI: “Wek kit ma atir omedde ameda i kare me locce, dok kuc bene obed i lobone nakanaka nio wa i kare ma dwe dong bibedo pe.”—Jabuli 72:7.
TYENG MAN KONYO NINING? Sandra ma a ki i lobo Ukraine owaco ni, “Pol kare atamo i kom ginacoya man. Cokcok-ki, lweny kacel ki jami maraco ma lweny kelo bigik woko. Dok pe wabibedo ki par pi ber bedo pa jowa me amara.”
BAIBUL WACO NI: “Joni ma yam dong guto woko, pud dok gibibedo kwo. . . . Wun jo ma wubedo i apwa, wuco woko wek wuwer wer pi yomcwiny!”—Icaya 26:19.
TYENG MAN KONYO NINING? Marie ma bedo i lobo Rwanda owaco ni, “Pol pa jo me gangwa kinekogi i nek lumuku ma otime i kom kaka me Tutsi. Ento tyeng man cuko cwinya ni pud dok abinenogi odoco. Atye ka kuro ki miti madit me boko lok kacel kwedgi ki yomcwiny ka kicerogi!”
BAIBUL WACO NI: “Odong kare manok, ci dano marac dong bibedo pe matwal . . . Ento jo mamwol aye gibicamo lobo; gibibedo ki yomcwiny pi lonyo madwong ma gibilimo.”—Jabuli 37:10, 11.
TYENG MAN KONYO NINING? Daniel ma bedo i lobo Tajikistan otito ni, “Kadi bed lweny ogik i lobowa, ento ngolo kop alenga kacel ki lutim maraco pud gitye. Tyeng ma malo-ni okonya matek adada. Jehovah neno jami ducu dok niang kwo ma atye ka kato ki iye. En ocikke ni macok cok-ki, jami maraco birweny woko matwal dok wiwa pe bipo iye.”
Jo ma kiloko i komgi i magajin man gitye i kin Lucaden pa Jehovah milion mapol ma kwano Baibul okonyogi me bedo ki kuc i kwogi. Gupwonyo kit me jwayo cwiny me apokapoka me rangi del kom, kaka, kacel ki adegadega woko ki i kwogi. (Jo Epeco 4:31, 32) Lucaden pa Jehovah pe gicwako tung ka mo keken i lok me wibye dok pe ginywako i tim gero.—Jon 18:36.
Lucaden pa Jehovah bene gikonnye i kingi macalo jo me ot acel ma gimarre. (Jon 13:35) Me labolle, onongo mitte ni Sandra ma kiloko i kome con-ni oring i lobo mukene kacel ki laminne macalo adwogi me lweny. En owaco ni: “I kare ma wadonyo i lobo mukene, wanongo omege ki lumege mapol gitye ka kuro jolowa. Kony ma guminiwa oweko pe obedo tek tutwal me cako kwo macalo luring ayela.”
Wamito lwongi me ribbe kacel kwedwa i cokkewa. Ka ibino i cokkewa, ibipwonyo ki i Baibul kit me bedo ki kuc i kwoni. Cit i kabedowa me Intanet me jw.org/ach me nongo Ot me Ker macok kwedi nyo me penyo wek Lacaden pa Jehovah mo okwan kwedi Baibul me nono kun wutiyo ki buk me Bed ki Kwo Maber Nakanaka!