Pingo Nying Jehovah Pire Tek Adada bot Yecu?

1-2. (a) Gin ango ma Yecu otimo i dyerwor ma peya kineke? (b) Lapeny ango ma wabinyamogi i pwony man?

I OTYENO me Ceng Angwen i nino dwe 14 me Nican, i mwaka 33 K.M., Yecu okwero Cam me Otyeno pa Rwotwa kacel ki lukwenane ma lugen. En onongo ngeyo ni ma pe orii, Juda bidobe, kibitere marac, dok lumonene bineke woko. Pi meno, i nge tyeko camgi en owaco lok mapol me cuko cwiny lukwenane. Ma dong cawa oromo me a woko ki i ot meno, Yecu olego lega mo ma pire tek adada. Watwero kwano lega meno i Jon cura 17.

² I pwony man, wabinyamo jami ma watwero pwonyone ki i lega pa Yecu meno. Par ango ma Yecu onongo tye kwede ma peya oto? Gin ango ma onongo pire tek loyo bot Yecu i kare ma en tye i lobo kany? Kong dong wanyamu lagam pi lapeny magi.

“ATYEKO NYUTO NYINGI BOT JO MA CENG IMIYA”

3. Gin ango ma Yecu owaco madok i kom nying Lubanga dok meno tyen lokke ngo? (Jon 17:​6, 26)

³ I legane, Yecu owaco ni: “Atyeko nyuto nyingi bot jo ma ceng imiya.” Wangeyo ni nying Lubanga onongo pire tek adada bot Yecu pien en owaco lok man tyen aryo kulu. (Kwan Jon 17:​6, 26.) Pingo en onwoyo lok meno tyen aryo kulu? Tika Yecu onongo otittigi nying ma pe gingeyo? Lupwonnye pa Yecu onongo gubedo Lujudaya, pi meno onongo gingeyo ni nying Lubanga obedo Jehovah. Nying meno tye i ginacoya me leb Ibru [Cik Macon] tyen ma romo 7,000 kulu. Dong, i kare ma Yecu owaco ni “atyeko nyuto nyingi bot jo ma ceng imiya,” en onongo pe tye ka waco ni epwonyogi ni Lubanga nyinge Jehovah. Me ka meno, en onongo tye ka waco ni epwonyogi ngat ma Jehovah obedo. Yecu okonyo lupwonnyene me ngeyo Jehovah maber ma meno kwako ngeyo yub pa Jehovah pi lobo ki pi dano, jami ma Jehovah otyeko timone, jami ma en bitimone i anyim, kacel ki kite mamwonya mapatpat. Yecu keken aye ngeyo Jehovah maber adada.

4-5. (a) Nying ngat moni twero doko gin ma pire tek botwa nining? (b) Lupwonnye pa Yecu gungeyo Jehovah maber nining?

⁴ Me labolle, go kong ni laelda mo i kacokkewu ma nyinge Manuel tye daktar. Ingeyo omego meno pi mwaki mapol. Ento nino mo komi obedo lit adada dok kwoni onongo tye ka mading ma imito kony pa daktar. Kilari ki ot yat dok Omego Manuel aye obedo daktar ma olaro kwoni. Gin ma en otimo meno odongo marri pire, dok ka iwinyo nyinge, itamo pi gin maber ma en otimo piri. Kadi bed en pud tye laelda ma ingeyo-ni, ento Manuel nongo dong odoko daktar ma olaro kwoni.

⁵ I yo acel-lu, lupwonnye pa Yecu onongo dong gingeyo nying Lubanga. Nyinge meno odoko gin ma pire tek adada botgi pien Yecu okonyogi me ngeyo Jehovah maber. Pingo watwero wacone kit meno? Pien Yecu olubo kit pa Wonne kore ki kore i jami ducu ma en owaco dok otimo. Dong, i kare ma lupwonnyene guwinyo gin ma Yecu opwonyo dok guneno kit ma Yecu otero ki jo mukene, man oweko gungeyo Jehovah maber.—Jon 14:9; 17:3.

“AGWOKOGI I NYINGI MA IMIYA”

6. Tyen lok ango ma oweko Jehovah omiyo nyinge bot Yecu? (Jon 17:​11, 12)

⁶ I legane, Yecu olego pi lupwonnyene ni: “Agwokogi i nyingi ma imiya.” (Kwan Jon 17:​11, 12.) Tika man tyen lokke ni onongo kibilwongo Yecu ni Jehovah? Pe tye kit meno. Nen ni i lega pa Yecu, en owaco ni ‘agwokogi i nyingi.’ Pi meno nying Lubanga pe olokke odoko nying Yecu. Dong, gin ango ma Yecu onongo tye ka lok iye i kare ma owaco ni kimiye nying Lubanga? Mukwongo, Jehovah onongo ocwalo Yecu me lok Pire. En obino i nying Wonne dok otimo tango mapol i nying Jehovah. (Jon 5:43; 10:25) Me aryo, nying man ni Yecu gonye ni “Jehovah en Aye Lalar.” Dong, nying Jehovah maleng kubbe ki nying Wode, Yecu.

7. Pingo Yecu onongo twero lok i nying Jehovah? Mi labol.

⁷ Me konyowa niang pingo Yecu onongo twero lok i nying Jehovah, tam i kom lapor man. Laloc me lobo moni twero cwalo ngat mo me lok pire bot jo mukene. Dong, ka ngat meno tye ka lok, en loko ki twero marom ki pa laloc ma ocwale-ni. I yo acel-lu, Yecu obedo ki twero me lok pi Jehovah pien Jehovah kikome aye ma onongo ocwale.—Mat. 21:9; Luka 13:35.

8. Pingo Jehovah owaco ni nyinge “tye” i kom Yecu kadi wa i kare ma Yecu peya obino i lobo? (Nia 23:​20, 21)

⁸ I Baibul, kilwongo Yecu ni obedo “Lok” pien Jehovah otiyo kwede me waco ki lumalaika kacel ki dano gin ma Jehovah mito ni gunge dok gutim. (Jon 1:​1-3) Yecu aye nen calo obedo lamalaika ma Jehovah ocwalo me gwoko Luicrael i kare ma gitye ka a ki i Ejipt. Jehovah owaco ki Luicrael ni gubed luwiny bot lamalaika meno, ‘pien nyinge tye i kome.’a (Kwan Nia 23:​20, 21.) Jehovah oloko kit man pien Yecu loko pire dok en aye ngat acel ma nyuto ka maleng ni jami ducu ma Jehovah timo tye kakare dok ni En leng.

“ABANA, KET DEYO I KOM NYINGI”

9. Gin ango ma nyuto ni nying Lubanga onongo pire tek bot Yecu? Tit kong.

⁹ Kit ma pud waa ka nyamone-ni, nying Jehovah onongo pire tek adada bot Yecu kadi wa i kare ma en pud peya obino i lobo. I kare ma Yecu onongo tye i lobo, en onyuto ki i ticce ducu kit ma nying Jehovah pire tek kwede bote. I kare ma dong Yecu cok tyeko ticce me pwony i lobo, en olego ni: “Abana, ket deyo i kom nyingi.” Cutcut, Wonne ogamo ki dwon malongo ki i polo ni: “Dong aketo deyo i kome, dok abiketo aye.”—Jon 12:28.

10-11. (a) Yecu olonyo nying Jehovah nining? (Nen bene cal.) (b) Pingo mitte ni kilony nying Jehovah?

¹⁰ Yecu bene oketo deyo i kom nying Wonne. En otimo man nining? Yecu otimo man ki tito ki jo mukene kit mabeco ma Jehovah tye kwede kacel ki jami ma Jehovah otimo. Yecu bene otimo gin mukene me keto deyo i kom nying Wonne. Onongo mitte ni Yecu onyut ka maleng ni Jehovah timo jami ducu kakare dok Nyinge leng. Yecu onyuto ni man pire tek adada i kare ma opwonyo lulub kore ki kit me lega. En owaco ni guleg ni: “Wonwa ma tye i polo, giwor [kilony] nyingi maleng.”—Mat. 6:9.

¹¹ Pingo mitte ni kilony nying Jehovah? Pien Catan owaco lok goba i kom Lubanga Jehovah i poto me Eden. Catan owaco ni Jehovah lagoba dok tye ka kano jami mabeco ki bot Adam ki Kawa. (Acak. 3:​1-5) Lok pa Catan meno bene oweko onen calo kit ma Jehovah timo ki jami pe tye kakare. Pien Catan oloko lok goba i kom Jehovah, pol pa dano gitamo ni Jehovah obedo Lubanga marac. Lacen, i kare pa Yubu, Catan owaco ni gin ma pire tek bot dano ma oweko gitiyo pi Jehovah aye pien gimito gin mo ki Bote. Catan labal nying bene owaco ni dano pe gibimedde ki tic pi Jehovah ka gitye ka kato ki i kwo matek pien pe gimaro Jehovah kulu. (Yubu 1:​9-11; 2:4) Pi meno, kare onongo mitte me moko ka ce Jehovah aye lagoba nyo Catan.

“AMIYO KWONA”

12. Gin ango ma Yecu onongo tye atera me timone pi mar ma en tye kwede pi nying Lubanga?

¹² Yecu onongo tye atera me to wek enyut ni Jehovah timo jami i yo ma atir dok Nyinge leng.b (Jon 10:​17, 18) Adam ki Kawa ma onongo gipe ki roc gukwero bedo luwiny bot Jehovah ci gucako lubo kor Catan. Ki tungcel, Yecu bene onongo pe ki roc dok onongo tye atera me bino i lobo me nyuto ni emaro Jehovah. Yecu otimo meno ki bedo lawiny i jami ducu ma en otimo dok oloko. (Ibru 4:15; 5:​7-10) En ogwoko genene i kare me kwone ducu nio wa i kare ma en oto i kom yat. (Ibru 12:2) Timo meno oweko Yecu omoko mare matut pi Jehovah kacel ki Nyinge.

13. Pingo Yecu aye onongo obedo ngat mupore me nyuto ni Catan lagoba? (Nen bene cal.)

¹³ Jami ducu ma Yecu otimo, onyuto ka maleng ni Catan aye lagoba ento pe Jehovah! (Jon 8:44) Yecu ngeyo Jehovah maber adada loyo ngat mo keken ma okwo i polo nyo lobo. Ka onongo tye lok ada mo kadi matidi i kom lok ma Catan owaco i kom Jehovah, ci Yecu onongo twero ngeyone woko. Ento Yecu onongo tye atera me lonyo nying Wonne ma Catan obalo. Kadi wa i kare ma onongo nen calo Jehovah owekke woko, Yecu onongo tye atera me bedo lagen wa i to me ka loko ngeye bot Wonne ma lamar-ri.—Mat. 27:46.c

“DONG . . . ACOBO TIC MA CENG IMIYA ME ATIYA”

14. Mot ango ma Jehovah omiyo ki Yecu pi bedo lagen?

¹⁴ I lega ma Yecu olego i dyewor ma peya oto, en owaco ni: “Dong . . . acobo tic ma ceng imiya me atiya.” En onongo tye ki gen ni Jehovah bimine mot pi gwoko genene. (Jon 17:​4, 5) Dok gen ma Yecu oketo i kom Wonne pe opoto nono. Jehovah ocere. (Tic 2:​23, 24) Jehovah bene omine rwom madit ma kato ducu i polo. (Pil. 2:​8, 9) Lacen, Yecu ocako loc macalo Kabaka me Ker pa Lubanga. Gin ango ma Ker meno bicobone? Yecu omiyo lagam pi lapeny meno i kare ma en opwonyo lulub kore ki kit me lega. En owaco ni: “Ker meri obin; giti gin ma imito i lobo kit ma gitiyo i polo.”—Mat. 6:10.

15. Gin ango mukene ma Yecu bicobone?

¹⁵ Macok cok-ki, Yecu bioto lweny i kom lumone pa Lubanga ci bijwero jo maraco ducu i lweny me Armagedon. (Yabo 16:​14, 16; 19:​11-16) Ma pe orii i nge meno, Yecu bibolo Catan i “bur ma tere pe gik,” dok Catan pe bibedo ki kero me timo gin mo keken. (Yabo 20:​1-3) I nge meno, Yecu biloc pi mwaki alip acel, dok bikelo kuc i lobo kun konyo me kwanyo roc woko ki i kom dano. En bicero jo muto bene. Yecu biloko lobo ducu doko paradic odoco. En bicobo yub pa Jehovah ducu kore ki kore!—Yabo 21:​1-4.

16. Kwo bibedo nining i nge Loc me Mwaka Alip Acel pa Kricito?

¹⁶ Kwo bibedo nining i nge Loc me Mwaka Alip Acel pa Kricito? Bal kacel ki roc ma dano tye kwede nongo dong kijwayo woko. Pe bimitte ni dano guleg ni kitimigi kica pi balgi kun wok ki i ginkok. Dok wat i kin dano ki Jehovah pe bijenge i kom tic pa jo 144,000 macalo lulamdog nyo tic pa Yecu macalo Lalamdog Madit. Dok ‘Lakwor me agikki ma en aye to,’ nongo dong kityeko woko. Pi meno, bur lyel bidong nono dok dano ducu gibikwo pi naka labongo roc i lobo kany.—1 Kor. 15:​25, 26.

17-18. (a) Gin ango ma bitimme i agikki me Loc me Mwaka Alip Acel pa Kricito? (b) Gin ango ma Yecu bitimone ka otyeko locce? (1 Jo Korint 15:​24, 28) (Nen bene cal.)

¹⁷ Gin ango mukene ma bitimme i kare me agikki me Loc me Mwaka Alip Acel pa Kricito? I kare meno, gin mo mamwonya ma kite dok pat bitimme. Pe tye ngat mo ma bibedo ki akalakala ni Lubanga Jehovah leng dok ngolo kop atir. Pingo? I poto me Eden, Catan obalo nying Lubanga ni Jehovah obedo lagoba dok ni En pe loyo locce ki mar. Cakke i kare meno me o i agikki me loc pa Kricito, nongo lutic pa Jehovah ducu gumoko ka maleng ni yo me loc pa Jehovah aye ber loyo. Dok i agikki me Loc me Mwaka Alip Acel pa Kricito nongo dong kilonyo nying Jehovah woko kwicikwici. Jehovah bene nongo omoko ka maleng ni ebedo Wego ma lamar.

¹⁸ I nge loc pa Kricito, dano ducu bingeyo ni adot ma Catan okelo i kom Jehovah obedo goba. Gin ango ma Yecu bitimone i agikki me locce? Tika en bitimo gin ma Catan otimo ki jemo i kom Jehovah? Gin ma kit meno pe bitimme kulu! (Kwan 1 Jo Korint 15:​24, 28.) Yecu bidwoko Ker i cing Wonne. En bene bimine i te loc pa Jehovah. Yecu tye atera me jalo twerone me loc i cing Jehovah pi mar ma en tye kwede pi Wonne.

19. Nying Jehovah onongo pire tek lakwene bot Yecu?

¹⁹ Nen ka maleng ni pi mar matek ma Yecu tye kwede pi Jehovah oweko Jehovah omiyo nyinge ki Yecu! Yecu oloko dok otimo jami ducu labongo roc mo me nyuto ni ecung pi nying Lubanga. Dong, nying Jehovah onongo pire tek lakwene bot Yecu? Pire onongo tek loyo gin mo keken. Man oweko en onongo tye atera me to pi nying meno, dok en bibedo atera me dwoko jami ducu i cing Jehovah i agikki me Locce me Mwaka alip Acel. Dong, wan watwero lubo lanen pa Yecu nining? Wabinyamo lagam pi lapeny meno i pwony ma lubo man.