Lapeny pa Lukwan Bukkewa

Ngat ma ocoyo Carolok 30:​18, 19 owaco ni “kit ma laco gin ki nyako gibedo kwede” weko ‘ebedo ki ur madit.’ Gin ango ma onongo en tye ka lok iye?

Jo mapol gibedo ka pennye kekengi i kom tyen lok me tyeng magi, kadi wa jo ma gukwano Baibul i yo matut. Tyeng magi kwanne ni: “Tye jami angwen ma abedo ki ur madit i komgi; dok pe aniang kitgi, gin ene: Kit ma ocur tuk kwede ki i polo, kit ma twol mol kwede ki i kom got, kit ma mel woto kwede i dye nam madit, ki kit ma laco gin ki nyako gibedo kwede.”—Car. 30:​18, 19.

Onongo yam watamo ni lok man ni, “kit ma laco gin ki nyako gibedo kwede” tye ka lok i kom gin mo marac. Pingo? Tyeng mukene i cura meno giloko i kom jami maraco ma pe giwaco ni “oromo.” (Car. 30:​15, 16) Dok tyeng me 20 loko i kom “dako ma lakwele” ma waco ni pe etimo gin mo marac. Pi meno, onongo watamo ni tyeng man tye ka lok i kom jami ma timme labongo weko lanyut mo i korgi. Onongo watamo ni kit macalo ocur tuk kwede ki i polo, twol mol kwede i kom got, nyo kit ma mel woto kwede i dye nam madit, laco bene twero timo bal labongo ngat mo ngeyo gin ma en otimo. Dong onongo watamo ni, “kit ma laco gin ki nyako gibedo kwede” tye ka lok i kom gin mo marac, dok ni tye ka lok i kom kit ma awobi bito kwede anyaka me buto kwede.

Ento nen calo watye ki tyen lok mumiyo waromo ye ni tyeng magi tye ka lok i kom gin maber. Lacoc man onongo tye mere ka tito jami ma weko ebedo ki ur.

Coc mogo macon me leb Ibru bene nyuto ni tyeng man tye ka lok i kom gin maber. Ma lubbe ki buk mo ma tito lok i kom Cik Macon, nyig lok me leb Ibru ma kigonyo ni “abedo ki ur madit i komgi” i Carolok 30:18 “loko i kom gin mo ma tye me ur nyo ma ye iye tek.”

Profesa Crawford H. Toy ma pwonyo i Harvard University i lobo Amerika bene omoko ni tyeng me Baibul man pe tye ka lok i kom gin mo marac. En otito ni: “Lacoc man onongo tye ka tito kit ma jami magi tye me aura kwede.”

Dong pore me ye ni lok ma kicoyo i Carolok 30:​18, 19 tye ka lok i kom jami me aura adada ma niang iye tek. Calo laco Baibul man, watye ki ur i kom kit ma ocur tuk kwede malo, kit ma twol mol kwede oyotoyot i kom got kadi bed tyene pe, kit ma mel madit woto kwede i dye nam, ki dong kit ma awobi ki anyaka gicako marre kwede ci gibedo ki yomcwiny pi kwogi ducu