Tika Mitte ni Ajuk Dwoyo Mutoka Woko?

Tika in bene itye ka kato ki i gin macalo meno? Ka tye kit meno, gin ango ma twero konyi me moko tammi ka ce ibimedde ki dwoyo mutoka nyo pe?

I lobe mukene, ludwo mutoka ma dong guteggi mitte ni gunong waraga ki bot daktar ma minigi twero me medde ki dwoyo mutoka. Lukricitayo ma gikwo i lobe magi gitute matek me lubo cik kacel ki tira ma gamentegi omiyo. (Rom. 13:1) Ento kadi bed cik ma kit meno pe tye i lobowu, tye yo mogo ma itwero niang kwede ka pud itye ki kero me medde ki dwoyo mutoka maber.

TEM NGIYO KIT MA IDWOYO KWEDE MUTOKA

Dul mo acel i lobo Amerika ma neno lok i kom jo muteggi omiyo tam mogo ma twero konyi kun bene ipennye kekeni ki lapeny macalo magi:

• Tika anongo ni tek me neno lanyut ducu ma kiketogi i yo dok tika anongo tek me neno piny i dyewor?

• Tika pud atye ki kero me lokke ka neno maraya mutoka kacel ki gin ma bino i ngeya?

• Tika dong anongo ni tek me loko tyena oyotoyot ka nyono burek?

• Tika adwoyo mutoka mot ma miyo agalo jo ma i ngeya ki dwoyo mutokagi?

• Tika macok cok-ki aloyo nongo awano me gudi nyo tika mutokana kome ojwane pien agoyo gin mo i teng gudi?

• Tika dong abili ojuka pi kit ma adwoyo kwede mutoka?

• Tika dong nino okwalo wanga i cawa ma atye ka dwoyo mutoka?

• Tika atye ka tic ki yat mo ma twero balo dwoyo mutokana?

• Tika dong jo ganga nyo lurema guwacca ni gitye ki lworo pi kit ma adwoyo kwede mutoka?

Ka lagammi pi lapeny acel mo i kin magi tye ni eyo, ci bimitte ni itim alokaloka dok ingi kit ma idwoyo kwede ki mutoka. Me labolle, itwero moko tammi pe me dwoyo mutoka teretere, tutwalle i dyewor. Pol kare, bed ka ngine kekeni pi kit ma idwoyo kwede mutoka. Itwero penyo jo gangwu nyo laremi mo me titti kong kit ma in idwoyo kwede mutoka. Itwero bene cito ka kwan me medo ngecci i kom kit me dwoyo mutoka maber. Ento ka ce inen lagammi tye ni eyo pi pol pa lapeny ma malo-ni, ci bimitte ni ijuk dwoyo mutoka woko pi ber bedoni.a

CIK MA IGI LAC ME BAIBUL TWERO KONYI NINING ME MOKO TAM MA ATIR?

Twero bedo tek me neno ni dong pe idwoyo mutoka maber kit ma con. Dok moko tam me juko dwoyo mutoka twero bedo gin matek adada boti. Dong, Baibul twero konyi nining me bedo ki neno ma atir ka itye ka moko tam? Tam kong i kom pwony aryo magi.

Medde ki bedo ngat ma mwol. (Car. 11:2) Ka wawoto ki teggi, wangwa, itwa, ki dong kit ma ler komwa tiyo kwede doko goro adada. Me labolle, pol pa lutuko gijuko tuko mogo woko ka giwoto ki teggi pien giniang ni twero bedo yot pigi me nongo awano. Tira ma kit meno bene twero tic kadi wa i dwoyo mutoka. I nge kare mo, twero mitte ni ngat mamwol ojuk dwoyo mutoka woko pi ber bedone. (Car. 22:3) Dok ngat mamwol bedo atera me winyo lok pa jo mukene ka gitye ka tito pargi pi kit ma edwoyo kwede mutoka.—Por ki 2 Camuel 21:​15-17.

Gwokke ki bal me oyo remo. (Nwo. 22:8) Ka ce ngat mo pe tiyo ki mutoka i yo maber, man twero kelo awano nyo rwenyo kwo pa dano. Ngat ma medde ki dwoyo mutoka kun nongo ngec me dwoyo mutokane dong odok woko piny, nongo tye ka keto kwone kacel ki kwo pa jo mukene ka mading. Dok bene ngat meno twero tingo alii me ony pa remo i wiye ka ce en onongo awano me gudi.

Pe ibed ki tam ni jo mukene pe dong gibiwori pien imoko tammi me juko dwoyo mutoka woko. Jehovah marri dok cwinye bedo yom ka ingeyo ka ma keroni gik iye, ibedo ngat mamwol dok iparo pi ber bedo pa jo mukene. Dok en ocikke me cuko cwinyi kacel ki gwoki. (Ic. 46:4) En pe biweki matwal. Dong peny Jehovah me konyi ki ryeko kacel ki niang matut ka itye ka moko tammi me juko dwoyo mutoka.