MEDDE KI KIYU PINY!
Tim me Nek ki Muduku Onya i Wi Lobo Ducu—Gin Ango ma Baibul Waco?
Nek ki muduku otimme madwong adada i twok lobo ducu i Julai 2022:
“Nek pa lacungo wibye mo ma ngene adada i Japan [Prime Minister macon ma nyinge Shinzo Abe] ocwero cwiny jo me Japan adada dok oonyo koyo i kom dano ma i twok lobo lung tutwalle pien tim aranyi nok i Japan dok gitye ki cik matek adada ma kwako tic ki muduku.”—Julai 10, 2022, The Japan Times.
“Jo ma i lobo Denmark wigi ocung adada i kare ma laco mo ma tye ki muduku oneko jo adek i dukan mo madit i Copenhagen.”—Julai 4, 2022, Reuters.
“I lobo South Africa: Dano 15 guto i kare ma gurup pa co mogo ma gitye ki muduku gucako bayo ricac ata i bar mo i taun me Soweto.”—Julai 10, 2022, The Guardian.
“Kineko dano makato 220 kulu ki muduku i lobo Amerika i Julai 4.”—Julai 5, 2022, CBS News.
Tika gen mo tye ni tim gero ma kit meno bigik? Baibul kono waco gin ango?
Agikki me Tim Gero
Baibul lwongo kare ma watye ka kwo iye-ni ni “kare me agikki,” kare ma dano gibibedo jo mager, lubwami dok ma pe giparo pi luwotgi. (2 Temceo 3:1, 3) Tim gero ma kit meno weko dano gibedo ki lworo. (Luka 21:11) Kadi bed kit meno, Baibul waco ni cokcok-ki tim gero bibedo pe dok dano ‘gibibedo i kabedo me kuc, ka ma ayela mo pe iye, kabedo maber ka ma piny opye mot.’ (Icaya 32:18) Tim gero bigik nining?
Lubanga bijwero lutim maraco dok bibalo jami lweny ducu.
“Jo maraco gibityekogi woko ki i lobo.”—Carolok 2:22.
‘Lubanga bijuko lweny woko ki i wi lobo ducu; bituro atum, binginyo wa tong woko, dok biwango kwot woko liweng ki mac.’—Jabuli 46:9.
Lubanga bipwonyo dano me bedo ki kuc, dok i yo man, en bigiko tim gero woko.
“Tim mo marac me nek nyo me keto ret i kom dano, pe binen i wi gotta maleng, pien lobo ducu bipong ki ngec pa Rwot, macalo pii ma pong i nam.”—Icaya 11:9.
Kadi wa i kare-ni, Lubanga tye ka pwonyo dano ma i wi lobo ducu me giko tim gero ki dong tic ki jami lweny, en tye ka pwonyogi me ‘teto pala lucwangi wek odok lak kweri dyang, ki tongigi wek odok pala me ngolo jang olok.’—Mika 4:3.
Me pwonyo jami mapol i kom cikke me Baibul pi lobo ma lworo pe iye, kwan pwony ma wiye tye ni “Tika Twere me Bedo Labongo Lworo?”
Me pwonyo kit ma kibigiko kwede tim gero matwal, kwan pwony ma wiye tye ni “Kuc Bibedo i Wi Lobo Ducu!”