Bal Obedo Gin Ango?
Lagam ma Baibul miyo
Bal obedo tim nyo tam mo keken ma pe rwatte ki miti pa Lubanga. Man kwako turo cik pa Lubanga ki timo jami maraco nyo jami ma pe atir, i wang Lubanga. (1 Jon 3:4; 5:17) Baibul bene waco ni obedo bal ka pe watimo gin matir.—Yakobo 4:17.
I leb ma kikwongo tic kwede me coyo Baibul, lok man ni bal tyen lokke ni “keng celo gin moni nitap.” Me labolle, lumony mogo me Icrael onongo gitye ludiro adada ka odok i kom bayo lagweng ma ‘pe gikeng celo gin moni nitap.’ Lok meno, ka ni kigony atir atir tyen lokke ni ‘pe gibalo.’ (Lungolkop 20:16) Pi meno, timo bal te lokke ni keng timo miti pa Lubanga.
Macalo Lacwec, Lubanga tye ki twero me miyo cik bot dano. (Niyabo 4:11) Wan ducu ki acel acel wabigamo dog Lubanga pi gin ma watimo.—Jo Roma 14:12.
Tika twere pe me timo kadi wa bal acel?
Ku. Baibul waco ni “dano ducu gubalo, pe gio i kom deyo pa Lubanga.” (Jo Roma 3:23; 1 Luker 8:46; Latitlok 7:20; 1 Jon 1:8) Pingo tye kumeno?
Laco ki dako mukwongo, Adam ki Kawa, onongo gipe ki bal i acakkine. Meno obedo pienni kicweyogi labongo roc, i cal pa Lubanga. (Acakki 1:27) Ento, gurwenyo motgi me bedo labongo roc pien gukwero winyo dog Lubanga. (Acakki 3:5, 6, 17-19) I kare ma gunywalo lutino, gukobo bal kacel ki roc i komgi. (Jo Roma 5:12) Pi tyen lok man, Kabaka Daudi owaco ni, “Abedo labalo cakke i kare ma kinywala.”—Jabuli 51:5.
Tika bal mogo rac loyo mukene?
Ee. Me labolle, Baibul wacci co me Codom onongo “jo maraco” dok ‘balgi onongo dwong tutwal.’ (Acakki 13:13; 18:20) Nen kong jami adek ma weko bal moni bedo rac loyo mukene.
Ditte. Baibul cikowa me gwokke ki bal mogo madongo calo tim tarwang, woro gin mo nyo ngat mo mapat ki Jehovah, kwalo kwo, mero kongo, yako dano, neko nek, ki dong tim jokjok. (1 Jo Korint 6:9-11; Niyabo 21:8) Baibul poro bal magi ki bal ma nongo pe kitimo akaka, me labolle, lok nyo tim mogo ma cwero cwiny jo mukene. (Carolok 12:18; Jo Epeco 4:31, 32) Kadi bed kumeno, Baibul cuko cwinywa pe me tero bal mo keken tuko tuko, pien twero terowa me timo bal madongo i nyim Lubanga.—Matayo 5:27, 28.
Pingo kitimo. Jo mogo gitimo bal pien pe gingeyo cik pa Lubanga. (Tic pa Lukwena 17:30; 1 Temceo 1:13) Kadi bed Baibul pe cayo bal magi, ento nyuto ni dok gipat ki bal me turo cik pa Lubanga akaka. (Wel 15:30, 31) Bal ma kitimo akaka nyuto ni ngat moni ‘kite rac.’—Jeremia 16:12.
Tyen adi ma kitimo. Baibul bene nyuto ni apokapoka tye i kin timo bal kicel keken ki dong timo bal pi kare malac. (1 Jon 3:4-8, NWT) Jo ma gitimo “bal akaka” kadi bed gupwonyo kit me timo gin matir, Lubanga bingolo kop i wigi.—Jo Ibru 10:26, 27.
Jo ma gutimo bal madongo cwinygi twero tur adada pi gin ma gutimo. Me labolle, Kabaka Daudi ocoyo ni: “Balla dong oketo koma woko; gipek calo yec ma pe aromo tingone.” (Jabuli 38:4) Ento, Baibul miyo gen man: “Latim marac myero obwot timme marac, ki dano ma pe kite atir bene owek tamme ma pe ber-ri; olokke odwog cen bot Rwot, wek Rwot otimme kica, myero odwog cen bot Lubangawa, pien en biweko balle woko ducu.”—Icaya 55:7.