Ododo 27

Kabaka Marac Loyo Ejipt

CO MAGI gitye ka diyo dano adiya ki tek ka tic. Nen kong laco ma tye ka goyo latic moni ki anino-ni! Lutic-ci gubedo jo me ot pa Yakobo, dok kilwongogi ni jo Icrael. Co ma tye ka diyogi me tic-ci obedo jo Ejipt. Jo Icrael gudoko opii pa jo Ejipt. Man otimme nining?

Jo ot pa Yakobo gukwo ki kuc i Ejipt pi mwaka mapol. Yucepu, dano ma rwomme lubo pa Parao kabaka me Ejipt, aye obedo ka gwokogi. Ento Yucepu oto woko. Ci Parao manyen ma onongo pe maro jo Icrael, odoko kabaka i Ejipt.

Pi meno Parao marac-ci omiyo jo Icrael gudoko opii. Dok en oketo co mogo ma kitgi raco dok ma giger me loyogi. Gin gudiyo jo Icrael me tic matek i yubo boma mapol pi Parao. Ento wel jo Icrael pud omedde ameda. I nge kare mo manok jo Ejipt gucako bedo ki lworo ni jo Icrael bidoko dwong dok gibidoko matek tutwal.

In ingeyo gin ma Parao otimo? En oloko ki mon ma gikonyo megi lutino me Icrael ka gitye ka nywalo lutinogi, kun waco ni: ‘Wun omyero wunek latin laco mo keken ma kinywalo.’ Ento mon magi onongo mon ma kitgi beco, dok onongo pe gineko lutino matino.

Pi meno Parao omiyo cik man bot jone ducu ni: ‘Wukwany lutino co lukere pa jo Icrael ci wunekgi woko. Lutino lukere ma anyira keken aye wuwek gubed makwo.’ Pe bedo gin marac tutwal me miyo cik ma kit meno? Wanenu kong kit ma kilaro kwede latin laco lakere mo acel.

Nia 1:6-22.