Moses Oyero me Woro Jehovah

I lobo Ejipt, jo me ot pa Yakobo onongo kilwongogi ni jo Icrael. I kare ma Yakobo gin ki Yucepu dong guto woko, Parao mo manyen ocako loc. En obedo ki lworo ni jo Icrael gitye ka doko tek kato jo Ejipt woko. Pi meno, Parao man oweko jo Icrael gudoko opii. En odiyogi ki tek me goyo matafali ki me tic matek i poti. Ento kadi bed jo Ejipt gubedo ka diyogi matek, jo Icrael gunya gumedde ameda. Man pe oyomo cwiny Parao, pi meno, en omiyo cik ni myero kinek lutino awobe ducu ma pud kinywalogi anywala ma gin jo Icrael. Tam kong lworo ma omako jo Icrael.

Dako mo me Icrael ma nyinge Yokobedi onongo tye ki latin awobi ma mwonya mada. Me gwoko wode, en opyele i aduku ci okane i dye lum maboco ma i nget Kulu Nail. Miriam, ma lamin latin-ni, obedo cok kenyu me neno gin ma bitimme i kome.

Nya pa Parao obino ka lwok i kulu ci oneno aduku mo. Ka oelo wiye ci onongo iye latin ma tye ka koko, mumiyo kica omake i kome. Miriam openye ni: ‘Acit alwong lapidi mo ma twero gwoko latin man piri?’ I kare ma nya pa Parao oye, Miriam olwongo minne, Yokobedi. Nya pa Parao owaco bote ni: ‘Cit ki latin man icipitta, an biculli mucarani.’

I kare ma latin odongo odoko dit, Yokobedi okelle bot nya pa Parao ma ocako nyinge ni Moses ci opite macalo wode kikome. Moses odongo macalo latin ker dok en onongo twero bedo ki jami ducu ma cwinye mito. Ento wi Moses pe owil i kom Jehovah. En onongo ngeyo ni ebedo Laicrael ento pe Laejipt. En omoko tamme me woro Jehovah.

Ma dong tye ki mwaka 40, Moses ocako konyo jo tugi. I kare ma oneno Laejipt mo tye ka goyo opii ma obedo Laicrael, Moses ogoyo Laejipt meno matek adada ci oneke woko. Moses okano kome woko i kweyo. I kare ma Parao oniang pi nek meno, en otemo neko Moses woko. Ento Moses oringo olwi woko wa i lobo Midian. Jehovah ogwoke ki kunnu.