Ododo 39

Odoo pa Aron Olot Ature

NEN ature ki nyig yat almond mucek ma tye ka dongo i kom odoo nyo, lut-ti. Man aye odoo pa Aron. Ature magi ki nyig yat mucek-ki gulot i kom odoo pa Aron i dyewor acel keken! Wanenu kong pingo.

Luicrael onongo dong gulak i dye tim pi kare mo. Jo mogo onongo gitamo ni Moses aye omyero pe obed latela, nyo ni Aron aye omyero pe obed lalam dog madit. Kora aye ngat acel ma onongo tamo kit meno, kadi wa Datan, Abiram kacel ki jo 250 ma gitelo lwak bene onongo gitamo kumeno. Jo magi ducu gubino ci guwaco bot Moses ni: ‘Pingo kara ikette keni me loyo wan ducu?’

Moses owaco bot Kora ki jo ma lube ni: ‘Diki odiko wukwany atabo me mako mac ci wuket odok eceta i igi. Ci wubin i kema pa Jehovah. Wabineno ngat ma Jehovah biyero.’

Orwone Kora ki jo 250 ma gilubbe gubino i kema. Jo mukene mapol gubino me cwako co magi. Kiniga omako Jehovah tutwal. Moses owaco ni: ‘Wua woko ki i nget kema pa co magi maraco-ni. Pe wugud gin mo ma megi.’ Lwak guwinyo, ci gua woko ki i nget kema pa Kora, Datan ki Abiram.

I ngeye Moses owaco ni: ‘Man bimiyo wungeyo ngat ma Jehovah oyero. Ngom biyabbe ci mwonyo co magi maraco-ni ducu.’

Tekki Moses giko lok, ngom otugi yabbe cut. Kema pa Kora ki jamine kacel ki Datan ki Abiram kacel ki jo ma gitye kwedgi gulwiny piny, ci ngom oumo wigi woko. Ka lwak guwinyo koko pa jo ma gitye ka lwiny i ngom, ci gudange ni: ‘Ngwecu! Ngom romo mwonyo wan bene!’

Kora ki jone 250 ca onongo pud gitye i nget kema me woro-ni. Pi meno Jehovah ocwalo mac, ci gin ducu guwang woko. I ngeye Jehovah owaco ki Eleajar wod pa Aron me kwanyo atabo me mako mac pa co ma guto ca ki me yubo kwede gin ma apada me umo wi keno tyer. Gin me umo keno tyer man bibedo me poyo wi jo Icrael ni pe tye ngat mo mapat ki Aron ki awobene ma bitic calo lulam dog pi Jehovah.

Ento Jehovah mito ni ongene woko ka maleng ni Aron ki awobene aye eyero me bedo lulam dog. Pi meno en owaco bot Moses ni: ‘Wek latel wi kaka acel acel me Icrael okel odoone. Pi kaka pa Levi, wek Aron okel odoone. Ci ket odoo magi ducu i Kema me woro i nyim canduk me gicikke. Odoo pa ngat ma ayero me bedo lalam dog ature bidongo iye.’

Orwone odiko ka Moses oneno, ee,odoo pa Aron tye ki ature magi dok nyig almond mucek tye odongo iye! Iniang dong pingo Jehovah omiyo odoo pa Aron olot ature?

Wel 16:1-49; 17:1-11; 26:10.