Gujemo i kom Jehovah

I nge kare mo ma onongo jo Icrael pud gitye i tim, Kora, Datan, Abiram, ki jo 250 mukene gujemo i kom Moses. Gin guwacce ni: ‘Mewu dong okato kare woko! Pingo myero ibed latelawa, ki Aron obed lalamdogwa? Jehovah tye kwedwa ducu, ento pe tye boti ki Aron keken.’ Jehovah cwinye pe obedo yom. En oneno calo joni gitye ka jemo i kome!

Moses owaco bot Kora ki jo ma cwake ni: ‘Diki wubin i kema me woro, dok wukel lawang odok eceta. Jehovah binyuto ngat ma en oyero.’

Orwone, Kora ki jo 250 magi gucito ka rwatte ki Moses i kema me woro. Gucako wango odok eceta calo gitye lulamdog. Jehovah owaco bot Moses ki Aron ni: ‘Wua wupokke woko ki i nget Kora ki jone.’

Kadi bed Kora ocito bot Moses i kema me woro, Datan, Abiram, ki jo me odigi gukwero cito woko. Jehovah owaco bot jo Icrael ni gupokke woko ki i nget kema pa Kora, Datan ki Abiram. Cutcut, jo Icrael gua woko. Datan, Abiram, ki lupacogi gucung i nget kemagi. Ci lobo otugi ngamo doge omwonyogi woko! I kema me woro, mac oa ki i polo ci owango Kora ki jone 250.

I ngeye, Jehovah owaco bot Moses ni: ‘Gam odoo ki bot latela me kaka acel acel, ci ico nyinge i kome. Ento, pi kaka pa Levi, co nying Aron iye. Ketgi i kema me woro, ci odoo pa dano ma abiyero en aye bilot.’

Orwone, Moses okelo odoo magi ducu ci onyutogi bot lutela kaka. Odoo pa Aron aye olot ature dok onyako nyig yaa mucek. Man aye kit ma Jehovah omoko kwede ni eyero Aron me bedo lalamdog madit.