Ododo 41

Twol me Mola

MENO mono nen calo twol kikome ma kingabo i kom tal? Pe gire. Twol-li kiyubo ki mola. Jehovah owaco ki Moses ni oket i kom tal malo wek dano gunen ci gubed kwo. Ento mukene ma i ngom-mi gubedo twol kikome. Gutongo dano oweko komgi odoko malit. In ingeyo pingo?

Pien Luicrael guloko marac i kom Lubanga wa i kom Moses. Gin gungur kun giwaco ni: ‘Pingo ikelowa ki i Ejipt me to i dye tim kany? Cam nyo pii mo pe kany. Dok pe dong watwero kanyo camo manna-ni.’

Ento manna gire obedo cam maber. Me miyone botgi Jehovah otimo tango. En otimo tango me miyogi pii bene. Ento lwak pe gupwoyo kit yo ma Lubanga ogwokogi kwede. Pi meno Jehovah ocwalo twol magi ma tye ki kwir me pwodo Luicrael. Twol magi otongogi, ci jo mapol i kin-gi guto.

Lacen lwak gubino bot Moses ci guwaco ni: ‘Wan wabalo, pien waloko lok marac i kom Jehovah ki i komi. Kombeddi leg dong bot Jehovah wek okwany twol magi woko.’

Pi meno Moses olego pi lwak. Ci Jehovah owaco bot Moses me yubo twol mola man. En owaco ni kingab i kom tal, dok ni ngat ma twol otongo myero onen. Moses otimo gin ma Lubanga owaco-ni kikome. Dok jo ma twol otongogi ka guneno ci komgi doko mayot odoco.

Watwero nongo pwony ki i gin man. I yo mo, wan ducu wa cal ki Luicrael ma twol otongogi ca. Wan ducu wato woko. Nen i kabedo ducu, ci inongo ni dano giti, gitwo, dok gito woko. Man pien laco ki dako mukwongo, Adam gin ki Kawa, guweko Jehovah woko, dok wan ducu lutinogi. Ento Jehovah oyubo yo ma weko watwero bedo kwo nakanaka.

Jehovah ocwalo Wode, Yecu Kricito, i lobo. Yecu kingabo i kom yat, pien jo mapol onongo gitamo ni en kite rac. Ento Jehovah omiyo Yecu me larowa. Ka waneno en, ka walubo en, ci watwero bedo kwo nakanaka. Ento wabikwano jami makato man lacen.

Wel 21:4-9; Jon 3:14, 15.