Pwony me 14

Kit ma Lucaden pa Jehovah Gitye Guyubbe Kwede

Awene ma Lucaden pa Jehovah ocako kwede tic-gi me komkare-ni? (1)

Kit yo ango ma cokke pa Lucaden pa Jehovah gitelo kwede? (2)

Jami ma mito cente kono kityeko nining? (3)

Ngagi ma telo wi kacokke acel acel? (4)

Coke madongo ango ma gitimo mwaka ki mwaka? (5)

Tic ango ma gitimo i gang kal-gi madit ki jange mapolli? (6)

1. Lucaden pa Jehovah me komkareni gucake i mwaka 1870 ki wiye. I acakki, onongo kilwongogi ni Lutino kwan me Baibul. Ento i mwaka 1931 gunongo nying ma oa ki i Ginacoya ni Lucaden pa Jehovah. (Icaya 43:10) A ki i cakke ma tidi dul pa Lucaden odongo ma welgi dong milion mapol, ma guketo komgi i tuco jiri i lobbe makato 230.

2. Pol kacokke pa Lucaden pa Jehovah bedo ki cokke tyen kidek i cabit acel acel. In bene kilwongi me bedo i mo i kin-gi-ni. (Jo Ibru 10:24, 25) Baibul aye obedo ka ma gin ma kipwonyo a iye. Cokke ducu kiyabo dok kiloro ki lega. “Wer me cwiny” ma iwinyo i cwinyi bene kiwero i pol cokke. (Jo Epeco 5:18, 19) Donyo tye nono, ki pe kijogo ajog.—Matayo 10:8.

3. Pol kacokke bedo ki cokke i Ot me Ker. Magi pol kare obedo ot ma yubbo yot ma Lucaden ma gudyere gero. Pe ibineno kit cal apaya, cal pa [Yecu] ma tye i yatariya, nyo jami calo magi i Ot me Ker. Jami ma mito cente kiculo pirgi ki mot ma nongo dic pe iye. Pi jo ma paro ni gimi mot, canduk me mot tye.—2 Jo Korint 9:7.

4. I kacokke acel acel, nongo tye ludongo, nyo lunen wi tic. Gin telo kacokke i pwony. (1 Temceo 3:1-7; 5:17) Lukony tic konyo korgi. (1 Temceo 3:8-10, 12, 13) Gin joni pe dok ki-ilogi i wi jo mukene me kacokke-ni. (2 Jo Korint 1:24) Pe giminigi nying dog tic ma dok pokogi. (Matayo 23:8-10) Pe dok girukke mapat ki jo mukene-ni. Pe bene kiculogi pi ticgi. Ludongo-ni neno pi miti me cwiny pa kacokke ki cwinygi ken-gi. Gin twero miyo kwe-cwiny ki nyuto gin me atima i kare me peko.—Yakobo 5:14-16; 1 Petero 5:2, 3.

5. Lucaden pa Jehovah bene bedo ki cokke nyo gurre madongo mwaka ki mwaka. I kare meno kacokke mapol bino kacel pi yub ma nongo kiryeyo me pwony me Baibul ma dok pat. Batija pa lupwonye manyen obedo but yub i kin mukene ma nongo kiryeyo ma bedo kare ki kare i cokke madongo nyo gurre madongo acel acel.—Matayo 3:13-17; 28:19, 20.

6. Gang kal pa Lucaden pa Jehovah madit maloyo i wi lobo tye i New York. Kunu tye iye Lukiko Madit, pen dul pa ludongo ma tye ki ngec pi kare malac ma neno wi kacokke me wi lobo-ni ducu. Gang kal madit man bene tye ki jange makato 100 i wi lobo. I kabedo magi, jo ma odyere konyo goyo ki cwalo buke me kwano Baibul. Tela bene kimiyo me yubo tic me tuco jiri. Pingo pe iyubbe me limo jang gang kal macok kwedi?