Pingo Lubanga Tye ki Dul ma Mege?

1. Pingo Lubanga oketo yub pi jo Icrael me kare macon?

Lubanga oketo yub pi likwayo pa Abraim wek gudok rok ci omiyo botgi cik mapol. En olwongo rok meno ni “Icrael” ci omiyo gudoko jo ma gidoro woro me ada dok gigwoko lokke. (Jabuli 147:19, 20) Pi meno, rok ducu onongo gitwero limo mot ki bot jo Icrael.​—Kwan Acakki 22:18.

Lubanga oyero jo Icrael ni gubed cadenne. Jami ma otimme i tekwarogi nyuto ka maleng ni lubo cik pa Lubanga kelo adwogi maber i kwo pa dano. (Nwoyo Cik 4:6) Pi meno, jo mukene onongo gitwero ngeyo Lubanga me ada kun giwok ki bot jo Icrael.​—Kwan Icaya 43:10, 12.

2. Pingo Lukricitayo me ada gitiyo macalo gurup?

Lacen, Luicrael gurwenyo cwak pa Lubanga dok bene Jehovah oleyo ka wanggi woko ki kacokke pa Lukricitayo. (Matayo 21:43; 23:37, 38) I kare-ni, Lukricitayo me ada aye dong gitye lucaden pa Jehovah ka wang Luicrael.​—Kwan Tic pa Lukwena 15:14, 17.

Yecu oyubo lulub kore me tito kwena dok me loko jo me rok ducu wek gudok jo ma lubbe. (Matayo 10:7, 11; 24:14; 28:19, 20) Tic man dong cok gik, kit macalo watye cok ki agikki piny. Pi tyen mukwongo i tekwaro pa dano, Jehovah oribo dano milion mapol ata ma gia ki i rok ducu i woro me ada. (Niyabo 7:9, 10) Lukricitayo me ada gitiyo macalo gurup wek gicuk cwiny luwotgi dok bene gikonygi. I wi lobo-ni lung, gilubo purogram acel me pwony ma a ki i Baibul i cokkegi.​—Kwan Jo Ibru 10:24, 25.

3. Dul pa Lucaden pa Jehovah me kare-ni ocakke nining?

I kine ka mwaka 1870 ki wiye, gurup mo pa lutino kwan manok me Baibul gucako niang i kom lok ada mogo me Baibul ma onongo dong orweny woko. Gin onongo gingeyo ni Yecu oyubo kacokke pa Lukricitayo wek gutit kwena, pi meno, gin gucako yubbe me tito kwena me Ker-ri i wi lobo ducu. I mwaka 1931, gucako tic ki nying man ni Lucaden pa Jehovah.​—Kwan Tic pa Lukwena 1:8; 2:1, 4; 5:42.

4. Lucaden pa Jehovah gitye ma guyubbe nining?

I cencwari me acel, kacokke pa Lukricitayo i kabedo mapat pat onongo gilubo tam ma a ki bot lukiko madit ma ngeyo ni Yecu aye Latel Wi kacokke. (Tic pa Lukwena 16:4, 5) I kare-ni bene, Lucaden pa Jehovah ginongo tira ki bot Lukiko Madit ma tye ki luelda ma gitye ki ngec madwong. Lukiko Madit man neno wi tic i jang gang kal pa Lucaden pa Jehovah ducu ma gigonyo leb, gigoyo dok gipoko bukke ma jenge i Baibul i leb makato 600. Pi meno, Lukiko Madit twero cuko cwiny ki miyo tira pi kacokke makato 100,000 i wi lobo-ni ducu. I kacokke acel acel, co ma gupore gitiyo calo luelda nyo luneno. Co magi gitiyo ki mar pi gwoko romi pa Lubanga.​—Kwan 1 Petero 5:2, 3.

Lucaden pa Jehovah gitye ma guyubbe me tito kwena maber-ri ki bene me loko dano wek gudok lulub kor Yecu. Wan bene watito kwena i ot ki ot calo lukwena pa Yecu. (Tic pa Lukwena 20:20) Wamine bene me pwonyo lok me Baibul bot jo ma gimaro ada. Ento Lucaden pa Jehovah pe gubedo dul mamwa. Wan watye jo me ot ma gitye ki Wego ma lamar. Wabedo omege ki lumege ma giparo pi luwotgi. (2 Jo Tecalonika 1:3) Pien jo pa Jehovah gitye ma guyubbe me yomo cwiny Lubanga ki dong konyo jo mukene, gin gitye dul pa jo ma cwinygi yom.​—Kwan Jabuli 33:12; Tic pa Lukwena 20:35.