Jo ma Gucoyo Lok i kom Yecu

Ineno co ma gitye i cal-li?— Nyinggi Matayo, Marako, Luka, Jon, Petero, Yakobo, Juda, ki Paulo. Co magi ducu gukwo i kare ma Yecu tye i lobo, dok gucoyo lok i kome. Wek kong wapwonyu lok i komgi.

Co adek i kingi gubedo lukwena ma gutito lok kacel ki Yecu. In ingeyo co adek mene?— Gin aye Matayo, Jon, ki Petero. Lukwena Matayo gin ki Jon onongo gingeyo Yecu maber adada, dok ngat acel acel i kingi ocoyo buk acel ma loko i kom kwo pa Yecu. Lakwena Jon bene ocoyo buk ma kilwongo ni Niyabo ki waraga adek ma kilwongogi ni Waraga pa Jon Mukwongo, Waraga pa Jon me Aryo, ki Waraga pa Jon me Adek. Lakwena Petero ocoyo waraga aryo ma tye i Baibul. Kilwongogi ni Waraga pa Petero Mukwongo ki Waraga pa Petero me Aryo. I waraga pa Petero me aryo, en ocoyo pi kare ma Jehovah oloko ki i polo i kom Yecu ni: ‘Man aye woda. Amare adada, dok cwinya yom i kome.’

Co mukene ma gitye i cal-li bene gipwonyowa lok i kom Yecu i bukke ma gucoyo. Ngat acel i kingi aye Marako. Nen calo en onongo tye i dyewor ma kimako iye Yecu dok oneno jami ducu mutimme. Ngat mukene obedo Luka. En obedo dokto dok nen calo odoko Lakricitayo i nge to pa Yecu.

Luco Baibul aryo mukene ma i cal-li gubedo omegi pa Yecu matino. Ingeyo nyinggi?— Nyinggi Yakobo ki Juda. Mukwongo, onongo kong pe giye i kom Yecu. Gin bene gutamo ni wi Yecu oballe woko. Ento lacen gucako ye i kom Yecu ci gudoko Lukricitayo.

Laco Baibul me agikki ma waneno calle kany obedo Paulo. Ma en peya odoko Lakricitayo, onongo nyinge Caulo. En onongo dag Lukricitayo adada dok otimo jami maraco i komgi. Ingeyo gin mumiyo Paulo odoko Lakricitayo?— I nino mo acel, Paulo onongo tye ka wot i yo ci owinyo dwan ngat mo ka loko kwede ki i polo. Obedo dwan Yecu! En openyo Paulo ni: ‘Pingo itye ka uno jo ma giluba?’ I nge meno, Paulo olokke odoko Lakricitayo. Paulo ocoyo bukke 14 me Baibul, cakke ki i Jo Roma o kwede i Jo Ibru.

Wakwano Baibul nino ducu, pe kumeno?— Ka wakwano Baibul, ci wabipwonyo jami mapol i kom Yecu. In mono imito medde ki pwonyo lok i kom Yecu?—