Gucikke Bot Jehovah

I nge dwe aryo ma jo Icrael guweko lobo Ejipt, guo i Got Cinai ci gutongo gony. Jehovah olwongo Moses, ci Moses ocito i wi got, ka dong owacce ni: ‘An alaro jo Icrael. Ka gubedo luwiny bota kun gigwoko cikka, gibidoko jona kikome.’ Moses odok cen bot jo Icrael ci otito botgi lok ma Jehovah owaco. Gin gudok i lok pa Jehovah nining? Gugamo ni: ‘Wabitimo jami ducu ma Jehovah owaco ni watim.’

Moses dok odok cen i wi got. Ki kunnu, Jehovah owacce ni: ‘Abilok botwu i nge nino adek. Cik dano wek pe gubin i Wi Got Cinai.’ Moses odok cen piny ci otito bot jo Icrael ni guyubbe me winyo lok pa Jehovah.

I nino me adekke, jo Icrael guneno ka lutkot wil dok pol macol oumo wi got woko. Gucako bene winyo mor piny ki koko pa obute malongo. Ci Jehovah obino piny i wi got ki mac ma lyel. Jo Icrael komgi omyel matek pi lworo ma onongo gitye kwede. Kom got ducu obedo ka yenge matek dok yito oumo woko. Koko pa obute obedo ka medde ameda ki doko longo. Ci Lubanga owacci: ‘An a Jehovah. Pe myero wuwor lubange mukene.’

Moses odok cen i wi got, ci Jehovah omiyo cik bot jone i kom kit ma myero Guwore kwede ki kit ma myero gukwo kwede. Moses ocoyo cik magi piny ci okwanogi bot jo Icrael. Gin gucikke ni: ‘Wabitimo gin ducu ma Jehovah owaco ni watim.’ Ada, jo Icrael gucikke bot Lubanga. Ento tika onongo gibigwoko cikkegi?