Paulo ki Temceo

Temceo onongo tye omego mo matidi i kacokke me Licitra. Wonne obedo Lagrik, ki minne obedo Lajudaya. Mamane, Yuneki, ki daane Loi gupwonyo Temceo lok i kom Jehovah cakke ma en onongo pud tidi.

I kare ma Paulo olimo Licitra i wotte me aryo me tito kwena, en oneno ni Temceo maro omege dok mito konyogi. Paulo olwongo Temceo me wot kacel kwede. Nicakke ma gucako wot kacel, Paulo okonye me doko lapwony mucwiny i tito lok me kwena maber-ri.

Cwiny maleng obedo ka telo Paulo ki Temceo ka weng ma gucito iye. I dyewor mo acel, Paulo oneno ginanyuta. Laco mo owaco bot Paulo ni obin i Makedonia okonygi. Pi meno Paulo, Temceo, Cira, ki Luka gucito kunnu ka tito kwena ci gucako kacokke mapol.

I boma mo me Makedonia ma kilwongo ni Tecalonika, co ki mon mapol gudoko Lukricitayo. Ento Lujudaya mukene nyeko omakogi i kom Paulo ki lureme. Gucoko lwak ci gutero omege magi i nyim luloc me boma, kun gidange ni: ‘Co magi gubedo lumone pa gamente me Roma!’ Kwo pa Paulo ki Temceo onongo tye ka mading, ci gulwi gucito wa i Berea i dyewor meno.

Jo me Berea onongo gitye ki miti madwong me winyo lok me kwena maber-ri, dok Lugrik ki Lujudaya mapol gudoko Lukricitayo. Ento i kare ma Lujudaya mogo ma gua ki i Tecalonika gubino gucako kelo woo, Paulo oa ocito i boma me Atene. Temceo ki Cira gudong i Berea ka jingo cwiny omege. Lacen, Paulo dok ocwalo Temceo me dok cen i Tecalonika ka konyo omege me cung matek i kom aunauna ma onongo gitye ka wok ki iye. I nge kare mo, Paulo ocwalo Temceo me limo kacokke mapol kun cuko cwiny omege ki lumege.

Paulo owaco bot Temceo ni: ‘Jo ma mito woro Jehovah wang ma kiunogi.’ Kiuno Temceo dok kibole i buc pi niyene. Cwinye obedo yom me bedo ki kare me nyuto gennene bot Jehovah.

Paulo owaco bot jo Pilipi ni: ‘Abicwalo Temceo botwu. En bipwonyowu kit ma myero wuwot kwede i ada, ki kit me tiyo tic me pwony.’ Paulo onongo ngeyo ni etwero keto genne i kom Temceo. Gutiyo kacel macalo lurem pi mwaki mapol.