Ket Cwinyi i Mot me Ticci!

IWINYO nining ka laremi mo ma marri ocwali waraga ma ocuko cwinyi? Lapwonnye Temceo onongo waraga ma kit meno ki bot lakwena Paulo. Waraga meno i kare-ni dong wangeyo macalo buk pa 2 Temceo. Temceo nen calo oyenyo ka mo ma oling mot wek ekwan waraga meno ma oa ki bot lareme-ni. Gwok nyo Temceo obedo ka tamo ni: ‘Paulo tye nining? Tika en tye ki tam mo ma twero konya i ticca? Tika waraga man twero konya i ticca me tito kwena kun akonyo kwede jo mukene bene?’ Kit ma wabineno kwede, Temceo onongo lagam pi lapeny magi ki jami mukene i waraga ma pire tek man. I pwony man, wabinyamo lok mogo ma pigi tego ma nonge i waraga man.

“ATYE KA CIRO AREM KARE DUCU”

I kare ma Temceo ocako kwano coc mukwongo i waraga meno, en oniang cutcut ni Paulo paro pire adada. Ki yomcwiny madit Paulo olwongo Temceo ni, “latinna ma amaro.” (2 Tem. 1:2) Temceo onongo waraga man i kine ka mwaka 65 K.M. Nen calo mwakane onongo kato 30 dok onongo tye laelda mucwiny. En onongo dong otiyo kacel ki Paulo pi mwaki makato apar kulu dok onongo pwony mapol.

Temceo nen calo onongo cuko cwiny madwong i kare ma oniang ni Paulo pud tye ka gwoko gennene. Paulo onongo tye lamabuc i Roma, dok onongo kibineke woko. (2 Tem. 1:15, 16; 4:6-8) Temceo onongo twero neno tekcwiny ma lakwena Paulo tye kwede i lokke man: “Atye ka ciro arem kare ducu.” (2 Tem. 2:8-13) Calo Temceo, wan bene waromo nongo cuko cwiny ki i lanen me ciro can ma Paulo oweko.

‘TI KI MOT ME KICA MA LUBANGA OMINI’

Paulo ocuko cwiny Temceo ni onen ticce pi Lubanga calo gin ma pire tek adada. Paulo onongo mito ni Temceo ‘oti ki mot me kica ma yam Lubanga omine.’ (2 Tem. 1:6) Paulo otiyo ki nyig lok me leb Grik man ni khaʹri·sma pi “mot.” Nyig lok meno i leb Grik gonye ni mot me nono ma pe ipore me nongone. Temceo onongo mot man i kare ma kiyere me tic pi kacokke i yo ma kite dok pat.​—1 Tem. 4:14.

Gin ango ma Paulo onongo tye ka cuko cwiny Temceo ni otim ki mot man? I kare ma Temceo okwano lok man ni “buki wek olyel,” en nen calo obedo ka tam i kom mac ma dano gibedo kwede i pacigi ma i kare mukene kwe doko lodi keken. Lodi magi onongo i kare mukene mitte ni kibuki wek mac olyel ki lyeto madwong. Dikconari mo acel owaco ni nyig lok me leb Grik (a·na·zo·py·reʹo) ma Paulo otiyo kwede-ni gonye ni “medo, kuto, nyo buko mac,” pi meno tyen lokke tye ni “bedo ki mit kom nyo arima madwong pi tic moni.” Paulo onongo tye ka waco ki Temceo ni: ‘Ket cwinyi i mot me ticci!’ Wan i kare-ni bene mitte ni watim kit meno​—wati ki mit kom i ticwa pi Jehovah.

“GWOK GIN MABER MA GIMIYO I CINGI”

I kare ma en omedde ki kwano waraga ma oa ki bot lareme me amara-ni, Temceo dok onongo lok mukene ma okonye me cobo ticce me pwony kakare. Paulo ocoyo ni: “Gwok gin maber ma gimiyo i cingi pi teko pa cwiny maleng ma bedo i iwa.” (2 Tem. 1:14) Gin ma pire tek ango ma onongo kimiyo bot Temceo? I tyeng me 13, Paulo onongo oloko i kom “lok me ada,” ma nonge i Ginacoya. (2 Tem. 1:13) Kit macalo Temceo onongo obedo latit kwena, onongo mitte ni en opwony lok me ada bot jo me kacokke ki bot dano ma nonge i wang ticce. (2 Tem. 4:1-5) Medo i kom meno, onongo kicimo Temceo macalo laelda me gwoko romi pa Lubanga. (1 Pet. 5:2) Temceo onongo twero gwoko gin ma kimine-ni​—ma en aye ada ma omyero epwony—​kun jenge i kom cwiny maleng pa Lubanga kacel ki Lokke.​—2 Tem. 3:14-17.

I kare-ni wan bene kiminiwa ada ma wapwonyo ki jo mukene. (Mat. 28:19, 20) Omyero wiwa pe owil kit ma lok ada ma wapwonyo-ni pire tek kwede, pi meno i kare ducu omyero waleg dok wakwan Lok pa Lubanga. (Rom. 12:11, 12; 1 Tem. 4:13, 15, 16) Watwero bedo ki mot mukene bene, calo tic macalo laelda i kacokke nyo tic pi kare malac. Ka watye ki mot ma kit meno ci omyero wabed jo mamwol. Omyero bene wajenge i kom kony pa Lubanga me cobo mot me tic magi. Ka watimo meno, ci wabinyuto ni watero mot me tic ma Lubanga ominiwa-ni calo gin ma pire tek.

“MYERO ITIT BOT JO MA GENNE”

But mot me tic pa Temceo onongo obedo me pwonyo jo mukene me tiyo tic acel ma en tiyo-ni. Meno aye tyen lok mumiyo Paulo ocuko cwiny Temceo ni: “Gin ma dong ityeko winyo ki bota . . . , in bene myero itit bot jo ma genne ma giromo pwonyo ki jo mukene.” (2 Tem. 2:2) Ada, Paulo opoyo wi Temceo me pwonyo jo mukene jami ducu ma en opwonyo. Pire tek adada ni luelda ducu me kacokke gutute me timo meno i kare man. Laelda maber pe kano ngec ma en tye kwede i kom tic moni. Me ka meno, en pwonyo jo mukene wek gin bene guti tic acel-li. En pe bedo ki lworo ni jo magi gibitiyo tic man maber loye woko. Pi meno, laelda pe pwonyo mere dano wiye wiye kit me timo tic moni. En mito ni jo ma etye ka pwonyogi-ni gudong neno ma atir ki niango matut​—nyo ni gudok Lukricitayo muteggi. I yo ma kit meno, “jo ma genne” ma en opwonyogi-ni gibibedo ki kare me konyo kacokke makato.

Labongo akalakala mo, Temceo cwinye obedo yom pi waraga ma onongo ki bot Paulo. Watwero goyo i wiwa kit ma Temceo okwano waraga meno teretere kun lwodo kit ma etwero lubo tam meno i ticce.

Wan bene wamito keto tam meno i tic i kwowa. I yo ma nining? Watwero tic matek me medo mac i kom mot ma kiminiwa ki gwokone maber, kun bene wapwonyo jo mukene jami ducu ma wangeyo. Ka watimo kit meno, ci kit macalo Paulo otito ki Temceo ‘wabicobo ticwa ducu kakare.’​—2 Tem. 4:5.