PWONY ME 8

Ti ki Lapor

Matayo 13:34, 35

GIN ME ATIMA: Wek pwony-nyi obed mit kun itiyo ki lapor mogo ma niang iye yot, ma gudo cwiny jo ma tye ka winyo lokki, dok pwonyo lok ma pire tek.

KIT ME TIMONE:

Yer lapor ma niang iye yot. Calo Yecu, ti ki jami ma dano gungi kwede me pwonyo lok ada ma pigi tek. Pe idur lok mapol ma twero miyo lapor-ri doko tek tutwal me niang iye. Nen ni lapor-ri kubbe ki pwony ma itye ka miyone wek pe dok onywen wi dano ki lok mogo ma pe rwatte.

Bed ma wangi bit. Nen kabedo murumowa, kwan bukkewa, dok iwiny lupwonye mucwiny. Ka iwoto ki timo man, co piny lapor ma itwero tic kwedgi wek iti kwede i nino mukene.
Tam i kom gin ma twero konyo jo ma gitye ka winyo lokki. Yer lapor ma dano ducu tye ki miti iye dok rwatte ki gin ma gitimo. Gwokke mada kun pe itiyo ki lapor ma romo leyo wigi nyo wango igi.
Pwony lok ma pigi tego. Mi lapor tutwalle i kom lok ma pigi tego, ento pe i kom lok ma pire pe tek. Yelle matek wek jo ma tye ka winyo lokki gupo i kom pwony ma tye i lapor-ri, ento pe lapor meno keken.