Yo Adek me Yubo Kit me Pwony-nyi
1. Pingo omyero wayelle me yubo yo me pwonywa?
1 Lutit kwena ducu gubedo lupwonye. Kadi bed watye ka limo dano tyen mukwongo, dok cen bot jo ma gunyuto miti, nyo kwano Baibul ki dano, gin ma pire tek aye nongo watye ka miyogi ngec. Dok ngec ma wamiyo obedo kwena ma pire tek. Watye ka miyo ngec i kom “coc maleng,” ma miyo ‘ryeko me nongo larre.’ (2 Tem. 3:15) Man pud dong obedo mot ma pire tek atika! Wabinyamo yo adek ma twero konyowa me yubo kit me pwonywa.
2. Waromo pwonyo dano i yo ma niang iye yot nining?
2 Pwony i Yo ma Niang Iye Yot: Ka wangeyo pwony moni maber, wiwa twero wil ni pwony meno nongo tek bot ngat ma tye ka winyone tyen mukwongo. Pi man, ka itye ka kwano Baibul ki dano, pe idur lok mapol. Me kaka meno, lok i kom wi lok ma pigi tego aye. Duru lok mapol pe te lokke ni nongo ibedo lapwony maber. (Car. 10:19) Bedo ber ka ikwano ginacoya ma loko atir i kom gin ma wutye ka nyamo. I nge kwano ginacoya, nwo ka ma ginacoya loko iye i kom gin ma wutye ka nyamo. Pwony pa Yecu me Wi Got, ma kicoyo i Matayo cura 5 me o i cura 7, tye ki lok ada mapol, ento Yecu omiyo pwony man i yo ma niang iye yot dok otiyo ki lok macek cek.
3. Tic ki lapor kelo adwogi maber ango, dok lapor mene ma tiyo maber?
3 Ti ki Lapor: Lapor tugo cwiny ki tam pa dano dok konyo me poyo wic. Pe itam ni myero kong ibed dano ma ngeyo boko ododo wek imi lapor maber. Pol kare Yecu otiyo ki lapor macek, ma niang iye yot. (Mat. 7:3-5; 18:2-4) Cal ma niang iye yot ma kigoyo i karatac twero bene tic maber. Yubbe woko con romo bene konyi me tamo lapor mogo ma weko dano niang maber i gin ma ibipwonyo.
4. Waromo tic ki lapeny i yo maber nining?
4 Lapeny: Lapeny miyo latin kwan tamo tam. Pi man, bedo ber ka imiyo kare ki latin kwan me gamo lapeny ma ipenyo. Ka in aye dok irune ka miyo lagam, ci pe ibingeyo kit ma latin kwanni tye ka dongo kwede. Ka en omiyo lagam ma pe tye atir, ma ka tiro en, twero bedo ber ka ikonyo en me miyo lagam matir kun nongo ipenye ki lapeny mogo mukene. (Mat. 17:24-27) Adada, wan ducu wabedo lupwonye ma tye ki roc. Pi man, Baibul cuko cwinywa me keto cwinywa i kit ma wapwonyo kwede. Ka watimo kit meno ci wabinongo kwo ma pe tum piwa, ki pi jo ma winyowa.—1 Tem. 4:16.