PWONY ME 01
Baibul Twero Konyi Nining?
Pol pa wan watye ki lapeny madok i kom kwo, pekki, to, ki dong anyimwa. Wamito bene niang jami mapol ma gudo kwowa me nino ducu, me labolle, nongo jami ma mitte pi kwo, nyo nongo yomcwiny i kwo me ot. Jo mapol gunongo ni Baibul konyogi pe me nongo lagam pi lapeny ma pigi tego keken ento bene minigi tam mabeco ma konyo i kwogi me nino ducu. Ada, Baibul twero konyo dano ducu.
1. Baibul miyo lagam pi lapeny calo mene?
Baibul miyo lagam pi lapeny ma pigi tego calo magi: Kwo ocakke nining? Tyen lok me kwo mono tye? Pingo wadeno can? Ngo ma timme i kom ngat ma oto? Pingo lweny onya mapol i lobo kadi bed dano ducu mito kuc? Ngo ma bitimme i lobo i anyim? Baibul cuko cwinywa me yenyo lagam pi lapeny magi, dok dano milion mapol dong gunongo ni lagam ma Baibul miyo genne adada.
2. Baibul twero konyowa nining me nongo yomcwiny i kwowa me nino ducu?
Baibul miniwa tam mabeco. Me labolle, pwonyo jo me ot kit me nongo yomcwiny me ada. Miyo tam i kom kit me lweny ki par ki dong kit me nongo yomcwiny i ticwa. Ibipwonyo jami mapol ma Baibul waco i kom lok man, ki jami mukene mapol ka wamedde ki kwano buk man kacel. Dok gwok in bene ibiye ni ada “Ginacoya ducu [jami ducu ma kicoyo i Baibul] . . . konyo.”—2 Temceo 3:16.
Buk man pe leyo ka Baibul. Me ka meno, cuko cwinyi me ngiyo pwony me Baibul in kikomi. Pi meno, wacuko cwinyi me kwano wang Baibul ma kiketogi i pwony ducu kun iporogi ki jami ma itye ka pwonyogi.
NONG NGEC MATUT
Nen kong kit ma Baibul okonyo kwede jo mogo, kit ma itwero nongo mit pa kwano Baibul, ki dong pingo pire tek me nongo kony wek iniang lok me Baibul.
3. Baibul twero tirowa
Baibul obedo calo mac mo matar adada. Twero konyowa me moko tam matir ki dok me ngeyo gin ma bitimme i anyim.
Kwan Jabuli 119:105, ci wunyam lapeny magi:
Laco jabuli man onongo neno Baibul nining?
In kono ineno Baibul nining?
4. Baibul twero miyo lagam pi lapenywa
Dako mo onongo ni Baibul tye ki lagam pi lapeny ma obedo ka nyweno wiye pi mwaki mapol. Tuk VIDIO, ci wunyam lapeny ma lubo.
Dako ma i vidio-ni onongo tye ki kit lapeny ango?
Kwano Baibul okonye nining?
Baibul cuko cwinywa me penyo lapeny. Kwan Matayo 7:7, ci wunyam lapeny man:
Lapeny ango ma itye kwede ma imito nongo lagamme ki i Baibul?
5. Itwero nongo mit pa kwano Baibul
Jo mapol gitye ka nongo mit pa kwano Baibul dok gitye ka nongo adwogi mabeco ki iye. Tuk VIDIO, ci wunyam lapeny ma lubo.
Bulu ma i vidio-ni onongo giwinyo nining i kom kwan?
Pingo dong giwinyo mapat i kare-ni i kom kwano Baibul?
Baibul ocikke me miniwa kwecwiny ki gen. Kwan Jo Roma 15:4, ci wunyam lapeny man:
Tika imito nongo ngec mapol i kom cikke ma kicoyo i tyeng meno?
6. Jo mukene gitwero konyowa me niang lok me Baibul
Medo i kom kwano Baibul pigi kengi, jo mapol gunongo ni tye me kony adada ka ginyamo Baibul ki ngat mo. Kwan Tic pa Lukwena 8:26-31, ci wunyam lapeny man:
Watwero niang lok me Baibul nining?—Nen tyeng me 30 ki 31.
Laco ma Laetiopia-ni onongo mito kony me niang Ginacoya. Jo mapol i kare-ni ginongo ni bedo me kony ma loyo ka ginyamo Ginacoya kacel ki jo mukene
JO MOGO GIWACO NI: “Kwano Baibul obedo balo cawa.”
In kono iwaco ningo? Pingo?
WOT WIYE WIYE
Baibul miniwa tam ma konyo i kwowa me nino ducu, gamo lapeny ma pigi tego, dok miniwa kwecwiny ki gen.
Ngo ma ipwonyo?
Kodi tam ango ma watwero nongone i Baibul?
Baibul gamo lapeny calo mene?
Ngo ma imito pwonyone ki i Baibul?
TIM KWED
Nen kong kit ma tam ma Baibul miyo konyowa kwede i kare-ni.
“Pwony me Baibul—Konyowa Kare Ducu” (Wi Lubele Nam. 1 2018)
Nen kong kit ma Baibul okonyo kwede laco mo ma obedo ka lweny ki tam marac nicakke i tinone.
Nen kong tam ma Baibul miyo pi jo me ot.
Nen ngo ma Baibul waco madok i kom lok goba ma onya i kin piny ma lubbe ki ngat ma tye ka loyo lobo-ni.