Lok ki Diro

Gin ma Paulo Otimo

VIDIO: Paulo Otito Kwena Bot Jo Atene

1. Nen VIDIO, nyo kwan Tic pa Lukwena 17:​22, 23. I nge meno, tam i kom lapeny magi:

1. Paulo onongo winyo nining i kom tim me woro goba ma en oneno i boma me Atene?—Nen Tic pa Lukwena 17:16.

2. Me ka ngolo kop i wi jo Atene, i yo ma nining ma Paulo otiyo ki jami ma giworo macalo yo me nywako kwena maber kwedgi?

Pwony Ango ma Wanongo ki Bot Paulo?

2. Dano pol kare giye winyo lokwa ka wayero ki diro gin ma wamito wacone ki kit ma wabiwaco kwede.

Lub Lanen pa Paulo

3. Yer lokki ki diro. Me labolle, ka itye ka lok ki ngat mo ma pe obedo Lakricitayo, twero mitte ni itim alokaloka i kom kit ma icako kwede ki lok i kom Baibul nyo kit ma ilwongo kwede Yecu.

4. Pe irune ka tiro tam pa dano. Wek en obed agonya me tito tamme. Ka en owaco gin mo ma pe rwatte ki pwony me Baibul, jukke kekeni wek pe icak laro lok kwede. (Yak. 1:19) Ka iciko iti me winyo lokke, ci ibiniang gin ma en ye iye ki tyen lok mumiyo en ye meno.—Car. 20:5.

5. Tute me nongo gin mo ma tamwu rwatte iye dok ma itwero pwoye pire. Twero bedo ni en ye ki cwinye ducu ni niyene aye tye kakare. Cak ki lok i kom gin mo ma wun ducu wuye iye, ci motmot medde ki konye me niang gin ma Baibul pwonyo.