Nong Pwony Ki I Lok Pa Lubanga

Pingo Lubanga Oweko Tim Maraco ki Deno Can Tye?

Pwony man nyamo lapeny mogo ma gwok nyo ibedo ka penye kwede dok bene nyutti ka ma itwero kwano iye lagamme ki i Baibulli. Lucaden pa Jehovah cwinygi bibedo yom me nyamo lagam pi lapeny magi kwedi.

1. Tim maraco ocakke nining?

Tim maraco ocakke i lobo i kare ma Catan owaco lok goba mukwongo. Catan onongo kite pe rac i kare ma kicweye. En onongo tye lamalaika ma pe ki roc, ento en “pe ocung i ada.” (Jon 8:44) En obedo ki miti i kom woro ma myero kimi bot Lubanga keken. Catan owaco lok goba bot dako mukwongo, Kawa, kun bwole ni owiny en ma ka winyo Lubanga. Adam oribbe ki Kawa i kwero winyo Lubanga. Tam ma Adam omoko-ni okelo deno can kacel ki to.​—Kwan Acakki 3:1-6, 17-19.

I kare ma Catan omiyo tam ni Kawa pe owiny Lubanga, en onongo tye ka kelo jemo i kom Twero me Loc pa Lubanga. Pol pa dano guribbe ki Catan i kwero Lubanga macalo Laloc. Pi meno, Catan odoko “lalo lobo.”​—Kwan Jon 14:30; Niyabo 12:9.

2. Cwec pa Lubanga Mono Onongo Gitye ki Roc?

Dano kacel ki lumalaika ma Lubanga ocweyogi-ni onongo gitwero winyo maber adada cik pa Lubanga. (Nwoyo Cik 32:4, 5) Lubanga ocweyowa me bedo agonya kun wayero me timo gin maber nyo marac. Bedo agonya meno miniwa kare me nyuto marwa pi Lubanga.​—Kwan Yakobo 1:13-15; 1 Jon 5:3.

3. Pingo Lubanga Oweko Dano Deno Can?

Cakke wa i poto me Eden, Jehovah obedo ka kanyo jemo i kom twero me locce. Pingo? Me nyuto ni tute pa dano me lone kengi pe binyako nyige. (Jeremia 10:23) Jami mutimme i tekwaro pa dano pi mwaki 6,000 mukato angec-ci ocobo pyem man. Luloc me lobo-ni pe gujuko lweny, tim bwami, ngolo kop alenga, ki dong two.​—Kwan Latitlok 7:29; 8:9; Jo Roma 9:17.

Ka iporo, inongo ni jo ma giye Lubanga macalo Lalocgi ginongo adwogi maber. (Icaya 48:17, 18) Cokcok-ki, Jehovah bityeko gamente pa dano ducu. Jo ma giye ni Lubanga keken aye ologi gibileyo lobo.​—Icaya 2:3, 4; 11:9; Kwan Daniel 2:44.

4. Diyo cwiny pa Lubanga miyo kare ango?

Catan owacci dano pe bibedo lugen ki cwinygi ducu bot Jehovah. Diyo cwiny pa Lubanga miyo botwa ducu kare me nyuto ka ce wamito loc pa Lubanga nyo pa dano. Kit ma wakwo kwede nyuto loc mene ma wayero.​—Kwan Yubu 1:8-11; Carolok 27:11.

5. Waromo yero Loc pa Lubanga nining?

Wayero Lubanga macalo Laloc ka wayenyo dok walubo woro me ada ma jenge i Lokke, Baibul. (Jon 4:23) Kit ma Yecu otimo kwede, wan bene pe wadonyo itim me wibye ki lweny.—Kwan Jon 17:14.

Catan tiyo ki tekone me ilo malo tim me tarwang ki tim mukene maraco. Ka wakwero kodi tim magi, luremwa ki wadiwa mogo giromo nywaro nyo dagowa. (1 Petero 4:3, 4) Pi meno, watye ki ka ma myero wayer. Tika wabiribbe ki jo ma gimaro Lubanga? Tika wabilubo cikke me mar dok me ryeko-ni? Ka watimo meno, ci wabinyuto ni Catan owaco lok goba i kare ma en owacci pe tye ngat mo ma bitimo gin ma Lubanga owaco.​—Kwan 1 Jo Korint 6:9, 10; 15:33.

Pi ngec mukene, nen dul me 11 i buk, Baibul Mono Ada Pwonyo Gin Ango? ma Lucaden pa Jehovah aye gucoyo.

[Cal ma tye i pot karatac 12]

Adam oyero gin marac

[Cal ma tye i pot karatac 13]

Tung ka ma wayero nyuto ka ce wamito Lubanga macalo Lalocwa