LAPENY MA KIGAMO ME BAIBUL
Anga mono ma loyo lobo-ni?
Ka Lubanga aye loyo lobo man, kono dano gitye ka deno can?
Dano mapol gitamo ni Lubanga aye loyo lobo man. Ento ka meno tye lok ada, tika onongo lobo bipong ki deno can? (Nwoyo Cik 32:4, 5) Ma lubbe ki Baibul, lobo-ni tye i te loc pa ngat mo ma kite rac adada.—Kwan 1 Jon 5:19.
Ngat ma kite rac-ci ocako loyo dano nining? I kare ma kicweyo dano, lamalaika mo ojemo i kom Lubanga ci ocuko cwiny laco ki dako mukwongo me jemo bene. (Acakki 3:1-6) Luot man guwinyo dog Catan, lamalaika ma lajemo-ni, mumiyo en odoko lalocgi. Lubanga Won Twer Ducu aye Laloc matir, ento en mito ni dano guyer locce pien gimare. (Nwoyo Cik 6:6; 30:16, 19) Ki cwercwiny madit, pol pa dano kibwologi me yero gin marac ma Adam gin ki Kawa guyero-ni.—Kwan Niyabo 12:9.
Anga ma bicobo pekki pa dano?
Lubanga tika biweko Catan medde ki locce marac-ci? Pe! Lubanga bitic ki Yecu me kwanyo jami maraco ducu ma Catan otimogi.—Kwan 1 Jon 3:8.
Yecu bineko Catan woko, pien Lubanga omiye twero me timone. (Jo Roma 16:20) I ngeye, Lubanga biloyo dano dok biwekogi bedo ki yomcwiny kacel ki kuc kit ma onongo en oyubo kwede con.—Kwan Niyabo 21:3-5.