Gen Jehovah, “Lubanga Ma Kweyo Cwiny Dano Ducu”
“Myero gipwo Lubanga Won Rwotwa Yecu Kricito, Won ma lakica, Lubanga ma kweyo cwiny dano ducu.”—2 KOR. 1:3.
1. Labongo paro pi mwaka, gin ango ma dano ducu gimito?
NICAKKE ma kinywalwa, wan wamito kwe cwiny. Latin matidi kok wek wange ni pe etye ka winyo maber. Kare mukene nongo mito ni kitinge nyo nongo kec tye ka nekone. Kadi bed dong wadito, pud wamito ni kinyut botwa mar dok kikwe cwinywa. Tutwalle ka watye i kwo matek.
2. Lok mene me cuko cwiny ma Jehovah miyo me nyuto ni en bikweyo cwiny jo ma gene?
2 Jo me pacowa kacel ki luremwa giromo olo miniwa kwe cwiny. Ento i kine mukene, jami ma keliwa cwer cwiny nongo kato teko pa dano adana woko. Lubanga keken aye romo miniwa kwe cwiny kadi bed peko obwoyowa adada. Lokke miniwa gen ni: “Rwot [Jehovah] tye cok bot jo ducu ma kok bote, . . . dok winyo kokogi.” (Jab. 145:18, 19) Ada, “Rwot [Jehovah] neno jo ma kitgi atir, dok ciko ite winyo koko ma gikok bote pi kony.” (Jab. 34:15) Ento wek wanong cwak ki kwe cwiny ma a ki bot Lubanga, omyero waket genwa i kome. Daudi, ma bene ocoyo jabuli-ni, onyuto meno ka maleng i kare ma en owero ni: “Rwot [Jehovah] en ka larre pa jo ma piny obwoyogi, en cel matek ma gwokogi maber i kare me ayela. Rwot [Jehovah], jo ma ngeyi gibiketo gengi i komi; pien in pe ibwoto jo ma gibino boti.”—Jab. 9:9, 10.
3. Yecu omiyo lapor ango me nyuto mar pa Jehovah pi Jone?
3 Jehovah tero jo ma wore ni pigi tek. Yecu otito man i kare ma en owaco ni: “Ojwinyojwiny abic pe gicato pi cente pyeraryo? Ento pe tye mo acel i kingi ma wi Lubanga twero wil iye. Kadi bed wa yer wiwu ducu bene dong gikwanogi woko liweng. Pe wulwor; pien piwu tek twatwal makato pi ojwinyojwiny mapol.” (Luka 12:6, 7) Kun tiyo ki lanebi Jeremia, Jehovah owaco bot jo Icrael ni: “Wun jo Icrael kare ducu abedo ka marowu, kit meno pud amedde ki nyuto botwu mar mera ma pe lokke.”—Jer. 31:3.
4. Pingo waromo bedo ki gen i kom cikke pa Jehovah?
4 Keto gen i kom Jehovah kacel ki cobbe pa cikkene romo kweyo cwinywa i kare me peko. Pi meno, genwa i kom Lubanga myero obed rom aroma ki pa Yocwa ma owaco ni: “Gin mabeco ducu ma yam Rwot Lubangawu ociko piwu gin ducu gucobbe kakare, pe tye acel mo ma pe otimme.” (Yoc. 23:14) Medo i kom meno, waromo bedo labongo akalakala ni kadi bed watye ka deno can i kare-ni, “Lubanga genne” dok pe biweko luticce ma geno en.—Kwan 1 Jo Korint 10:13.
5. Pingo wan bene waromo kweyo cwiny jo mukene?
5 Lakwena Paulo owacci Jehovah tye “Lubanga ma kweyo cwiny dano ducu.” Man te lokke ni Jehovah kweyo cwiny jo ducu ma gitye i can nyo cwinygi cwer. (Kwan 2 Jo Korint 1:3, 4.) Pe tye gin mo nyo ngat mo keken ma twero gengo Wonwa me polo, pi meno en twero tic ki yo ducu ma tye me kweyo cwiny jo ma marre. Man weko wan bene watwero kweyo cwiny luye luwotwa ma ‘gitye ki can mapat pat.’ Waromo timo man ka “wakweyo cwinygi i kit yo acel-lu ma Lubanga okweyo kwede cwinywa-ni.” Man pud dong nyuto kero madit ma Jehovah tye kwede me kweyo cwiny jo ma cwinygi otur!
Lweny ki Pekki ma Keliwa Par
6. Mi labol me pekki mogo ma giromo keliwa par.
6 Wamito kwe cwiny i kabedo mapat pat me kwowa. Gin acel ma kelo par aye to pa danowa me amara, tutwalle ka dako, laco nyo latin oto. Kwe cwiny bene mitte ka ngat moni tye i kwo matek pi jami calo apokapoka. Two, tiyo, can, tele ma bedo i kwo me ot, nyo jami maraco ma gitye ka timme i lobo-ni giweko wan ki acel acel wamito kwe cwiny.
7. (a) Ngo ma wamito i kare me peko? (b) Gin ango ma Jehovah twero timone me cango cwiny jo ma cwinygi “cwer”?
7 I kare me peko, wamito ni myero wanong kwe cwiny pien pekki mapol gudo cwinywa, tamwa, kit ma wawinyo kwede, ki dong yotkomwa me cwiny ki me kom. Me lapore, tam kong i kom cwinywa. Lok pa Lubanga nyuto ni cwinywa twero “cwer.” (Jab. 51:17) Jehovah twero konyowa ki i peko man pien “en cango jo ma cwinygi cwer, dok tweyo wang retgi woko.” (Jab. 147:3) Kadi bed pekone rac adada, Lubanga twero miyo wawinyo agonya ka walego bote ki niye kun walubo cikke.—Kwan 1 Jon 3:19-22; 5:14, 15.
8. Jehovah twero konyowa nining ka watye ki tam mapol?
8 Mitte ni myero wabed ma wiwa opye mot pien atematema twero keliwa tam mapol. Ka ni ki kerowa kenwa, ci pe waromo lweny ki jami magi ma gitemo niyewa-ni. Ento, laco jabuli owero ni: “Ka atamo pi jami mapol, in ikweyo cwinya ki kicani.” (Jab. 94:19) Kitungcel, Paulo ocoyo ni: “Pe wubed ki par i kom gin mo, ento i lok ducu wumi Lubanga onge gin ma wumito i lega ki i bako dogwu kacel ki miyo pwoc bene. Man bimiyo kuc pa Lubanga ma kato ngec pa jo ducu gwoko cwinywu ki tamwu maber i Kricito Yecu.” (Pil. 4:6, 7) Kwano ki lwodo lok i kom Ginacoya romo konyowa adada me lweny ki par.—2 Tem. 3:15-17.
9. Watwero lweny ki tur cwiny nining?
9 I kine mukene, cwinywa twero tur adada ma bene romo gudo wa kit ma wawinyo kwede. Gwok nyo watamo ni pe waromo tiyo tic mo ma Ginacoya waco ni watim nyo bedo ki mot mogo me tic me cwiny. Ma lubbe ki lok man, Jehovah bene twero kweyo cwinywa dok konyowa. Me labolle: I kare ma kicimo Yocwa me telo Jo Icrael me lweny i kom lobe ma gitego, Moses owacce ni: “Bed oteka ma cwinyi nwang, . . . Rwot aye bitelo nyimi, en bibedo kwedi, pe bibwoti ata, pe biweki keni. Pe ilwor, cwinyi pe opoti.” (Nwo. 31:7, 8) Ki kony pa Jehovah, Yocwa otelo jo pa Lubanga me terogi i Lobo ma Kiciko Pire kun loyo lumonegi ducu. Con kong, Lubanga omiyo kony acel-lu bot Moses ki i Nam Makwar.—Nia 14:13, 14, 29-31.
10. Ka peko obalo yotkomwa, kony ango ma waromo nongone?
10 Pekki ma bino twero balo yotkomwa. Tye kono ni, camo cam mupore, nongo yweyo muromo, rweyo ler, kacel ki bedo ma nongo watye maleng twero miyo komwa bedo yot. Bedo ki neno mupore ma Baibul miniwa i yo me cwiny romo kelo adwogi maber i komwa. Pi meno, ka watye i peko, omyero watam i kom jami ma otimme i kom Paulo kacel ki lokke ma cuko cwinywa ni: “Gidiyowa woko tungngi ki tungngi, ento pe giridowa ma okato kare; tamwa ocung woko, ento genwa pe oballe; giunowa, ento pe giwekowa ata; gibolowa piny i ngom ligwek, pe bene wato.”—2 Kor. 4:8, 9.
11. Waromo lweny ki two ma bino i yo me cwiny nining?
11 Atematema mogo romo balo yotkomwa me cwiny. Kany bene Jehovah twero larowa. Lokke miniwa gen ni: “Rwot [Jehovah] kwako dano ma mito poto, dok ilo jo ma piny obwoyogi woko ada malo.” (Jab. 145:14) Me nongo kony wek walweny ki two me cwiny, omyero wanong kony ki bot luelda. (Yak. 5:14, 15) Dok ka kare ducu waketo tamwa i gen me kwo ma pe tum ma kicoyo pire i Ginacoya, ci man bikonyowa ka kitemo niyewa.—Jon 17:3.
Lanen me Kwe Cwiny ma Lubanga Miyo
12. Tit kong kit ma Jehovah okweyo kwede cwiny Abraim.
12 Laco jabuli otito ni: “Po i lok ma yam icikke kwede bota, an laticci, ma imiya dong aketo genna iye-ni. Kadi ka atye i can, lokki kweyo cwinya; pien cikkeni dong omiya kwo.” (Jab. 119:49, 50) I kare-ni, Lok pa Jehovah miniwa lanen mapol i kom kwe cwiny ma Lubanga miyo. Me lapore, Abraim nen calo cwinye ocwer i kare ma oniang ni Jehovah bityeko Codom ki Gomora woko. Abraim openyo Lubanga ni: “In ada ibityeko jo ma kitgi atir kacel ki jo maraco?” Jehovah okweyo cwiny Abraim kun cikke ni kadi bed dano 50 keken aye kitgi atir, En pe ebityeko codom woko. Abraim omedde ki penyo Jehovah tyen abic kulu ni: Ka dano 45 keken aye kitgi atir kono? 40? 30? 20? 10? I lapeny ducu ma Abraim openyo, Jehovah odiyo cwinye dok onyuto kicane madit kun tito ni Codom pe kibityekone. Kadi bed ni dano ma kitgi atir onongo pe gio apar i kabedo meno, Jehovah olaro kwo pa Lot ki pa anyirane.—Acak. 18:22-32; 19:15, 16, 26.
13. I yo ango ma Anna onyuto ni en egeno Jehovah?
13 Anna, dako pa Elkana onongo tye ki miti madit me nywalo latin. Ento en onongo lalur, dok man ocwero cwinye adada. En olego pire bot Jehovah, ci Lalamdog Madit Eli owaco bote ni: “Lubanga pa Icrael myero oye legani ma ikelo bote-ni.” Lok man okweyo cwiny Anna, “ci wange odoko leng.” (1 Cam. 1:8, 17, 18) Anna obedo ki gen kun weko jami ducu i cing Jehovah. Kadi bed ni en onongo pe ngeyo gin ma bitimme, Anna obedo ki kuc. Lacen, Jehovah ogamo legane. Anna ogamo iye ci onywalo latin awobi, ocako nyinge ni Camuel.—1 Cam. 1:20.
14. Pingo Daudi onongo mito kwe cwiny, dok en olokke bot anga?
14 Daudi, kabaka macon me Icrael, tye lanen mukene i kin jo ma Lubanga okweyo cwinygi. Jehovah ‘neno cwiny dano.’ Pi meno, i kare ma en oyero Daudi me bedo kabaka me Icrael, en onongo ngeyo ni Daudi mito timo gin matir dok en maro woro me ada. (1 Cam. 16:7; 2 Cam. 5:10) Ento i ngeye, Daudi otimo abor ki Batceba ci otemo umo balle ki neko Uria cwar dako-ni. I kare ma Daudi oniang kit ma balle dit kwede, en olego bot Jehovah ni: “Pi kicani madwong jwa balla woko ducu. Lwok gin marac woko ki i koma, dok ilonya i kom balla. Angeyo balla ducu maber, dok kare ducu wiya po i kom bal ma atimo.” (Jab. 51:1-3) Daudi ongut ki cwinye ducu ci Jehovah otimo bote kica. Ento, Daudi onongo adwogi marac pi balle. (2 Cam. 12:9-12) Kadi bed kumeno, kica pa Jehovah okweyo cwiny laticce man ma omwolle-ni.
15. Ma peya Yecu oto, kony ango ma Jehovah omiyo bote?
15 I kare ma Yecu tye i lobo, en orwatte ki atematema mapol. Lubanga oye ni atematema me niye man otimme, ento Yecu ogwoko gennene macalo dano ma pe ki roc dok kare ducu geno Jehovah kun ilo malo Twero me Locce. Ma peya kidote ka kineke, Yecu olego bot Jehovah ni: “Pe obed macalo an amito; gin ma in imito aye myero otimme.” Ci lamalaika onen bote kun jingo cwinye. (Luka 22:42, 43) Lubanga omiyo kwe cwiny, kero, ki dong kony ma Yecu mito i kare meno.
16. Ngo ma Jehovah romo timone ka wakemme ki to pi gwoko gennewa?
16 Kadi bed ni wan wakemme ki to pien ni wacung matek i niyewa, Jehovah romo dok bikonyowa me gwoko gennewa. Medo i kom meno, gen me nicer bene miniwa kwe cwiny. Pud dong watye ka kuro adada nino ma “gibityeko woko” lamonewa me agikki, ma en aye to! (1 Kor. 15:26) Lutic ma gin lugen bot Lubanga ento guto woko, kacel ki mukene, wi Jehovah bipo i komgi ci cerogi woko. (Jon 5:28, 29; Tic. 24:15) Keto gen i kom cikke me nicer ma Jehovah omiyo-ni kweyo cwinywa dok miniwa tekcwiny i kare me aunauna.
17. Ka danowa me amara oto Jehovah kweyo cwinywa nining?
17 Pud dong kweyo cwinywa me ngeyo ni jowa me amara ma guto gitye ki gen me dwogo i kwo i lobo mamwonya atika, ka ma jami ducu ma kelo peko i kare-ni bibedo pe iye! Bibedo twon mot madit atika bot “lwak dano mapol ata” ma gin lutic pa Jehovah me bwot ki i agikki pa yub marac me jami me kare-ni kun gijolo dok gipwonyo jo ma kibicerogi me kwo i lobo kany!—Yabo. 7:9, 10.
Lubanga ma Bedo Nakanaka-ni En Aye Kabedowu
18, 19. I yo ango ma kikweyo kwede cwiny jo pa Lubanga i kare me aunauna?
18 Lanebi Moses ocoyo wer ma okweyo dok cuko ocwiny jo Icrael. I wer man, en owero ni: “Lubanga ma bedo nakanaka-ni en aye kabedowu, cinge tye ki tung piny ma tingowu kwede malo. Oryemo lumerok woko ki i nyimwu kun wacci, ‘Tyekgi woko liweng.’” (Nwo. 33:27) Lacen, lanebi Camuel owaco bot jo Icrael ni: “Pe dok wulokke wubarre woko ki ka lubo kor Rwot, ento dong wuti bot Rwot ki cwinywu ducu. . . . Rwot [Jehovah] pe bibolo lwakke woko ata, pi nyinge madit-ti.” (1 Cam. 12:20-22) Ka ce wamedde ki tic pi Jehovah kun wabedo lugen, ci en pe biwekowa ata. Kare ducu En biminiwa kony ma wamito.
19 Lubanga bimiyo kony ki kwe cwiny ma mitte bot jone i kare man me agikki ma piny tye marac-ci. Pi cencwari makato acel, utmegiwa alip ki alip i twok lobo lung kibedo ka unogi dok bene kitweyogi i buc pienni gitiyo pi Jehovah. Jami mutimme i komgi-ni nyuto ni i kare me atematema, Jehovah kweyo cwiny luticce. Me labolle, ominwa acel i lobo me Soviet Union kitweyo i buc pi mwaki 23 kulu pi niyene. Kadi bed kit meno, kicwalo cam me cwiny bote wek ojing en dok okwe cwinye. En owaco ni: “Pi mwaki magi ducu ma abedo i buc-ci, apwonyo kit me keto gen i kom Jehovah kun anongo kero ki bote.”—Kwan 1 Petero 5:6, 7.
20. Pingo waromo bedo ki gen ni Jehovah pe biwekowa ata?
20 Ma lubbe ki peko mo keken ma wabirwatte kwede, wiwa myero opo i kom lok man me kwe cwiny ma laco jabuli ocoyo ni: “Rwot [Jehovah] pe bibwoto jone.” (Jab. 94:14) Kadi bed wamito ni kikwe cwinywa, wan bene watye ki mot madit me kweyo cwiny jo mukene. Kit ma wabineno kwede i pwony ma lubo man, wan bene waromo kweyo cwiny jo ma gikumo i lobo man ma opong ki ayelayela-ni.
In Iromo Gamone Ningo?
• Pekki mene ma giromo keliwa par?
• I yo ango ma Jehovah kweyo kwede cwiny luticce?
• Ka wakemme ki to, ngo ma romo kweyo cwinywa?
Bok/Cal ma tye i pot karatac 23]
KIT ME LWENY KI JAMI MA TWERO GUDO
▪ Cwinywa Jab. 147:3; 1 Jon 3:19-22; 5:14, 15
▪ Tamwa Jab. 94:19; Pil. 4:6, 7
▪ Kit ma wawinyo kwede Nia 14:13, 14; Nwo. 31:7, 8
▪ Yotkomwa 2 Kor. 4:8, 9
▪ Yotkomwa me cwiny Jab. 145:14; Yak. 5:14, 15