Kit me Kweyo Cwiny Jo ma Kinywarogi (Bute Me 4 I Kin Pwony 4)

1-2. (a) Labol ango ma nyuto ni dano ducu kinywalogi ki miti me nongo kwe cwiny dok gitye ki kero me miyone? (b) I yo ma nining ma kiwano kwede lutino mukene?

DANO ducu kinywalogi ki miti me nongo kwe cwiny dok gitye ki kero me kweyo cwiny jo mukene. Me labolle, ka latin matidi tye ka tuku ci opoto owano conge, en pol kare ringo bot Mamane nyo Babane. Lunywalle pe giromo cango bur meno, ento giromo kweyo cwinye. Guromo penyo latin-ni gin mutimme, gidunyo pig wange, ci giloko lok ma kweyo cwinye kun ginyutte mar, dok giromo bene keto yat i wang bur meno nyo giboyo woko. Ma pe orii, latin-ni ling woko dok romo dok cen ka tuku. I nge kare mo, conge-ni cang maber.

² Ento i kine mukene, kiwano lutino i yo marac adada. Lutino mogo kinywarogi i yo me buto. Lutino mogo kinywarogi kicel keken, ento mukene kinywarogi tyen mapol pi mwaki mapol. Kadi bed otimme kicel nyo tyen mapol, tim ma kit man weko bur matut i kwo pa latin. I kare mukene, kimako ngat ma onywaro latin-ni dok kimine pwod. I kine mukene, labal-li pe nongo pwod mo. Ento kadi bed kimiyo pwod ki labal-li cutcut, latin ma kinywaro-ni bedo ki arem cwiny kadi ka odoko dit.

3. Kit ma kitito kwede i 2 Jo Korint 1:3, 4, miti pa Jehovah tye ningo, dok lapeny mene ma wabinyamo?

³ Ka omego nyo lamego mo ma kinywaro i kare me tinone pud tye ka lweny ki arem cwiny pi tim meno, kony ango ma tye pire? (Kwan 2 Jo Korint 1:3, 4.) Nen ka maleng ni, miti pa Jehovah tye ni romine gunong mar ki kwe cwiny ma gimito. Kong dong wanyamu lapeny adek magi: (1)  Pingo jo ma kinywarogi i kare ma gitino gimito kwe cwiny? (2) Anga ma twero kweyo cwinygi? (3) Watwero kweyo cwinygi i yo maber nining?

PINGO KWE CWINY MITTE?

4-5. (a) Pingo pire tek me niang ni lutino pat ki ludito? (b) Ka kinywaro latin moni, meno gudo genne i kom jo mukene nining?

⁴ Jo mogo ma kinywarogi i kare ma gitino pud gimito kwe cwiny kadi wa i nge mwaki mapol. Pingo? Me niang pingone, omyero kong wange ni lutino gipat adada ki ludito. Tim marac gudo latin i yo marac makato dano madit. Nen kong labol mogo.

⁵ Lutino gitye ki miti me bedo ki wat macok dok ki gen i kom jo ma gwokogi. Wat ma kit man weko giwinyo agonya dok pwonyogi kit me geno jo ma marogi. (Jab. 22:9) Tye me cwercwiny ni, pol pa lutino ma kinywarogi, kinywarogi ki i pacogi, dok pol jo ma nywarogi gubedo wadi nyo lurem macok. Turo gen pa latin i yo ma kit man twero weko doko tek bot latin me geno ngat mo keken, kadi wa i nge mwaki mapol.

6. Pingo nywaro lutino i yo me buto obedo tim marac ma kelo awano madit?

⁶ Lutino pe gitwero gwokke kengi, dok nywarogi i yo me buto obedo tim malik ma wanogi marac adada. Diyo lutino i tim me buto tektek ma peya guteggi i komgi, tamgi, nyo cwinygi dok ma karegi me rwatte i buto mupore i nyom peya oromo, twero kelo adwogi marac i kwogi. Ka ngat mo onywaro latin, man weko latin bedo ki tam ma pe tye atir i kom rwatte i buto, dok winyo ni konye pe, kun pe geno ngat mo.

7. (a) Pingo yot adada pi jo ma gitye ki cwiny marac me bwolo lutino, dok gitwero timo man nining? (b) Goba ma kit meno twero kelo adwogi ango?

⁷ Lutino pud peya gitye ki kero me tam matut ki moko tam, nyo me ngeyo ki gwokke ki i kom jami maraco calo ludito. (1 Kor. 13:11) Pi meno, yot adada pi jo ma gitye ki cwiny marac me bwolo lutino. Jo ma nywaro lutino gipwonyo lutino ki goba maraco adada, me labolle, giwaco ni bal-li obedo bal pa latin, ni lok man omyero pe ongene, ni pe tye ngat mo ma paro dok ma mito winyo lok meno kadi latin odoti, nyo bene ni tim buto i kin ludito ki lutino obedo yo acel me nyuto mar ma pe rac. Goba ma kit man twero nyweno wi latin ka odok i lok me buto pi mwaki mapol. Latin ma kit meno twero dongo ma tamo ni en konye pe, cwinye bedo ka pide dok tamo ni pe epore me nongo mar nyo kwe cwiny, kadi wa ki bot Lubanga.

8. Pingo watwero bedo labongo akalakala mo ni Jehovah twero kweyo cwiny jo ma gitye ki arem?

⁸ Dong pe tye me ur ni nywaro lutino i yo me buto kelo adwogi marac ma ri pi kwogi ducu. Man pud dong obedo tim marac dok macilo adada! Nya pa tim me nywaro lutino nyuto ka maleng ni watye ka kwo i kare me agikki, ma jo mapol ‘pe gimaro dano wadgi’ dok ‘jo maraco ki jo ma lugoba gitye ka medde ki bedo marac makato kare.’ (2 Tem. 3:1-5, 13) Tic pa Catan rac adada, dok tye me cwercwiny ka dano gitimo jami ma Larac-ci mito. Ento, Jehovah tek loyo Catan nyo luticce. En ngeyo jami ducu ma Catan timo. Watwero bedo labongo akalakala mo ni Jehovah ngeyo arem ma wakato ki iye, dok en twero miniwa kwe cwiny ma wamito. Watye ki mot ni watiyo pi “Lubanga ma kweyo cwiny dano ducu. En kweyo cwinywa i can ducu ma walimo, wek wan bene wabed ki twero me kweyo cwiny jo ma tye ki can mo mapatpat, kun wakweyo cwinygi i kit yo acel-lu ma Lubanga okweyo kwede cwinywa-ni.” (2 Kor. 1:3, 4) Anga kono ma Jehovah tiyo kwede me miyo kwe cwiny?

ANGA MA TWERO KWEYO CWINY JO MA KINYWAROGI?

9. Ma lubbe ki lok pa Kabaka Daudi i Jabuli 27:10, ngo ma Jehovah bitimo pi jo ma lupacogi okwerogi woko?

⁹ Jo ma lunyodogi pe ogwokogi nyo ma jo macok kwedgi aye onywarogi gimito kwe cwiny madwong. Kabaka Daudi oniang ni Jehovah aye ngat ma watwero geno ni bikweyo cwinywa kare ducu. (Kwan Jabuli 27:10.) Daudi onongo tye ki niye ni Jehovah bibedo Wego bot jo ma lupacogi okwerogi woko. Jehovah timo man nining? En tiyo ki luticce ma lugen. Omegiwa ki lumegiwa me kacokke gitye calo jo me ot botwa. Me labolle, Yecu oloko i kom jo ma guribbe kwede i woro Jehovah ni gubedo omegine, lumegine, ki mine.​—Mat. 12:48-50.

10. Lakwena Paulo oloko nining i kom ticce macalo laelda?

¹⁰ Nen kong labol i kom kit ma jo me kacokke gitwero doko calo jo me pacowa. Lakwena Paulo onongo obedo laelda ma lagen dok ma tiyo matek. En oweko lanen maber, dok cwiny maleng oweko en otito ki jo mukene ni gulub lanene, kit ma en elubo kwede lanen pa Kricito. (1 Kor. 11:1) Nen kong kit ma Paulo oloko kwede i kom ticce macalo laelda: ‘Ento yam wabedo mamwol i kinwu macalo mego ma gwoko litinone.’ (1 Tec. 2:7) Luelda ma lugen i kare-ni bene giloko ki mwolo dok ki kica ka gitye ka tic ki ginacoya me kweyo cwiny jo ma mito kony.

11. Ngo ma nyuto ni pe luelda keken aye myero gumi kwe cwiny?

¹¹ Tika luelda keken aye gikweyo cwiny jo ma kinywarogi? Pe. Wan ducu watye ki tic me ‘kweyo cwinywa kekenwa.’ (1 Tec. 4:17) Lumegiwa ma guteggi gitwero miyo kony maber adada bot lumege ma gimito kwe cwiny. Rwatte mada ni Lubanga Jehovah opore kekene ki mego ma kweyo cwiny latinne. (Ic. 66:13) Baibul tye ki lanen mapol pa mon ma gukweyo cwiny jo ma onongo gitye i peko. (Yubu 42:11) Jehovah pud dong bedo ki yomcwiny madit ka neno mon ma Lukricitayo i kare-ni ma gikweyo cwiny lumegigi ma tye ki arem cwiny! I kare mogo, luelda gipenyo lamego mo muteggi ka en twero konyo laminwa mo ma tye ki peko man.b

WATWERO MIYO KWE CWINY NINING?

12. Gin ango ma omyero wagwokke ki timone?

¹² Ngene kene ni, omyero wagwokke pe me penyo jami ma Lakricitayo moni pe winyo agonya me lok iye. (1 Tec. 4:11) Ento, ngo ma watwero timo pi jo ma gimito kony ki kwe cwiny? Kong wanenu jami abic ma wapwonyo ki i Baibul ma twero konyowa me kweyo cwiny jo mukene.

13. Kit ma kitito kwede i 1 Luker 19:5-8, gin ango ma lamalaika pa Jehovah otimo pi Elia, dok watwero lubo lanene nining?

¹³ Tim gin mo me konyo dano meno. I kare ma lanebi Elia onongo tye ka ngwec me laro kwone, cwinye otur marac adada ma onongo mito to woko. Jehovah ocwalo lamalaika mo me limo ki cuko cwiny Elia. Lamalaika-ni omiyo kony ma Elia mito i cawa meno kikome. En otedo cam mo manok pi Elia dok ocuko cwinye ni ocam. (Kwan 1 Luker 19:5-8.) Gin mutimme meno pwonyowa lok ada ma pire tek man: I kare mukene gin mo matidi ma watimo me nyuto kica twero kelo adwogi maber adada. Watwero nyuto ni wamaro ominwa nyo laminwa mo ma tye ki cwercwiny ka watimo gin mo pire calo tedo dek, mine mot mo matidi, nyo coyo kad mo me cuko cwinye. Ka pe wawinyo agonya me lok ki ngat-ti i kom kit ma en winyo kwede, ci watwero miyo kony i yo ma kitito malo-ni.

14. Pwony ango ma wanongo ki i gin mutimme i kom Elia?

¹⁴ Wek ngat ma cwinye otur-ni obed labongo lworo dok owiny agonya. Waromo nongo pwony mukene ki i gin mutimme i kom Elia. Jehovah otimo tango ma oweko lanebi man owoto wot mabor adada wa i wi Got Koreb. Nen calo Elia owinyo agonya i kabedo mabor man, ka ma onongo mwaki miya mapol angec Jehovah omoko gicikke ki jone. Romo bedo ni en otamo ni dong etye bor ki jo ma gimito neke. Pwony ango ma watwero nongo? Ka wamito kweyo cwiny jo ma kinywarogi, omyero kong wawek gubed agonya dok labongo lworo. Me labolle, luelda omyero wigi opo ni lamego ma tye ki arem cwiny matek twero bedo agonya ka tye ka mato cai i gange loyo ka kiloko kwede ki i Ot me Ker. Mukene dok romo winyo agonya ki i Ot me Ker aye ento pe ki gang.

15-16. Bedo ngat ma winyo lok maber kwako ngo?

¹⁵ Bed ngat ma winyo lok maber. Baibul miyo tam ma atir man: “Dano acel acel myero owiny lok oyotoyot, ento pe myero orune me gamone.” (Yak. 1:19) Tika wabedo jo ma giwinyo lok maber? Waromo tamo ni wek wabed jo ma winyo lok, omyero wanen wang ngat meno laling labongo waco gin mo. Ento bedo ngat ma winyo lok kwako jami mapol. Me labolle, Elia otito cwercwinye bot Jehovah, dok Jehovah owinyo lokke. Jehovah oniang ni Elia onongo lworo omako, winyo calo etye kene, dok tamo ni ticce ducu konye pe. Ki mar, Jehovah ocobo pekone magi ki acel acel. En onyuto ni ada ewinyo lok pa Elia.​—1 Luker 19:9-11, 15-18.

¹⁶ Ka watye ka winyo lok pa omego nyo lamego mo, wanyuto ni wamare dok waparo pire nining? I kare mukene, lok mogo ma wayero ki diro twero nyuto kit ma wawinyo kwede. Iromo wacci: “Awinyo marac adada ni gin ma kit man otimme i komi! Pe omyero kiter latin mo keken marac kit meno!” Itwero bene penyo lapeny mogo manok me niang gin ma omego nyo lamego meno tye ka wacone. Itwero penye ni, “Itwero tita kong wek aniang maber gin ma itye ka wacone?” nyo “Aniang lokki-ni kit man . . . Tika aniang kakare?” Lok me mar ma kit meno twero cuko cwiny ngat-ti ni ada itye ka winyo lokke, dok itye ka yelle me niang maber.​—1 Kor. 13:4, 7.

17. Pingo omyero wadi cwinywa kun pe ‘warune me gamo’ lok?

¹⁷ Gwokke adada ki ‘rune me gamo’ lok. Pe ingol doge ka en tye ka lok kun imiye tam nyo itiro tamme ma pe tye atir. Di cwinyi! I kare ma Elia otito tamme bot Jehovah, en oloko ki kiniga. I ngeye lacen, Jehovah ojingo niye pa Elia, ento en pud otito tamme ki kiniga aye kun nwoyo lokke macon ca. (1 Luker 19:9, 10, 13, 14) Man pwonyowa gin ango? I kare mukene mitte ni ngat ma cwinye tye ka cwer-ni otit kit ma en winyo kwede tyen mapol. Omyero wabed calo Jehovah, kun wawinyo lokke mot ma wadiyo cwinywa. Me ka rune me waco gin ma myero ngat meno otim, omyero wanyut cwiny me kica.​—1 Pet. 3:8.

18. Legawa twero bedo me kwe cwiny bot jo ma gitye ki arem nining?

¹⁸ Leg kacel ki ngat ma tye ki arem kun itito kit ma Jehovah ki utmege me kacokke gimare kwede. Jo ma gitye ki turcwiny giromo winyo calo pe gitwero lega. Ngat meno twero winyo calo pe epore me lok ki Jehovah. Ka wamito kweyo cwinye, watwero lega kacel kwede kun walwongo nyinge. Watwero waco ki Jehovah kit ma wan kacel ki jo me kacokke wamaro kwede ngat ma cwinye otur-ri. Watwero lego Jehovah ni okwe dok ojing cwiny romone man ma pire tek tutwal-li. Lega ma kit man twero kweyo cwiny ngat-ti matek adada.​—Yak. 5:16.

19. Gin ango ma twero konyowa me yubbe me kweyo cwiny dano?

¹⁹ Omyero iyer nyig lok ma cango dano dok ma cuko cwinygi. Tam ma peya iloko. Lok ma kiloko ata twero cwero cwiny dano adada. Lok me kica kweyo cwiny dano. (Car. 12:18) Leg bot Jehovah wek okonyi me nongo nyig lok me kica ma twero kweyo cwiny ngat meno. Wi myero opo ni pe tye lok mo ma twero konyo dano makato lok pa Jehovah ma tye i Baibul.​—Ibru 4:12.

20. Tam ango ma omege nyo lumegiwa mogo ma kinywarogi gitye kwede i komgi kekengi dok gin ango ma wamito ni gunge?

²⁰ Omege ki lumege mogo ma kinywarogi dong gumoko i cwinygi ni komgi cilo, konygi pe, pe kimarogi nyo bene ni girac ma pe tye ngat mo ma twero marogi. Man obedo lok ma pe tye atir! Pi meno, ti ki Ginacoya me poyo wigi ni Jehovah marogi matek. (Nen bok ma wiye tye ni “Cuko Cwiny ma Tye i Ginacoya.”) Wi opo kit ma Jehovah otiyo ki lamalaika me jingo cwiny lanebi Daniel i kare ma cwinye otur. Jehovah onongo mito ni Daniel oniang ni pire tek bote. (Dan. 10:2, 11, 19) I yo acel-li, omege ki lumegiwa ma cwinygi cwer pigi tek bot Jehovah!

21. Gin ango ma bitimme i kom lutim maraco ma pe giye ngut, ento gin ango ma wan ducu omyero wamok tamwa me timone i kare man?

²¹ Ka wakweyo cwiny jo mukene, wapoyo wigi i kom mar pa Jehovah. Wiwa myero pe owil ni Jehovah obedo Lubanga ma ngolo kop atir. Pe tye tim mo keken me nywaro lutino ma en pe neno. Jehovah neno jami ducu, dok en bimiyo pwod ki jo ma nywaro lutino ma pe gungut. (Wel 14:18) Pi kare-ni, watute wunu me nyuto mar bot jo ma kinywarogi. Ma dong ber loyo, kweyo cwinywa me ngeyo ni Jehovah bicango matwal arem ducu ma Catan ki lobone okelo i kom dano! Cokcok-ki, wi dano dong pe bipo i kom jami ma kelo arem i cwinygi.​—Ic. 65:17.