Tika Lubanga Aye Tye ka Pwodowa?

I kare ma oyengyeng ki tsunami (nam ma tugge dok tinge pi oyengyeng) magwar otimme i lobo Japan i dwe me adek i mwaka 2011, lawibye mo acel owaco ni “atamo-ni man obedo pwod mua ki bot Lubanga.”

I kare ma oyengyeng oneko dano makato 220,000 i lobo Haiti i dwe me acel i mwaka 2010, laco mo acel ma oywek dok pwonyo lok me dini i Telebijon owacci man otimme pien jo me lobo meno “gukwongo kwong ki Larac-ci” dok bene mitte ni “myero gulokke gudok bot lubanga.”

I kare ma dano 79 guto i boma me Manila i lobo Pilipi, padi mo me dini Katoli owaco ni, “Lubanga onongo mito tugo cwinywa ma ngoliwa kop-pi.” Karatac akwana mo acel omiyo ripot ni “pacen ma romo 21 pa dano madito gitye ki ye ni Lubanga tye ka nyuto akemone kun tiyo ki ngom ma muk ki dong jami mogo mukene calo pii ma pong nyo lut kotgi-ni” ma nongo kare ki kare gibedo ka kelo ayela i lobo moni.

KODI lok man ni Lubanga aye kelo jami maraco me pwodowa ni ocakke wacon. I mwaka 1755, i kare ma dano 60,000 guto i oyengyeng ki mac kacel ki tsunami i boma me Lisbon i lobo Portugal, latam mo matut dok ngene matek openye ni: “Mono kinongo ni bal maraco dok pol i Lisbon makato boma me Paris?” Ki lok ada dano mapol gitye ki akalakala ka Lubanga tye ka tic ki peko ma poto atura me pwodo dano. I lobbe ma dwong kodi peko ma kit magi dano giwacci gubedo yub pa Lubanga.

Dong ma lubbe ki lok magi ducu, omyero wapenye ni: Tika ada Lubanga tye ka tic ki peko ma poto atura me pwodo dano? Mono jami maraco ma gunya tutwal i kare ma cokcok-ki gitye pwod ma a ki bot Lubanga?

Pi kit ma dano girune kwede me coko dog Lubanga, jo mukene ginyuto jami mogo ma gutimme i kare me Baibul ma Lubanga otiyo ki jami macalo magi me pwodo dano. (Acakki 7:17-22; 18:20; 19:24, 25; Wel 16:31-35) Kitungcel ka wangiyo jami magi ma gutimme i Baibul-li ki acel acel, ginyuto ni tye jami adek ma pokogi woko ki ma i kare-ni. Mukwongo, inongo kong kicako ki poyo wi dano. Me aryone, pe calo peko me kare-ni, ma neko dano lawang acel ma kitgi beco wa ki maracone, ka Lubanga balo lobo onongo en poko kin jo maraco ki mabeco woko. Jo ma dong kitgi raco adada ma bene gikwero winyo lokke aye onongo en tyekogi woko. Me agikkine, Lubanga onongo nyuto kwene ma jone ma winye gilaro iye kwogi.​—Acakki 7:1, 23; 19:15-17; Wel 16:23-27.

Lwak peko ma poto atura ma oneko dano milion mapol ata i kare-ni, pe tye gin mo ma nyuto atir ka maleng ni Lubanga aye tye ka kelone. Ci dong mono ngo ma tye ka weko jami magi tye ka nya medde ameda? Wan watwero lweny ki pako magi nining? Tika kare mo bibino ma dano bibedo labongo peko-ni? Ibinongo lagam me lapeny magi i pwony ma gilubo man.