Ti Pi Lubanga Ma Miyo Ibedo Agonya

“Pien maro Lubanga en aye gwoko cikke. Dok cikke pe nurowa.”​—1 JON 5:3.

TIKA ITWERO GAMONE?

I yo ango ma Catan temme kwede me bwolowa wek watam ni cik pa Lubanga lubone tek?

Pingo omyero wagwokke adada ki lurem ma wamakogi?

Ngo ma bikonyowa me bedo lugen bot Lubanga ma miyo wabedo agonya-ni?

1. Jehovah neno bedo agonya nining, dok bedo agonya ango ma en omiyo bot Adam gin ki Kawa?

JEHOVAH keken aye tye Ngat ma bedo agonya kare ducu. Ento en pe tiyo ki bedo angonyane-ni i yo marac, dok bene pe diyo luticce i gin mo keken ma gitimo. Ma ka meno, en ominigi kero me bedo agonya me moko tamgi pigi kengi kun gicobo mitigi i yo matir. Me lapore, Lubanga omiyo bot Adam gin ki Kawa cik acel keken​—ogengogi pe me camo nyig “yat me ngeyo gin maber ki marac.” (Acak. 2:17) Man onongo weko twere botgi me timo miti pa Lubanga kun gibedo angonya.

2. Pingo Adam gin Kawa gudoko opii pa bal?

² Pingo Lubanga oye ni lunyodowa mukwongo, Adam gin ki Kawa, gubed agonya? En ocweyogi i calle kikome ci ominigi cwiny ma ngoligi kop, kun geno ni margi pire macalo Lacwecgi bimiyo gilubo yo matir. (Acak. 1:27; Rom. 2:15) Rac tutwal ni Adam gin ki Kawa pe gubedo ki pwoc i kom Ngat ma Ominigi Kwo ki dong bedo agonya-ni. Ento inongo ni gin guyero bedo angonya marac ma Catan ominigi, me bedo ki cwiny me lone kengi. Man oweko inongo ni ma ka bedo agonya kit ma igi mito, gin gucate kengi ki likwayogi i te loc pa bal ma adwogine okelo to.​—Rom. 5:12.

3, 4. Catan temme me bwolowa nining ka odok i lok me lubo cik pa Jehovah?

³ Ka Catan romo bwolo jo aryo ma gipe ki roc wa ki lumalaika mapol me jemo i kom twero me loc pa Lubanga, ci en romo bwolo wan bene. Diro me bwolane peya olokke. En temme me bwolowa wek watam ni cik pa Lubanga lubone tek, ma weko wakeng bedo ki yomcwiny. (1 Jon 5:3) Tam ma kit meno romo ketowa i lyeto ka wabedo ka ribbe ki jo ma gitiyo ki kodi tam man. Laminwa mo acel ma odonyo i tim tarwang kun mwakane tye 24 owacci: “Abedo ka ye tam maraco ma lurema gubedo ka miyone bota, pienni abedo ki lworo ni tamma myero pe opokke ki megi.” Oromo bedo ni in bene luwoti gutemo diyi.

⁴ Tye me cwercwiny tutwal ka i kine mukene bene omege ki lumege mogo gimiyo tam maraco. Lacaden mo acel ma pud tye bulu owacci: “Angeyo jo mogo ma pud mwakagi tino ma gudonyo i winye ki jo ma pe gin Lucaden.” En omedo ni: “Lacen, kwona ocako lokke calo megi, pien abedo ka wire kwedgi cawa ducu. Watta ki Jehovah ocako doko goro. Kadi bed acit i cokke pe bene aniang gin mo, awire kicel kicel adada i ticwa me pwony. Man obedo lanyut bota ni omyero agik wire woko ki lurem magi maraco-ni, ci bene atimo kumeno!” Tika dong iniang kit ma bedo ki lurem maraco twero balo kwede kit mabeco? Nen kong kit ma labol mo acel ma kikwanyo ki i Baibul romo konyi kwede i kare-ni.​—Rom. 15:4.

EN OYWAYO CWINY JO ICRAEL DUCU I KOME

5, 6. I yo ango ma Abcalom obwolo jo Icrael, ento pulanne-ni tika ocobbe?

⁵ Baibul tye ki lanen mapol madok i kom jo ma gubwolo luwotgi me timo gin marac. Labol acel aye Abcalom wod pa Kabaka Daudi. Abcalom onongo tye laco mo maleng adada. Ento i kare mo, calo Catan, en oweko miti marac me leyo ka wonne macalo kabaka obwoye woko, kun onongo en aye pe bileyo kom ker.a Kun tuko ki wi dano wek ema loc, Abcalom obedo ka timme wek Luicrael gunen ni emito konyogi, ma oweko onen calo iwacci Daudi onongo pe miyo kony. Calo kit ma Larac-ci obwolo kwede Adam gin ki Kawa-ni, Abcalom oweko Luicrael gucako tamo ni eparo pigi kun kitungcel waco lok goba mogo madongo i kom wonne.​—2 Cam. 15:1-5.

⁶ Tika pulan pa Abcalom-mi ocobbe? Olo ocobbe, pien Baibul waco ni: “Abcalom  .  .  . oywayo cwiny jo Icrael ducu odwoko i kome.” (2 Cam. 15:6) Ento i agikkine, ki loyo Abcalom i lweny ma obedo magwar adada. Ma dong lit loyo aye ni kineke woko kacel ki jo ma romo alip mapol ata ma en obwologi-ni.​—2 Cam. 18:7, 14-17.

7. Pwony ango ma wanongo ki i gin mutimme i kom Abcalom-mi? (Nen cal ma tye i pot karatac 19.)

⁷ Pingo Luicrael ma guye pulan pa Abcalom-mi bwologi obedo yot? Nen calo gubedo ki miti i kom jami ma Abcalom ocikke me timogi. Nyo leng pa Abcalom-mi aye nen calo oumo wanggi. Kadi bed tye tyen lok mukene, ento gin ma wangeyo aye ene: Gin pe gubedo lugen bot Jehovah kacel ki kabaka ma en ocimo. I kare-ni bene, Catan pud tye ka tic ki “Abcalom” i tutene me ywayo cwiny lutic pa Jehovah. Jo mukene giwacci ‘lubo cik pa Jehovah tek loyowa bedo i buc. Nen kong jo ma pe gitiyo pi Jehovah. Gimwodo kwo ma kuc ki yomcwiny obwoyogi woko!’ Ka iwinyo kodi lok man, tika ibibedo lagen bot Lubanga kun itero ni man obedo lok me bwolo ma tere otuc? Tika ibiniang ni “cik maber” pa Jehovah ki cik pa Kricito keken aye gibimiyo inongo bedo agonya kikome? (Yak. 1:25) Ka tye kumeno, ci tergi calo cik ma pigi tek, dok pe iti i yo marac ki bedo agonya ma itye kwede calo Lakricitayo-ni.​—Kwan 1 Petero 2:16.

8. Gin ango mutimme i kwo pa jo mogo ma nyuto ni turo cik pa Jehovah pe kelo yomcwiny?

⁸ Jo matino aye Catan ciko wange i komgi loyo. Omego mo ma mwakane tye 30 ki wiye oloko kuman ma lubbe ki kare ma mwakane onongo tye apar ki wiye: “Abedo ka neno cik pa Jehovah calo gin ma diya.” Macalo adwogine, en odonyo i tim tarwang. Ento man okelle cwercwiny. En owacci: “Cwinya obedo ka ngola kop dok akoko ange pi mwaki mapol.” Laminwa acel ocoyo kuman ma lubbe ki kare ma mwakane onongo tye apar ki wiye: “I nge donyo i tim tarwang, cwinya ocwer dok anongo ni atwon laming ma konya pe. Kadi bed mwaki 19 dong okato, pud wiya po i kom gin man marac-ci.” Laminwa mo acel bene owacci: “Tam moni ni jami ma atimogi turo cwiny jo ma amarogi-ni balo tamma, niyena, ki dong cwinya. Tek tutwal me kwo labongo cwak pa Jehovah.” Catan pe mito ni itam i kom adwogi magi ma bal kelo-ni.

9. (a) Lapeny mene ma gikonyowa me ngine kekenwa ma lubbe ki kit ma waneno kwede Jehovah kacel ki cikke? (b) Pingo pire tek ni myero wange Jehovah maber adada?

⁹ Tye me cwercwiny ni jo matino ma gitye i ada, kadiwa jo madito bene, gunongo pwony i yo malit ni yomcwiny me bal wang ma otero cinggi! (Gal. 6:7, 8) Penye kekeni ni: ‘Tika dong aniang diro ma Catan tiyo kwede me bwolo dano?’ ‘Tika aneno Jehovah calo Larema macok adada, ma kare ducu waco lok ada dok mito ni abed ki kwo maber?’ ‘Tika atye ki gen muromo ni en pe bitwona gin mo keken maber ma bikela yomcwiny madit?’ (Kwan Icaya 48:17, 18.) Me gamo lapeny magi ma cwinyi pe kalo akala, omyero inge Jehovah maber adada. Omyero inge en i yo matut kun wi po ni cik me Baibul nyuto marre piri dok mito ni ibed agonya.​—Jab. 25:14.

LEG PI CWINY ME RYEKO

10. Pingo omyero watute me lubo lanen pa Kabaka Solomon?

¹⁰ I kare ma pud tye awobi matidi, Solomon olego ki cwiny me mwolo ni: “An latin, ma pe angeyo loyo dano.” Lacen en olego pi cwiny me ryeko. (1 Luker 3:7-9, 12) Jehovah ogamo lega meno me mwolo-ni, dok en bigamo legani bene kadi bed itidi nyo idit. Tye kono ni Jehovah pe bimini niango nyo ryeko i yo me tango. Ento en bimini ryeko ka ce i kwano Lokke ki cwinyi ducu, ilego pi cwiny mere maleng, dok ilubo tira kacel ki pwony ma inongo ki i kacokke. (Yak. 1:5) Kun tiyo ki yo magi, Jehovah miyo ryeko bot luticce ma gitino me bedo ryek loyo jo ma pe gilubo tirane, kadi wa jo ma giwacci gin “luryeko ki lunge-piny” me lobo-ni.​—Luka 10:21; kwan Jabuli 119:98-100.

11-13. (a) Pwony ango ma pigi tego ma wanongo ki i Jabuli 26:4, Carolok 13:20, ki 1 Jo Korint 15:33? (b) I yo ango ma itwero tic ki pwony magi i kwoni?

¹¹ Tam kong i kom ginacoya magi ma ginyuto kit ma pire tek kwede me kwano Baibul ki dok lwodo lok i kom gin ma wakwanogi wek wange Jehovah maber adada. Gin ducu gitye ki cik ma igi lac ma gikonyo i kit me yero lurem: “Pe abedo kacel ki jo ma lugoba [gikano kitgi], dok pe aribbe ki jo ma lubwola.” (Jab. 26:4) “Ngat ma bedo kacel ki jo maryek pwonnye doko ryek bene, ento ngat ma mako lurem ki luming kite biballe woko.” (Car. 13:20) “Pe wuwek gibwolwu: ‘Bedo ki jo maraco balo kit mabeco.’”​—1 Kor. 15:33.

¹² Pwony ango ma pigi tego ma wanongo ki i ginacoya magi? (1) Jehovah mito ni pe myero wamak lurem ata. En mito gwokowa ki i jami ma wanowa ki dong balo watwa kwede. (2) Luremwa giromo weko watimo jami maraco nyo mabeco; meno gin ma timme kare ki kare. Kit ma kicoyo kwede tyeng magi nyuto ni Jehovah mito ni lokke ogud cwinywa. Nining? Ka ineno mot, tyeng magi pe kicoyogi calo cik ni “omyero pe . . . ” Ento kicoyogi calo lok ada ma niang iye yot. Waromo dolo tere i yo macek ni Jehovah tye ka wacciwa ni: ‘Magi aye lok ada. Ngo ma dong ibitimo? Itamo iye ningo?’

¹³ Pien tyeng magi gitye lok ada, gitiyo wa i kare-ni dok i kabedo ducu me kwowa. Me laporre, kong dong ipenye ki lapeny calo: I yo ango ma atwero gwokke kwede ki i kom “jo ma lugoba [gikano kitgi]”? I yo mene ma an atwero rwatte kwede ki jo magi? (Car. 3:32; 6:12) Angagi ma gubedo “jo maryek” ma Jehovah mito ni abed kacel kwedgi-ni? Angagi ma gubedo “luming” ma en mito ni myero pe abed kwedgi-ni? (Jab. 111:10; 112:1; Car. 1:7) “Kit mabeco” ango ma abibalo ka ce aribbe ki jo maraco? Lurem maraco mono gitye i lobo keken? (2 Pet. 2:1-3) In mono itwero gamo lapeny magi nining?

14. In itwero weko otyeno me Woro pi Jo me Ot bedo me kony nining?

¹⁴ I nge nyamo Ginacoya adek magi, pingo pe kong ingi tyeng mogo me Baibul ma ginyuto kit ma Lubanga neno kwede jami ma gudo kwoni ki jo me odi?b Lunyodo, wutam matut me nyamo tyeng magi i cawa me otyeno me Woro pi Jo me Ot. Ka wutimo meno, nen ni wukonyo dano acel acel me otwu me bedo ki pwoc pi mar ma Lubanga onyuto botwa ma lubbe ki kit ma kicoyo i cikke. (Jab. 119:72) Ada, kwan ma kit meno myero onyik jo me ot ducu cok ki Jehovah ki bene i kingi.

15. Itwero ngeyone nining ni itye ka dongo cwiny me ryeko?

¹⁵ Itwero ngeyone nining ni itye ka dongo cwiny me ryeko? Yo acel aye me poro tammi ki tam pa jo ma lugen me kare macon, calo Kabaka Daudi, ma ocoyo ni: ‘Cwinya bedo yom me tiyo gin ducu ma imito, ai Lubanga; amako cikki dok agwoko tye i cwinya.’ (Jab. 40:8) I yo acelli bene, laco Jabuli cura 119 owaco ni: ‘Amaro cikki twatwal! Abedo ka lwodo lok i kom cikki dyeceng jwi.’ (Jab. 119:97) Omyero wati matek me bedo ki mar ma kit man. Ma te lokke ni omyero wakwan i yo matut kekenwa, walegi, dok walwod lok i kom jami ma wakwanogi. Mar man bene dongo ka ineno ni lubo cik pa Jehovah tye ka kelo mot mapol i kwoni.​—Jab. 34:8.

LWENY PI BEDO AGONYA NI MACALO LAKRICITAYO!

16. Gin ango ma wiwa myero opo iye ka wamito ni walo lweny wek wabed agonya?

¹⁶ Pi mwaki mapol i tekwaro pa dano, lobbe gimine me lweny wek gibed agonya. Man nyuto ni myero dong imine i yo ducu me lweny wek igwok bedo agonya ni macalo Lakricitayo! Wi myero opo ni lumoneni pe obedo Catan, lobo kacel ki cwinye marac-ci keken. Omyero bene ilweny ki roc ma itye kwede, ma man kwako bedo ki cwiny me bwola. (Jer. 17:9; Ep. 2:3) Kikony pa Jehovah, iromo loyo lweny man. Tye adwogi aryo ma bino ka cawa ducu iyero me timo gin maber. Mukwongo, ibiyomo cwiny Jehovah. (Car. 27:11) Me aryo, ka ingeyo ni lubo “cik maber ma kelo kuc [bedo agonya]” ber piri, ibimoko tammi me donyo ki i “doggola mading” ma tero dano i kwo ma pe tum. Ci i anyim, Jehovah bimini bedo agonya ma en ocikke me miyone bot jo ma gin lugen.​—Yak. 1:25; Mat. 7:13, 14.

17. Pingo cwinywa myero pe oballe pi roc ma watye kwede, dok kony ango ma Jehovah miniwa?

¹⁷ I kine mukene, wan bene wabalo. (Latit. 7:20) Ka meno otimme pe iwek cwinyi oballe nyo itam ni konyi dong pe. Ento, peny pi kony ki bot luelda ma i kacokke. Yakobo ocoyo ni, ‘Legagi ma niye tye iye-ni bicango latwo, Rwot [Jehovah] bitinge malo; ka ce onongo yam otimo bal mo, ci gibitime iye kica.’ (Yak. 5:15) Wi pe myero owil ni Lubanga lakica dok ni en okeli i kacokke pien oneno gin mo maber ma iromo timone. (Kwan Jabuli 103:8, 9.) Jehovah bikonyi kare ducu ka itute me tic pire ki cwinyi ducu.​—1 Tekwaro 28:9.

18. Gin ango ma waromo timone ma lubbe ki lega pa Yecu ma kicoyo i Lakana 17:15?

¹⁸ I kare ma tye ka lega ki lukwenane 11 i dyewor me agikki ma en okwo kwede i lobo, Yecu olego lega man ma gudo cwiny tutwal-li pigi ni: “Akwayo ni igwokgi i bang Arac.” (Lakana 17:15, Baibul me Leb Lango) Yecu onongo pe tye ka paro pi lukwenane keken, ento lulub kore ducu. Pi meno, wageno ni Jehovah bigamo lega pa Yecu-ni kun gwokowa i kare man me agikki-ni. Carolok 2:7, 8 wacciwa ni Jehovah tye calo kwot bot jo ma winye, dok bene ‘bigwoko jo ma lugen bote.’ Pol kare pe yot me lubo cik pa Jehovah, ento meno aye yo acel keken ma terowa i kwo ma pe tum ki dong bedo agonya kikome. (Rom. 8:21) Pe iwek ngat mo omi ingak woko!

[Lok ma tye piny]

[Cal ma tye i pot karatac 19]

I yo ango ma watwero ngeyo kwede “Abcalom” me kare-ni kun wagwokke ki botgi?