Lubanga Paro pi Mon Dok Minigi Woro ki Deyo

IKARE ma Yecu tye i lobo, en onyuto maber adada kit pa Wonne ki dong yo ma En timo ki jami. En owacci: “Pe atiyo gin mo pira kena, ento aloko gin ma Wora opwonya iye . . . nino ducu atiyo gin ma iye mito.” (Jon 8:28, 29; Jo Kolocai 1:15) Pi meno, ka wakwano kit ma Yecu onongo tero dok loko ki mon, ci waniang kit ma Lubanga neno ki mon medo ki gin ma en mito ni gutim.

Ma lube ki lok ma kicoyo i Jiri, kit ma Yecu onongo neno kwede mon onongo pat adada ka i poro ki pa jo mukene. Onongo dok pat nining? Dong lapeny ma pire tek aye ni, tika pwony pa Yecu miyo mon me kare-ni bene gibedo agonya?

Kit ma Yecu Otero Kwede Mon

Ma lubbe ki tam pa lutela dini mogo pa Lujudaya, gin onongo giwacci lok ki dako moni tugo miti me buto i cwiny dano. Mon onongo pe kiye ni gulok ki co nyo bene me cito ka mo ma pe guumo wanggi ki labor wic ka gitye i kin dano pienni gimiyo ngat moni bedo ki atematema i cwinye. Ento kitungcel, Yecu omiyo tam bot co ni gudi miti me kom ma gitye kwede dok gumi deyo bot mon ma ka gengogi ni pe gubed i kin lwak.​—Matayo 5:28.

Yecu bene owacci: ‘Ka dano mo oryemo dakone woko, ce dok onyomo dako mukene, lanyom meno otimo abor, nongo obalo i nyim dakone.’ (Marako 10:11, 12) En okwero pwony ma onongo onya i kin piny ma ye ni co guryem mongi “pi tyen lok mo keken.” (Matayo 19:3, 9) Lok ni ngat moni nongo obalo i nyime dakone ka otimo abor-ni obedo gin manyen bot pol pa Lujudaya. Lupwonye dinigi onongo gipwoyo ni laco nongo pe obalo ka otimo abor ento dako keken aye romo timo abor! Buk mo acel ma loko i kom Baibul owaco kuman ni, “Pien Yecu onongo mito ni co ki mon ducu gukwo ma rom aroma dok i yo matir, man onyuto ka maleng ni en onongo miyo woro kacel ki deyo bot mon.”

Kit ma pwonye konyowa kwede i kare-ni: I kacokke pa Lucaden pa Jehovah, mon giboko lok ata ki co i cawa me cokke. Gin pe giketo cwinygi ni ngat mo i kingi oromo rukke marac nyo nyebbe i yo ma pe opore, pien co ma gin Lukricitayo gitero ‘mon madongo macalo megigi, ki mon matino macalo lumegigi, labongo tam mo marac.’​—1 Temceo 5:2.

Ka iporo ki pwony pa lutela dini pa Lujudaya, ma onongo pe gimito ni mon guwinyo piny-nyi, Yecu opwonyo mon dok ocuko cwinygi me tito tamgi. Yecu opwonyo Maliam pien en onongo ngeyo ni tic pa mon pe obedo me tedo i jokon keken. (Luka 10:38-42) Marita, lamin Maliam, bene onongo adwogi maber ki i pwony pa Yecu, ma lubbe ki lagam me ryeko ma en omiyo bot Yecu kare ma Lajaro oto.​—Jon 11:21-27.

Tam ma tye i cwiny mon onongo pire tek bot Yecu. I kare ca, mon me Judaya onongo gitamo ni wek inong yomcwiny, omyero inywal latin awobi ma kwiri dok ka twere myero obed lanebi. I kare ma dako mo odange ni, “Tye ki gum ic ma onywali,” Yecu otiyo ki cawa meno me tito bot dakoni gin maber pud dong loyo. (Luka 11:27, 28) Pien Yecu owacci winyo Lubanga pire tek, en onyuto bot dakoni gin maber kato tic me tekwaro ma onongo kiyimo i wi mon ni gutim.​—Jon 8:32.

Kit ma pwonye konyowa kwede i kare-ni: Co ma gimiyo pwony i kacokke gijolo lagam pa mon ka guilo cinggi i cawa me cokke. Gin ginyuto woro bot mon muteggi i yo me cwiny pien mon magi gitye “jo ma pwonyo gin maber,” dok man nen i lanengi kadi bed gitye kengi nyo i kin dano. (Tito 2:3) Co magi bene gijenge i kom mon ka odok i lok me tito kwena me Ker pa Lubanga.​—Jabuli 68:11; nen bok ma wi lokke tye ni “Lakwena Paulo Mono Ogengo Mon ni Pe Guloki?”

I kare me Baibul, lutino anyira onongo kinenogi calo jo ma konygi pe ka iporo ki lutino awobe. Kodi tam man kicoyo ka maleng i Talmud ni: “Ngat ma onywalo lutino awobe tye ki yomcwiny ento ngat ma onywalo lutino anyira bideno can.” Lunyodo mogo onongo gineno lutino anyira calo abar wic​—ginongo laco mo gidiyo i cinge ci giculo lim-akumu, dok bene ka dong guti pe gimito kony mo keken ki bot nyargi.

Yecu onyuto ni kwo pa lutino anyira matino bene rom aroma ki kwo pa lutino awobe​—en ocero nyar pa Yairo ki wod pa da-to mo me Nain. (Marako 5:35, 41, 42; Luka 7:11-15) I nge cango dako mo ma onongo “tye ki cen ma okelo goro i kome pi mwaka apar wiye aboro,” Yecu olwonge ni “nyar pa Abraim,” lwongo mo ma pe i buk pa Lujudaya. (Luka 13:10-16) Pien olwongo dako-ni ki woro dok ki kica, en onyuto ni dako man rom aroma ki ngat mo keken dok oneno niye matek ma en tye kwede.​—Luka 19:9; Jo Galatia 3:7.

Kit ma pwonye konyowa kwede i kare-ni; Carolok mo me lobo Acia wacci: “Pito latin anyaka rom ki kiro pii i poto pa jirani.” Wego ma Lakricitayo dok lamar pe ye kodi tam man mugom-mi, ento tero lutino ducu labongo apokapoka kadi bedo latin nyako nyo awobi. Lunyodo ma Lukricitayo giketo tek me culo lutinogi i cukul dok bene giterogi i ot yat ka komgi lit.

I kot pa Lujudaya, lok me caden ma dako miyo onongo kitero calo lok pa opii. Josephus, dano mukwongo kwano lok me tekwaro i cencwari me acel omiyo tam ni: “Pe myero kiye mon gumi caden i lok mo keken pien mon gitero jami i yo me tinotino dok giloko ata ma wigi tek.”

Ento Yecu onongo dok pat, pien en oweko mon gutito pi cerre. (Matayo 28:1, 8-10) Kadi bed ni mon magi ma gin lugen-ni guneno kit ma kineko ki dong kiyiko kwede Rwotgi, ento ye lokgi-ni obedo tek adada bot lukwena. (Matayo 27:55, 56, 61; Luka 24:10, 11) Ento, pienni en okwongo nen bot mon i nge cerre, man onyuto ni Kricito onongo tero mon calo jo ma pigi tek i miyo caden calo lupwonyene mukene-ni.​—Tic pa Lukwena 1:8, 14.

Kit ma pwonye konyowa kwede i kare-ni: I kin Lucaden pa Jehovah, co ma gitye ki tic i kacokke gijolo tam pa mon me nyuto ni giparo pigi. Kitungcel, luwi odi ma gin Lukricitayo gimiyo “deyo” bot mongi ka gitero itgi ka winyo lokgi.​—1 Petero 3:7; Acakki 21:12.

Cik ma Igi Lac me Baibul Kelo Yomcwiny Bot Mon

Ka co gilubo lanen pa Kricito, ci mon ginongo ni kiworogi dok gitye agonya kit ma Lubanga onongo oyubo kwede con. (Acakki 1:27, 28) Ma ka cwako ni co pigi tek loyo mon, luwi odi ma Lukricitayo giweko cik ma igi lac me Baibul aye tirogi dok man kelo yomcwiny bot mongi.​—Jo Epeco 5:28, 29.

I kare ma Yelena ocako kwano Baibul ki Lucaden pa Jehovah, en onongo tye ka kanyo aunauna pa cware lalingling. Cware odongo i kabedo ma dano ger iye adada, ka ma ka imito dako imako meri tektek ci wot kwede dok tim gero tye gin me nino ducu. Yelena owacci “Jami ma apwonyogi ki i Baibul-li gumiya kero.” En omedde ni “Aniang ni tye ngat mo ma mara adada, tero an ni pira tek dok paro pira. Abedo ka tamo ni ka cwara okwano Baibul, ci Baibul romo weko en cako tera i yo maber.” Tamme ni bene ada ocobbe kakare i kare ma cware oye kwano Baibul ka i ngeye kibatija en me doko Lacaden pa Jehovah. Yelena owacci “En odoko lanen maber adada pien jukke kene, wapwonyo kit me timo kica i kinwa kekenwa.” I lokke me agikki en owacci “Cik ma igi lac me Baibul omiyo awinyo ni an kara pira tek dok bene ogwoko nyomwa.”​—Jo Kolocai 3:13, 18, 19.

Gin mutimme i kom Yelena-ni pe dok pat ki pa mon mukene. Mon milion mapol ata ma gin Lukricitayo cwinygi yom pienni gin kacel ki coggi gitute me tic ki cik ma igi lac me Baibul i nyomgi. Ginongo woro, kwe cwiny, ki bedo agonya ka gitye ki Lukricitayo luwotgi.​—Jon 13:34, 35.

Co ki mon ma Lukricitayo gingeyo ni pien gin lubalo dok gitye ki roc, gin weng gitye “i te twero me gin ma tere pe” macalo cwec pa Lubanga. Ento, ka gunyikke cok bot Lubanga Jehovah Wongi, ci gibedo ki gen ni “gibigonyo ginaketa woko ki i opii me bedo gin ma top” ci gibinongo mit pa “kuc ki deyo ma gimiyo ki litino pa Lubanga.” Man pud dong tye gen mamwonya ma co ki mon ma Lubanga paro pigi gitye kwede i anyim!​—Jo Roma 8:20, 21.