Pi Jo Ma Gimaro Jehovah, “Pe Tye Gin Mo Ma Bimiyo Giyokke”
“Jo ma maro cikki limo kuc madit; pe tye gin mo ma bimiyo giyokke.”—JAB. 119:165.
IN IROMO GAMONE NINGO?
Pyem ngwec ango ma Lukricitayo gitye iye, dok mot ango ma gibinongo?
Kodi gweng ango ma twero miyo Lakricitayo yokke?
Pingo pe tye gin mo ma miyo Lakricitayo yokke ka en maro cik pa Jehovah?
1. Langwec mo acel onyuto nining ni pe emito ilo cinge i pyem ngwec?
NICAKKE wa i kare ma en tye ki mwaka apar ki wiye, Mary Decker onongo tye langwec muywek adada i wi lobo. Dano gubedo ka byeko ni en biloyo midila me jabu i pyem ngwec me lworo bar tyen abiro i Summer Olympics me 1984. Kadi bed kumeno, en pe ongolo dog tol. En oyokke ki tyen langwec mukene ci opoto ataro. Kitinge woko pien en onongo owanne dok tye ka koko. Mary pe oilo cinge ingwec. Ma mwaka acel peya otum, en onongo tye atera me ngwec, ci oturo rekod me wi lobo i pyem ngwec me mairo acel pa mon i mwaka 1985.
2. I yo ango ma Lukricitayo me ada gitye i pyem ngwec, dok gin ango ma myero waket cwinywa iye?
2 Macalo Lukricitayo, wan watye i pyem ngwec—ngwec me nongo kwo ma pe tum. Gin ma waketo iye cwinywa aye ni myero walo. Cipid pe obedo gin ma pire tek i pyem ngwecwa man. Dok bene pe obedo ngwec me ryeyo ler kun i kine mukene waywe ka dok lacen wamedde. Ento kitwero porone ki pyem ngwec maboco, ma mitte ni myero wadi cwinywa wek walo. Lakwena Paulo otiyo ki lapor pa ngat ma tye i pyem ngwec i waragane ma ocoyo bot Lukricitayo me Korint, kabedo ma onongo oywek pi pyem ngwec. En ocoyo ni: “Pe wungeyo ni, jo ma gipyem i ngwec ducu giringo, ento dano acel keken aye ma limo mot me pwoc? Wun bene wuring kumeno kumeno wek wunong mot me pwoc.”—1 Kor. 9:24.
3. Lungwec ducu gitwero loyo ngwec me nongo kwo ma pe tum nining?
3 Baibul wacciwa ni myero wangwec i pyem ngwec man. (Kwan 1 Jo Korint 9:25-27.) Mot ma wanongo obedo kwo ma pe tum i polo pi Lukricitayo ma kiwirogi nyo i lobo pi lungwec mukene-ni. Ngwec man pat ki mukene-ni i yo ni jo ducu ma gungweco dok gudiyo cwinygi nio wa i agikkine gibinongo mot me pwoc. (Mat. 24:13) Lungwec gikeng mot ka ce pe gulubo cik me ngwec man nyo pe gukato dog tol. Medo i kom meno, man aye ngwec ma kinongo iye mot me kwo ma pe tum.
4. Ngo mumiyo ngwecwa me nongo kwo ma pe tum-mi pe obedo gin mayot?
4 Ngolo dog tol pe obedo gin ma yot. Man mito diyo cwiny ki dok tic matek adada. Tye kono ni ngat acel keken aye ma ongolo dog tol labongo yokke kadi kicel—Yecu Kricito. Ento ma lube ki lulub kor Kricito, lapwonnyene Yakobo ocoyo ni “wan ducu ngat acel acel timo lwak roc mapol.” (Yak. 3:2) Man obedo lok ada. Rocwa nyo pa jo mukene twero bedo twon atwom. Pi meno i cawa mukene wayokke ci watagge. Watwero poto ento pud wa a malo ci wamedde ki ngwec. Tye jo mukene ma gupoto marac adada mumiyo onongo mitte ni kikonygi wek gua malo kun gimedde i pyem ngwec man nio wa i dog tol. Pi meno, watwero yokke nyo poto piny, kicel kicel nyo tyen mapol.—1 Luker 8:46.
KA IYOKKE, MEDDE KI NGWEC
5, 6. (a) Pingo pe tye gin mo ma twero weko Lakricitayo ‘yokke atata,’ ki dok ngo ma bikonye me “a malo”? (b) Pingo jo mukene pe gia malo ka guyokke?
5 Gwok nyo dong itiyo ki nyig lok ni ‘yokke’ nyo ‘poto’ ma gin ducu kitwero tic kwedgi me tito kit kwo pa ngat moni i yo me cwiny. Baibul bene tiyo ki nyig lok magi kumeno, ento i kabedo mogo tiyo kwedgi i yo mapat. Me lapore nen kong kit ma kicoyo kwede Carolok 24:16: “Dano ma kite atir kadi opot piny tyen abiro, dok pud twero a malo aye; ento jo maraco can miyo giyokke ci gipoto woko piny matwal, NW.”
6 Jehovah pe biye ni jo ma gigene guyokke nyo gupoti—pien man aye peko nyo ariya ma tye i worogi—ma weko pe gitwero a malo. Baibul miniwa gen ni Jehovah bikonyowa me “a malo” wek wamedde ki tic pire ki cwinywa ducu. Man dong pud kweyo cwiny jo ducu ma gimaro Lubanga ki cwinygi ducu. Jo maraco gipe ki miti me a malo. Gin pe giyenyo kony pa cwiny maleng ki dong ma a ki bot jo pa Lubanga, nyo gikwero woko ka kiminigi. Kitungcel, pi jo ma ‘gimaro cik pa Jehovah,’ pe tye gin mo ma bimiyo giyokke ci gipoto piny matwal wek pe gumedde i pyem ngwec me nongo kwo ma pe tum.—Kwan Jabuli 119:165.
7, 8. Ngat moni twero ‘poto’ ci pud dok medde ki nongo cwak pa Lubanga nining?
7 Jo mukene gitimo bal matino tino—kadi tyen mapol pien gitye ki goro mo. Ento nongo pud gitye jo ma kitgi atir i wang Lubanga ka gimedde ki “a malo,” ma te lokke ni gingut ki cwinygi ducu dok giyelle matek me tic pi Lubanga ki gen. Watwero niang meno i kit ma Lubanga otero kwede Luicrael i kare macon. (Ic. 41:9, 10) Carolok 24:16, ma dong kiloko iye malo-ni, nyuto ni gin ma pire tek pe obedo ‘poto’ ento “a malo” ki kony pa Lubangawa ma lakica-ni. (Kwan Icaya 55:7.) Pien Lubanga Jehovah kacel ki Yecu Kricito giketo gengi i komwa, gin gicuko cwinywa me “a malo.”—Jab. 86:5; Jon 5:19.
8 Kadi bed ni langwec oyokke nyo opoto i pyem ngwec mabor, en pud twero bedo ki kare me a malo ki dok tyeko ngwecce ka orune oyotoyot. I ngwecwa me nongo kwo ma pe tum-mi, pe wangeyo ‘nino ki cawa’ ma pyem ngwec man bigik iye. (Mat. 24:36) Ento, ka watemme ki tekwa pe me yokke, olo to wabinongo ni ngwecce yot, wabimedde nio ka watyeko. Pi meno, watwero gwokke nining wek pe wayokke?
JAMI MA GITWERO MIYO WAYOKKE
9. Jami mene ma wabinyamogi ma gitwero miyo wayokke?
9 Kong wanenu jami abic ma gitwero miyo wayokke—goro ma watye kwede, miti me kom, ka luye luwotwa guterowa i yo marac, can nyo aunauna, ki dong roc pa jo mukene. Po ni ka wayokke, Jehovah diyo cwinye adada i komwa. En pe rune me wacci wan pe wagenne.
10, 11. Goro ango ma Daudi olwenyo kwede?
10 Goro ma watye kwede kiromo porone ki gweng ma gitye i teng yo. Ka wangiyo jami mutimme i kwo pa Kabaka Daudi gin ki lakwena Petero, wanongo goro aryo—bedo labongo jukke ken ki dok lworo.
11 Kabaka Daudi onyuto goro i lok me jukke ken, ma lubbe ki gin ma otimme i kingi ki Batceba. Ki dok i kare ma Nabal oyete, Daudi onongo cok ero lweny i kome. Ada, kadi bed en pe onyuto kit me jukke ken i cawa mogo, ento en otute me yomo cwiny Jehovah. Pi kony pa jo mukene, en oyubo watte ki Lubanga.—1 Cam. 25:5-13, 32, 33; 2 Cam. 12:1-13.
12. Kadi bed oyokke, Petero omedde i pyem ngwec me nongo kwo nining?
12 Petero onyuto ni elworo dano, mumiyo i kine mogo oyokke marac adada; ento kadi bed kumeno, en obedo lagen bot Yecu ki Jehovah. Me lapore, en okwero Laditte, pe kicel keken ento tyen adek kulu. (Luka 22:54-62) Lacen, Petero obedo ki cwiny me apokapoka, kun tero Lukricitayo ma Lujudaya ma kilirogi ni pigi tek kato Lurok ma guye. Ento, lakwena Paulo obedo ki neno mupore—kacokke onongo pe obedo ka ma apokapoka myero obed iye. Tam pa Petero ni onongo pe tye atir. Ma pud peya Petero opoko kin utmege, Paulo omini Petero tira wang ki wang. (Gal. 2:11-14) Tika awaka omiyo Petero okeco ci oweko pyem ngwec me nongo kwo? Pe. En olwodo lok i kom tira ma Paulo omine-ni, oketo i tic ci omedde i ngwec man.
13. Two twero miyo wayokke nining?
13 I cawa mukene, goro ma watye kwede twero bedo two. Man bene twero bedo gin ma miyo wayokke. Two twero gengowa ki cobo yubwa mogo me woro Lubanga ki dok miyo watagge ci wailo cingwa woko i pyem ngwec. Me lapore, i nge mwaki 17 ma en onongo kwede ki batija, lamego mo ma a ki i Japan kome odoko lit adada. En oketo tamme ducu i twone-ni mumiyo odoko goro i yo me cwiny. Lacen, en ogiko ticwa me pwony woko. Luelda aryo gulimme. I nge nongo cuko cwiny, en ocako bino i cokke odoco. En owaco ni, “Akok pien omege gujola ki yomcwiny.” Laminwa-ni dok odwogo i pyem ngwec.
14, 15. Gin ango ma myero watim ka miti marac obino i cwinywa? Mi lapor.
14 Miti me kom omiyo dano mapol dong guyokke. Ka miti man tye ka bitowa, omyero watute matek wek wabed leng i tamwa, kitwa, ki dok i yo me cwiny. Po ni Yecu owaco ni ka ce wangwa nyo cingwa miyo wayokke, ci myero ‘wabol woko.’ Omyero pe watam nyo watim gin mo keken ma twero miyo pe watyeko pyem ngwec man.—Kwan Matayo 5:29, 30.
15 Omego mo acel ma odongo i ada ocoyo ni wiye pud po ni cakke wa i kare me tinone, ebedo ka lweny ki miti me buto ki co luwote. En owacci: “Kare ducu onongo awinyo calo iwacci atye kena. Dok onongo awinyo ni pe apore me bedo i kin dano.” I kare ma mwakane oromo 20, en onongo dong tye painia ma rii dok tye lakony kor tic i kacokke. Ento lacen, en oyokke marac adada, ci kimine tira ma a ki i Ginacoya dok bene Luelda gukonye. Ento lega, kwano Baibul, ki dong keto cwinye i konyo jo mukene oweko en oa malo ci omedde i pyem ngwec man. I nge mwaki mapol, en pud wacci: “I kine mukene awinyo ni pud atye ki kodi miti man, ento pe aweko bwoya woko. Dong apwonyo ni Jehovah pe biye ni kibitwa matek mukato kare woko ma pe waromo cirone. Pi meno, dong aye ni Lubanga ngeyo ni atwero cirone.” Omego man odolo te lokke ni: “Jami weng ma dong acirogi-ni bikela adwogi maber i lobo manyen. Meno aye gin ma amito! Abimedde ki lweny nio wa i kare meno.” En dong omoko tamme me medde i pyem ngwec man.
16, 17. (a) Ngo ma okonyo omego mo acel ma onongo tamo ni kitere i yo marac? (b) Wek pe wayokke, omyero waket cwinywa i kom ngo?
16 Ka luye luwotwa guterowa i yo marac, meno twero miyo wayokke. I lobo France, omego mo ma onongo kong obedo laelda otamo ni kitere i yo marac, man oweko cwinye ocwer adada. Macalo adwogine, en ogiko cito i cokke ki dong ticwa me pwony. Luelda aryo gulimme ci gutero itgi ka winye ki cwiny me kica, labongo ngolo lokke kun en tito gin ma tamo ni otimme. Gucuko cwinye me miyo pekone bot Jehovah dok bene gupoyo wiye ni gin ma pire tek loyo aye timo gin ma yomo cwiny Lubanga. En oketo tira-ni i tic ci omedde i pyem ngwec.
17 Lukricitayo ducu omyero guket cwinygi i kom Yecu Kricito ma kicimo me bedo Lawi kacokke, ento pe i kom dano ma tye ki roc. Wang Yecu obedo calo “leb mac ma lyel,” pien neno jami weng i yo ma opore ki dok neno jami mapol ma pe waneno. (Yabo 1:13-16) Me lapore, en ngeyo ni waromo tamone ni kiterowa i yo marac kun nongo wan aye waniang marac. Yecu bicobo kop ma mako kacokke i yo matir dok i karene kikome. Pi meno, pe myero wawek tic nyo tam pa Lukricitayo luwotwa omi wayokke.
18. Watwero ciro atematema ki can nining?
18 Jami aryo mukene ma giweko dano yokke aye can nyo aunauna, ki dong roc pa utmegiwa me kacokke. I carolokke i kom laco kodi, Yecu owacci ‘can nyo aunauna’ pi lok pa Lubanga bimiyo jo mogo giyokke. Lupacowa, jiraniwa, nyo gamente gitwero keto can i komwa nyo unowa pi lok me ada—man twero timme tutwalle i kom ngat ma ‘lwite pe odonyo’ matut nyo niyene goro. (Mat. 13:21) Kadi bed kumeno, ka ce wamedde ki bedo ki cwiny matir, kodi me Ker-ri bikonyowa me rwako lwitwa donyo matut i niye. Ka irwatte ki atematema, temme ki tekki me lwodo lok i kom jami ma myero apaka. (Kwan Jo Pilipi 4:6-9.) Pi teko pa Jehovah, wabiciro atematema kun bene wamedde i pyem ngwec man labongo yokke.
19. Watwero gengo cwercwiny ma jo mukene gikeliwa nining wek pe wangaki?
19 Tye me cwercwiny ni i mwaki mukato angec, jo mukene guweko roc pa jo mukene omiyo gungak woko ki i pyem ngwec man. Tam mapat pat i kom jami ma myero kitim kun lubo cwiny ma ngoliwa kop-pi omiyo gungak. (1 Kor. 8:12, 13) Ka ce ngat mo ocwero cwinywa, tika wabiye ni man odok lok madit? Baibul ciko Lukricitayo ni pe gungol kop i kom jo mukene, gutim kica bot jo mukene, ki dok pe gudii ngat mo ka odok i lok me twero. (Luka 6:37) Ka iwinyo ni ki cwero cwinyi, penye kekeni ni: ‘Tika atye ka ngolo kop i kom jo mukene pien amito ni kitim jami ma lube ki mitina? Kit ma angeyo ni utmegina gitye ki roc-ci, tika abiye ni roc pa ngat moni omi angak woko ki i pyem ngwec me nongo kwo-ni?’ Mar pi Jehovah bikonyowa me moko tamwa pe me weko gin mo keken ma jo mukene gitimo me gengowa ngolo dog tol.
NGWEC KUN IDIYO CWINYI—GWOKKE PE IYOKKE
20, 21. Dong imoko tammi me timo gin ango i pyem ngwec me nongo kwo ma pe tum?
20 Tika dong imoko tammi me ‘tyeko ngwecci’? (2 Tem. 4:7, 8) Ka tye kumeno, ci kwan piri keni pire tek. Ti ki Baibul kacel ki bukkewa me konyi kwedo lok, nge jami mogo ma twero miyo iyokke ki dok lwod lok i kom gin ma ikwano. Kwa pi cwiny maleng wek idok ngat mucwiny i yo me cwiny. Po ni, ka ce langwec oyokke nyo opoto, pe te lokke ni en pe bityeko pyem ngwec me kwo-ni. Ento en pud twero a malo ci medde. En bene twero nongo pwony ki i kom bal ma en otimo wek emedde ki ngwecce i yo maber.
21 Baibul wacci omyero wabed lungwec i pyem ngwec me kwo ma pe tum-mi ento pe luneno keken. Pyem ngwec-ci pe obedo calo ito bac ma cwalo jo ma gitye iye nio ka guo ka ma gicito iye. Omyero wangwec wan kikomwa wek wanong kwo ma pe tum. Ka watimo kumeno, ci Jehovah biminiwa “kuc madit.” (Jab. 119:165) Watwero bedo ki gen ni en bigoyo laane i komwa kombeddi ki dok biminiwa mot me kwo ma pe tum ka watyeko pyem ngwec man.—Yak. 1:12.
[Cal ma tye i pot karatac 7]
[Cal ma tye i pot karatac 8]
Ka ce ipoto, ye kony ma kimini ci a malo!
[Cal ma tye i pot karatac 11]
Pe iwek gin mo ogengi tyeko ngwec!