Tika Ada Twere me Bedo ki Kwo ma Tye ki Tyen Lok?

MAN tye lok ada. Kwo i loboni opong ki “can ki ayela-yela.” Gwok nyo ipenye kekeni ni, ‘Tika twere me bedo ki kwo ma tye ki tyen lok i kare-ni?’

Me lapore, Maria onongo tiyo matek adada, ento kombeddi dong ma mwakane tye 84 ni, en bedo ki i ot keken pe kato woko. Wiye gire pud tiyo, ento dul kome mukene-ni nen calo pe dong tiyo tutwal. Tika ada en twero winyo ni kwone-ni tye ki tyen lok?

In kono? Gwok nyo dong ipenye kekeni ka kwoni tye ki tyen lok. Twero bedo ni itiyo tic acel nino ducu, weko iol, ki dok pe inongo yomcwiny iye. Twero bedo bene ni dano pe gipwoyo tic matek ma itimo. Kadi bed ni kwoni tye ka wot maber, twero bedo ni pud itye ki par pi kwoni me anyim. I kine mukene itwero bene bedo kic kic nyo cwinyi tur. Twero bedo ni kwowu me ot opong ki kukukuku. Gwok nyo bene ngat ma imaro oto. Laco mo ma nyinge André onongo gitye um ki wang gin ki wonne, ento two omako wonne ci oto woko. Ki bot André, to man oturo cwinye adada, dok okwinyo bur mo ma pe kitwero culone matwal.

Kadi bed ni watwero rwatte ki can i kwowa, tye gin mo ma pire tek adada ma myero wange: Tika ada twere me bedo ki kwo ma tye ki tyen lok? Watwero nongo lagamme ki i kwo pa Yecu Kricito, laco mo ma okwo i lobo i kine ka mwaki 2,000 mukato angec. Kadi bed ni en orwatte ki ariya mapol, Yecu obedo ki kwo ma tye ki tyen lok. Man bene twere botwa ka walubo lanenne.