LAPENY MA KIGAMO ME BAIBUL
Tika kitwero timiwa kica pi balwa?
Nongo cwak pa Lubanga pe gin matek tutwal botwa
Baibul wacci dano ducu lubalo. Walako cwiny me timo bal ki bot laco mukwongo, Adam. Pi meno, cawa mukene watimo jami maraco ci wakoko ange lacen. Yecu Kricito, Wod pa Lubanga oculo pi balwa ki to piwa. Ginkok ma oculo-ni oweko twere me timiwa kica. Man obedo mot mua ki bot Lubanga.—Kwan Jo Roma 3:23, 24.
Tye jo mukene ma gutimo bal madongo dok gipenye kekengi ka Lubanga twero timmigi kica. Tye me yomcwiny ni Lok pa Lubanga waco ni: “Remo pa Wode Yecu Kricito bene lwoko bal ducu woko ki i komwa.” (1 Jon 1:7) Jehovah tye atera me weko bal madongo ka watye ki cwiny me ngut.—Kwan Icaya 1:18.
Ngo ma myero watim wek kitimiwa kica?
Ka wamito ni Lubanga Jehovah otimiwa kica, omyero wapwony jami madok i kome—waniang yone, tirane, ki dong gin ma en mito ki botwa. (Jon 17:3) Jehovah timo kica ki cwinye ducu bot jo ma gingut pi balgi dok gitute me loko kwogi.—Kwan Tic pa Lukwena 3:19.
Nongo cwak pa Lubanga pe gin matek tutwal botwa. Jehovah niang goro ma watye kwede. En lakica. Mar mere ma pe lokke-ni omyero ocuk cwinyi me bedo ki miti me ngeyo kit ma itwero yomo cwinye kwede.—Kwan Jabuli 103:13, 14.