Jehovah Genne Dok Bene Timo Kica

1, 2. (a) Pingo wamaro lurem ma gigenne dok gitimo kica? (b) Lapeny mene ma wabinyamogi?

ITAMO ni larem me ada obedo kodi dano ma nining? Laminwa mo ma nyinge Ashley owaco ni, “Ki tung bota, larem me ada obedo ngat ma konyi kare ducu dok timmi kica ka ibalo.” Wan ducu wamaro bedo ki lurem ma gigenne dok gitimo kica. Giweko wawinyo agonya ki dok ni kimarowa.​—Car. 17:17.

² Jehovah aye pud dong tye Larem maber loyo ma watwero bedo kwede ma genne dok timo kica. Man aye kit ma laco jabuli oloko kwede i kome: ‘Ai Rwot Jehovah, in iber dok itye atera me weko bal pa dano, dok mar meri ma pe lokke dwong pi jo ducu ma kok boti.’ (Jab. 86:5) Te lokke ngo me bedo ngat ma genne dok timo kica? Jehovah nyuto kit magi mabeco-ni nining? Dok wan watwero lubo lanenne nining? Lagam pi lapeny magi bikonyowa me dongo pwocwa pi Laremwa ma pud dong pire tek loyo-ni, Jehovah. Lagam pi lapeny magi bene bijingo wat ma tye i kinwa ki luwotwa.​—1 Jon 4:7, 8.

JEHOVAH GENNE

3. Te lokke ngo me bedo ngat ma genne?

³ Gen obedo kit mamwonya adada ma kwako mine kenwa, cung matek labongo tagge, ki miyo cwak kare ducu. Ngat ma genne pe bedo ka loko tamme atata. Ma ka meno, en gwoko mar ma tye i kin en ki ngat moni (nyo gin moni), kun moko i kom ngat meno nyo gin meno kadiwa i kare me peko. Ada, Jehovah aye “Ngat ma genne” pud dong loyo.​—Yabo 16:5, NW.

4, 5. (a) Jehovah nyuto nining ni en lagen? (b) Watwero nongo cuko cwiny nining ka watamo i kom kit ma Jehovah genne kwede bot luticce?

⁴ Jehovah nyuto nining ni en lagen? En pe bwoto ata jo ma lugen ma giwore. Kabaka Daudi, ma bene obedo lawor Jehovah-ni, omoko kit ma en genne kwede. (Kwan 2 Camuel 22:26.) I kare ma Daudi tye i peko, Jehovah onyuto gennene kun tire, gwokke, ki dok larre. (2 Cam. 22:1) Daudi onongo ngeyo ni Jehovah nyuto gen pe i lokke keken ento bene konyo luticce. Pingo Jehovah onyuto bot Daudi ni egenne? Pien Daudi bene onyuto ni en ‘ngat ma genne.’ Jehovah tero luticce ma giwore ma gin lugen ni pigi tego, dok en nyuto ni egenne botgi.​—Car. 2:6-8.

⁵ Watwero nongo cuko cwiny ka watamo i kom kit ma Jehovah onyuto kwede gennene bot luticce. Ominwa mo ma nyinge Reed owacci, “Anongo kony madit adada ka ce akwano kit ma Jehovah okonyo kwede Daudi i kare me peko.” En omedde ni: “Kadi bed ni Daudi onongo tye ka ngwec, dok bene bedo wa i boro-gu, Jehovah kare ducu obedo ka konye. Man pud dong cuko cwinya ya! Lok man poyo wiya ni kadi bed atye i kwo matek dok ape ki gen mo keken, Jehovah tye atera me konya ka teke anyuto ni an lagen bote.” Labongo akalakala mo keken, in bene iwinyo kumeno.​—Rom. 8:38, 39.

6. I yo mene madok pat ma Jehovah nyuto ni en lagen, dok man kelo adwogi maber ango bot luticce?

⁶ I yo mene madok pat ma Jehovah nyuto kwede ni egenne? Me acel aye ni en pe lubo cik pa dano. En cuko cwinywa ni, “An a Rwot [Jehovah], pe alokke.” Tam ma en moko kare ducu jenge i kom cikke ma pe lokke kadi matidi mo, ma lubbe ki gin matir ki marac. (Mal. 3:6) Medo i kom meno, Jehovah nyuto ni en lagen kun pe turo cikkene. (Ic. 55:11) Gen pa Jehovah-ni kelo adwogi maber bot luticce ducu ma gicung matek labongo tagge. Man twere nining? Ka watute matek me lubo cik pa Jehovah ki cwinywa ducu, ci waromo bedo ki gen ni en bigwoko cikkene me miniwa mot​—Ic. 48:17, 18.

LUB LANEN PA JEHOVAH I BEDO NGAT MA GENNE

7. I yo acel mene ma waromo lubo kwede lanen pa Jehovah i bedo ngat ma lagen?

⁷ Wan watwero lubo lanen pa Jehovah nining i bedo jo ma genne? Yo acel aye ka wakonyo jo ma gitye i peko. (Car. 3:27) Me lapore, tika ingeyo laye lawoti mo ma cwinye otur, gwok nyo pi peko me yotkom, aunauna ma a ki bot jo me ot, nyo pi gorogi mo? Ma ka kuro ni ngat meno obin boti, pingo pe icit bote iwacce “lok mabeco me kica”? (Jek. 1:13)a Ka itimo meno, ci ibinyuto ni in lagen dok larem me ada, ma “moko mere i kom lareme liking ma loyo omine kikome.”​—Car. 18:24.

8. Watwero lubo lanen pa Jehovah i bedo lagen i nyom nining?

⁸ Watwero bene lubo lanen pa Jehovah i bedo jo ma genne ka wanyuto bot jo ma wamarogi ni wan lugen. Me labolle, ka ce wanyomme, wangeyo ni omyero wabed lugen i nyomwa. (Car. 5:15-18) Pi meno, pe wamito ni watim gin mo keken ma weko wadonyo i tim me abor. (Mat. 5:28) Medo i kom meno, wanyuto ni wan lugen bot luye luwotwa ka pe wakwoto nyo wabalo nyinggi, kun bene wakwero lajwac winyo ki dok nywako i lok ma kit meno.​—Car. 12:18.

9, 10. (a) Wamito ni wabed lugen tutwalle bot anga? (b) Pingo pol kare pe yot me lubo cik pa Jehovah?

⁹ Gin ma pire tek loyo aye ni wamito ni wabed lugen bot Jehovah. Watwero timo man nining? Ka watute me neno jami kit ma en neno kwede, kun wamaro jami ma en maro ki dok wadag jami ma en dagi, ci wabikwo i yo ma yomo cwinye. (Kwan Amoc 5:15) Ka tamwa ki kit ma wawinyo kwede rwatte ki pa Jehovah, ci wabibedo ki cwiny me lubo cikke.​—Jab. 119:104.

¹⁰ Kadi bed kumeno, pol kare pe yot me lubo cik pa Jehovah. Omyero watute adada me bedo lugen. Me labolle, Lukricitayo ma wigi nono giromo tamo ni myero ginyomme woko, ento gin peya gunongo ngat mupore pigi i kin jo pa Jehovah. (1 Kor. 7:39) Laminwa mo ma wiye nono romo nongo ni lutic luwote ma gin pe luye pol kare gitemme me kubo kin en ki laco mo ma gitamo ni twero gwokke i ot licwic. Twero bedo ni laminwa-ni tye ka lweny ki kwo me bedo kickic. Ento, en pud tute matek me gwoko gennene bot Jehovah. Lanen man maber me bedo lagen pud dong yomo cwinywa ya! Ada, Jehovah bimiyo mot bot jo ducu ma gicung matek labongo tagge kadi bed gitye i atematema.​—Ibru 11:6.

JEHOVAH TIMO KICA

11. Te lokke ngo me bedo ngat ma timo kica?

¹¹ I kin kit pa Jehovah ma wamaro adada aye ni en tye atera me timo kica. Te lokke ngo me bedo ngat ma timo kica? Timo kica kwako weko bal pa ngat moni ka ce en ongut ki cwinye ducu. Man kono pe te lokke ni ngat ma otimo kica-ni cwako bal mutimme ni nyo kwero ni pe otimme. Ma ka meno, en pe mako akemo i cwinye. Ginacoya waco ni Jehovah tye ‘atera me weko bal’ pa jo ma gingut ki cwinygi ducu.​—Jab. 86:5.

12. (a) Jehovah nyuto nining ni etimo kica? (b) Te lokke ngo ka kiwacci ‘kijwayo woko’ bal pa ngat moni?

¹² Jehovah nyuto nining ni en lakica? Ka Jehovah otimo kica, en ‘weko bal woko ducu’; man te lokke ni en timo kica ki pete tere ducu dok matwal. (Ic. 55:7) Wangeyo nining ni Jehovah timo kica ki pete tere ducu? Tam kong i kom cikke ma kicoyo i Tic pa Lukwena 3:19. (Kwan.) Lakwena Petero ocuko cwiny luwiny en ni ‘gungut pi balgi . . . ci gulokke.’ Ka labalo moni ongut ki cwinye ducu, en cwinye wang adada pi bal ma etimo. Dok en bene moko tamme pe me nwoyo bal meno. (2 Kor. 7:10, 11) Medo i kom meno, ngut ki cwinywa ducu miyo labalo moni ‘lokke,’ kun weko yone marac-ci, ci cako lubo yo ma yomo cwiny Lubanga. Adwogine onongo bibedo nining ka jo ma gubedo ka winyo Petero-ni gungut ki cwinygi ducu? Petero owacci balgi onongo ‘kibijwayone woko.’ Pi meno, ka Jehovah otimo kica, bedo calo iwacci en oruco balwa woko. En weko balwa ki pete tere ducu.​—Ibru 10:22; 1 Jon 1:7.

13. Lok man ni “pe dok abibedo ka po i kom gin marac ma gubedo ka timone” cuko cwinywa nining?

¹³ Wan wangeyo nining ni Jehovah timo kica matwal? Nen kong lok pa lanebi Jeremia ma lubbe ki gicikke manyen ma kimoko ki Lukricitayo ma kiwirogi, ma weko twere me timo kica bot jo ma giketo niyegi i ginkok pa Yecu. (Kwan Jeremia 31:34.) Jehovah owacci: “Abiweko balgi, pe dok abibedo ka po i kom gin marac ma gubedo ka timone.” Pi meno, Jehovah cuko cwinywa ni ka etimo kica litap, ci pe dong ebitwenyowa i kare me anyim pi bal magi. En bene pe bedo ka tamo pi balwa wek engol kop i wiwa nyo epwodwa kare ki kare. Ma ka meno, Jehovah timo kica pi bal magi dok bene matwal.​—Rom. 4:7, 8.

14. Waromo nongo kwe cwiny nining ka walwodo lok i kom kit ma Jehovah timo kwede kica? Mi labol mo acel.

¹⁴ Waromo nongo cuko cwiny ka walwodo lok i kom kit ma Jehovah timo kwede kica. Nen kong labol acel. Mwaki mapol mukato angec, laminwa mo ma nyinge Elaine kiryemo woko ki i kacokke. Ento i nge mwaki mapol kidwokke i kacokke. Elaine oye ni, “Kadi bed ni onongo ajingo cwinya kekena dok awaco bot jo mukene ni Jehovah dong otyeko timma kica, ento onongo pol kare awinyo ni en bor kweda nyo jo ni jo mukene gicok kwede makato an dok ni En marogi adada ka i poro ki an.” Ento, Elaine onongo kwe cwiny ki i kwano ki dok lwodo lok i kom gin ma Baibul waco ma lubbe ki kit ma Jehovah timo kwede kica. Elaine omedo ni: “Awinyo ki i cwinya ni Jehovah mara dok paro pira i yo mo ma naka yam peya atamo pire.” Gin ma dong ogudo cwinye tutwal aye ene: “Ka Jehovah otimiwa kica pi balwa, pe myero cwinywa obed ka poto pi bal ma kit meno pi kare me kwowa ducu.”b Elaine owaco ni: “Aniang ni kara onongo pe aye ni Jehovah romo timma kica ki cwinye ducu, dok onongo atamo ni cwinya bibedo ka poto pi bal man pi kare me kwona ducu. Angeyo ni bitero kare, ento acako winyone ni ada, an kara aromo nyikke cok bot Jehovah, dok awinyo ni ter mapek ma onongo onura tutwal-li dong kitingo woko.” Man nyuto ni Lubanga ma watiyo pire-ni lamar dok timo kica!​—Jab. 103:9.

LUB LANEN PA JEHOVAH I BEDO NGAT MA TIMO KICA

15. Wan watwero lubo lanen pa Jehovah i bedo ngat ma timo kica nining?

¹⁵ Watwero lubo lanen pa Jehovah i bedo ngat ma timo kica ka wan bene watimo kica bot jo mukene ka gungut ki cwinygi ducu. (Kwan Luka 17:3, 4.) Wii myero opo ni ka Jehovah otimo kica, en pe bedo ka po i kom bal ma watimogi. Ka watimo kica bot jo mukene, omyero pe dok wabed ka tamo pi bal ma gutimo i komwa nyo watug lokke i kare me anyim.

16. (a) Timo kica mono te lokke ni wacwako bal mutimme-ni ki dok waweko jo mukene giterowa i yo marac? Tit kong. (b) Gin ango ma myero watim wek Lubanga otimiwa kica?

¹⁶ Bedo ngat ma timo kica pe te lokke ni wacwako bal mutimme-ni nyo waye ni jo mukene guterwa i yo marac. Pe kumeno. Ento te lokke ni pe wamako akemo i cwinywa. Gin ma pire tek wek Jehovah otimiwa kica aye ni omyero walub lanen pa Jehovah i bedo jo ma gitimo kica ma lubbe ki kit ma watero kwede jo mukene. (Mat. 6:14, 15) Ka ineno mot, kica aye oweko Jehovah wiye po ni “wan apwa mamwa.” (Jab. 103:14) Ada, kica ma a ki i cwinywa kikome aye myero ocwalwa me weko bal pa jo mukene.​—Ep. 4:32; Col. 3:13.

17. Gin ango ma romo konyowa ka laye lawotwa mo ocwero cwinywa?

¹⁷ Tye kono ni, pe yot pol kare me timo kica. Kadi wa Lukricitayo ma kiwirogi i cencwari me acel bene nen calo gunongo tek tutwal me cobo tele ma i kingi. (Pil. 4:2) Gin ango ma romo konyowa ka laye lawotwa mo ocwero cwinywa? Tam kong i kom Yubu. Cwinye owang adada i kare “lureme”​—Erifaji, Bildad, ki Jopar​—gukok i kome ni en obedo ka timo jami maraco. (Yubu 10:1; 19:2) I agikkine, Jehovah owacci jo adek-ki ni gutimo bal. Lubanga ocikogi ni gucit bot Yubu dok gutyer gitum pi balgi. (Yubu 42:7-9) Ento Jehovah bene owacci Yubu ni otim gin mo acel. Gin ango? Jehovah owaco ni Yubu oleg pi lureme adek magi. Yubu otimo gin ma Jehovah owacce dok bene Jehovah omiye mot pi cwiny me kica ma en onyuto-ni. (Kwan Yubu 42:10, 12, 16, 17.) Pwony ango ma wanongo ki iye? Ka walego ki cwinywa ducu pi ngat mo ma ocwero cwinywa, man konyowa me jwayo akemo ma wamako i cwinywa.

MEDDE KI NYUTO PWOC PI KIT PA JEHOVAH I YO MATUT

18, 19. Wan waromo medde ki dongo pwocwa pi kit pa Jehovah nining?

¹⁸ Pud dong wanongo cuko cwiny adada ki i nyamo kit mapat pat pa Jehovah ma wamarogi. Wanongo ni en lok kwede yot, pe poko kin dano, cinge yot, niang, genne ki dok timo kica. Ki lok ada, pud wanyamo wiye wiye keken. Wabibedo ki yomcwiny me pwonyo lok i kom Jehovah pi naka. (Latit. 3:11) Waye lok pa lakwena Paulo ma ocoyo ni: “Lonyo pa Lubanga dwong ma okato kare! Ryekone kacel ki ngecce tut twatwal!” Watwero bene waco lok acel-li i kom kite mukene calo mar ki dok kite abicel ma wanenogi-ni​—Rom. 11:33.

¹⁹ Pi meno, wamedde wunu ki dongo pwocwa pi kit pa Jehovah. Watimo man ka ce wangeyo kite, walwodo lok i komgi, ki dong ka waketogi i tic i kwowa. (Ep. 5:1) Ka watimo meno, ci wabiye labongo akalakala lok pa laco jabuli ma owero ni: “Ento ki tung bota, bedo cok ki Lubanga aye ber.”​—Jab. 73:28.