Lubanga winyo lega pa dano me rok ducu. (Jabuli 145:18, 19) Baibul cuko cwinywa me lok kwede i kom gin mo keken ma tye i cwinywa. (Jo Pilipi 4:6, 7) Ento tye lega mogo ma pe yomo cwiny Lubanga. Me lapore, “Nwoyo gin acel-li kare ki kare” ma nongo wamako i wiwa pe yomo cwinye.—Kwan Matayo 6:7, NW.
Jehovah bene dag lega pa jo ma gituro cikke akaka. (Carolok 28:9) Me lapore, i kare me Baibul, Lubanga okwero winyo lega pa Luicrael ma gubedo ka nek. Ada, omyero watim jami mogo wek Lubanga owiny legawa.—Kwan Icaya 1:15.
Ngo ma myero watim wek Lubanga owiny legawa?
Pe watwero lega bot Lubanga labongo niye. (Yakobo1:5, 6) Omyero wabed ki niye i kome dok labongo akalakala ni en paro piwa. Watwero jingo niyewa ki kwano Baibul, pien niye me ada cung i kom jami ma ginonge iye.—Kwan Jo Ibru 11:1, 6.
Myero waleg ki cwinywa ducu dok ki mwolo. Yecu ma en Wod pa Lubanga-ni bene olego ki mwolo. (Luka 22:41, 42) Pi meno, ma ka tito bot Lubanga gin ma myero en otim, omyero watemme me niang jami ma en mito ki kwano Baibul. Ci dong, watwero lega ma lubbe ki miti pa Lubanga.—Kwan 1 Jon 5:14.
![[Cal ma tye i pot karatac 32]](/ach/wol/mp/r142/lp-ac/w13/2013/1130)