Watamu Dok Watug Wunu Cwinywa Kekenwa

1, 2. Gin ango ma okonyo Lucaden pa Jehovah 230 me bwot i agikki me Lweny me II me Wi Lobo?

I KARE ma gamente me Nazi otur i agikki me Lweny me II me Wi Lobo, kimiyo rukca me neko dano alip ki alip ma gudong i buc. Lumabuc magi ma kitweyogi i Sachsenhausen onongo myero kitergi i wang wat mapat pat wek kipikgi i meli, ci meli olwiny kwedgi i nam.

² Lumabuc alip pyeradek wiye adek ma onongo kitweyogi i gang buc me Sachsenhausen-ni onongo myero guwot mairo 155 (kilo mita 250) i taun me Lübeck, ma tye wang wat mo acel i lobo Germany. I kingi onongo tye Lucaden pa Jehovah 230 ma gia ki i lobbe abicel kulu. Kec kacel ki two omiyo gin ducu gudoko goro. Ento omegiwa gunongo kero me wot nining? Omego acel owacci: “Wabedo ka cuko cwinywa kekenwa ni myero pe wail cingwa.” Ki bene, mar ma onongo gitye kwede i kingi kacel ki ‘teko madwong’ pa Lubanga okonyogi me bwot.​—2 Kor. 4:7.

3. Pingo mitte ni omyero wacuk cwiny luwotwa?

³ I kare-ni, wan pe watye ka wot i to, ento warwatte ki pekki mapol. I nge keto Ker pa Lubanga i 1914, kibolo Catan piny i lobo kany ki i polo dok en tye ki “akemo madwong, pien ngeyo ni karene tye manok.” (Yabo 12:7-9, 12) Ka Armagedon woto ki nyiko cok, Catan tye ka tute wek wadok goro i yo me cwiny kun tiyo ki atematema. Medo i kom meno, lyeto me kwo bene tye ka diyowa adada. (Yubu 14:1; Latit. 2:23) I kine mukene, ka pekowa dong odoko dwong tutwal, ci man twero nurowa adada ma weko kadi bed wanong kero i yo me cwiny pud pe waromo lweny ki turcwiny. Nen kong labol pa omego mo ma okonyo dano madwong i yo me cwiny pi mwaki mapol. I nge mwaki mapol, en kacel ki dakone komgi odoko lit, ma oweko cwinye ocako tur. Calo ominwa-ni, wan ducu wamito ‘teko madwong’ ma a ki bot Jehovah medo ki ma a ki bot luwotwa.

4. Wek wacuk cwiny jo mukene, tira mene ma lakwena Paulo omiyo ma myero waket iye cwinywa?

⁴ Wek wacuk cwiny jo mukene, omyero waket cwinywa i kom lok me cuko cwiny ma lakwena Paulo ocoyo bot Lukricitayo me Ibru. En owacci: “Myero watamu kit macalo watwero tugo kwede cwinywa kekenwa i mar ki i tiyo tic mabeco, kun pe waweko cokke kacel, kit macalo jo mogo dong guloko odoko kitgi-ni, ento myero wacuku cwinywa kekenwa, makatone kit macalo wuneno Nino maca dong tye ka nyiko cok-ki.” (Ibru 10:24, 25) Wan waromo keto tira man i tic nining?

“WATAMU” PI LUWOTWA

5. Te lokke ngo me ‘tamo’ pi luwotwa, dok waromo timone nining?

⁵ ‘Tamo’ pi luwotwa te lokke ni “ngeyo gin ma gimito.” Tika wanyuto ni wangeyo gin ma luwotwa mito ka ce waboko lok kwedgi wiye wiye, wamotogi oyotoyot i Ot me Ker nyo waloko i kom jami ma pigi pe tego? Pe wacel. Ento, wan omyero wabed ka ‘paro pi ticwa’ kun pe ‘waridde i gin ma pe megwa.’ (1 Tec. 4:11; 1 Tem. 5:13) Kadi bed kumeno, ka wamito cuko cwiny omegiwa, omyero wangegi maber adada​—kwogi, kitgi, watgi ki Jehovah, kerogi, kacel ki gorogi. Omyero gunenwa macalo luremgi dok gunge ni wamarogi. Man te lokke ni omyero wacwal cawa kacel kwedgi​—pe ka gitye i peko keken nyo cwinygi otur ento i cawa mukene bene.​—Rom. 12:13.

6. Ngo ma bikonyo laelda me ‘tamo’ pi jo ma en gwokogi?

⁶ Ludongo ma i kacokke kicuko cwinygi me ‘kwayo romi pa Lubanga ma tye botgi,’ kun gitimo labongo dic mo ki dok pi miti ma i cwinygi. (1 Pet. 5:1-3) Ludongo ma i kacokke omyero gunge romi ma gitye ka kwayogi maber adada wek limgi me kwat onyak nyigge. (Kwan Carolok 27:23.) Ka luelda kare ducu nongo gitye dok gibedo kacel ki luye luwotgi, romi pol kare gipenyo tam ki botgi ka peko tye. Omege ki lumege gibedo ki miti me tito lok ma i cwinygi, man weko luelda ‘gitamo’ pi jo ma gigwokogi dok gimiyo kony ma mitte.

7. Omyero water “lok atata” ma jo ma cwinygi otur giwaco nining?

⁷ I kare ma tye ka coyo waraga bot kacokke me Tecalonika, Paulo owacci: “Wukony jo ma goro.” (Kwan 1 Jo Tecalonika 5:14.) ‘Jo ma cwinygi otur’ gigoro. Carolok 24:10 wacci: “Ka ce ibedo nyap [ma cwinyi otur] i kare ma ayelayela tye, tekoni nongo nok adada.” Ngat ma cwinye otur loko “lok atata.” (Yubu 6:2, 3) Ka ‘watamo’ pi jo ma kit magi, ci omyero wange ni lokgi pe nyuto gin ma tye i cwinygi. Gin ma kit man otimme i kom Rachelle i kare ma cwiny minne otur adada. Rachelle owaco ni: “Tyen mapol mamana onongo waco jami maraco. Pi kare magi ducu, abedo ka poyo wiya kekena i kom anga kikome ma Mamana obedo, en lamar, lakica, dok bene ngat ma cinge yot. Aniang ni jo ma cwinygi otur giwaco jami mapol labongo kong lwodone. Ma dong rac loyo aye ni ngat moni twero loko nyo timo gin mo marac me dwoko ka wang gin mutimme.” Carolok 19:11 wacci: “Dano ma tye ki ryeko maber kiniga pe mako oyot, en bedo ma cwinye tye atir pi cayo bal ma ngat mo otimo i kome.”

8. Angagi tutwalle ma omyero ‘wanyut’ ni wamarogi ki dok pingo?

⁸ Wan watwero ‘tamo’ pi ngat mo ma cwinye otur pi bal mutimme i kare mukato angec nining? Kadi bed ni en oloko kwone, oromo bedo ni lewic nongo pud make pi bal ma en otimo-ni. Ma lubbe ki labalo mo acel ma ongut ki i Korint, Paulo ocoyo ni: “Myero dong wutimme kica, dok wukwe cwinye, wek omi cwercwiny madit mukato kare pe onure woko. Man omiyo abako doga botwu, omyero wunyut bote mar ma wutye kwede i kome.” (2 Kor. 2:7, 8) Ma lubbe ki buk mo acel, lok man ma gonye ni “wunyut[-ti]” kwako “moko ni gin moni tye kakare, kun iketo cingi iye wek obed ma lubbe ki cik.” Pe waromo geco ageca ni ngat moni ngeyo ni wamarre ki dok ni waparo pire. Ento omyero wawek en onen i ticwa ki dong i lokwa.

‘TUGO CWINYWA KEKENWA I MAR KI I TIYO TIC MABECO’

9. Te lokke ngo me ‘tugo cwinywa kekenwa i mar ki i tiyo tic mabeco’?

⁹ Paulo ocoyo ni, “Myero watamu kit macalo watwero tugo kwede cwinywa kekenwa i mar ki i tiyo tic mabeco.” Omyero wacuk cwiny luye luwotwa me nyuto mar ki dok tiyo tic mabeco. Ka mac cok to woko, wabuko mac-ce wek omedde ki lyel matek. (2 Tem. 1:6) I yo acel-lu bene, wan bene watwero tugo cwiny omegiwa me nyuto mar pi Lubanga ki luwotgi. Loko lok ma cuko cwiny luwotwa miyo gitimo jami mabeco.

10, 11. (a) Anga i kinwa ma mito cuko cwiny? (b) Nyut kong kit ma cuko cwiny romo konyo kwede ngat mo ma ‘obalo.’

¹⁰ Wan ducu wamito cuko cwiny kadi bed cwinywa otur nyo pe. “Laelda mo acel ocoyo ni: “Pe tye nino mo acel ma babana owacci atimo gin mo maber. I kare ma atye ka dongo, onongo atamo ni konya pe. Kadi bed ni kombeddi dong atye ki mwaka 50, cwinya yom ni lurema gicuko cwinya ni atye ka tiyo tic maber macalo laelda. Jami mutimme i koma opwonya kit ma pire tek kwede me cuko cwiny jo mukene, dok man aye gin ma atimo.” Lok me cuko cwiny konyo dano ducu, man kwako painia, jo muteggi, ki dong jo mogo ma cwinygi otur.​—Rom. 12:10.

¹¹ Ka ‘jo ma gitye ki cwiny pa Lubanga gikonyo dano ma otimo bal,’ tira ma gimiyo i yo me mar ki dong lok me cuko cwiny twero konyo labalo-ni me cako timo jami mabeco. (Gal. 6:1) Man aye gin mutimme i kom laminwa mo acel ma nyinge Miriam. En ocoyo ni: “Awinyo mading adada i kare ma lurema macok guweko kacokke woko, ki dok i kare ma remo ocwer i adam wi babana. Cwinya otur ma pe larre. Me lweny ki tur cwinya-ni, acako wot woko ki awobi mo ma pe obedo Lacaden pa Jehovah.” Man oweko en owinyo ni pe epore pi mar pa Jehovah, ci oweko en otamo ni myero ewek lok me ada woko. I kare ma laelda mo opoyo wiye i kom kit ma en obedo ka tic kwede pi Jehovah i kare mukato angec, man ocuko cwinye adada. En ojolo lok pa luelda i kare ma guwacce ni Jehovah pud marre. Macalo adwogine, en ocako maro Jehovah. En ogiko watte ki jo ma pe gubedo luye ci omedde ki tic pi Jehovah.

12. Ngo ma romo timme ka ce wacuko cwiny ngat moni kun walane, wakok i kome, nyo waweko cwinye pide?

¹² Lano ngati moni kun iporo en ki jo mukene, nyo kok i kome ni en pe tye ka tiyo tic muromo wek cwinye opide twero miyo en medo ticce malo, ento pi kare manok keken. Ki tungcel bene, cuko cwiny luye luwotwa ki dok kwaye ni omedde ki maro Lubanga kelo adwogi maber pi naka.​—Kwan Jo Pilipi 2:1-4.

“WACUKU CWINYWA KEKENWA”

13. Cuko cwiny jo mukene kwako timo gin ango? (Nen cal ma tye i pot karatac 18.)

¹³ Mitte ni myero ‘wacuku cwinywa kekenwa, makatone kit macalo waneno nino maca dong tye ka nyiko cok-ki.’ Cuko cwiny jo mukene kwako tugo cwinygi me medde ki tic pi Lubanga. Tugo cwinywa kekenwa i mar ki i tiyo tic mabeco kiromo porone ki buko mac macok to wek omedde ki lyel, cuko cwiny jo mukene bene kitwero porone ki medo yen nyo makar i mac wek omedde ki lyel matek. Cuko cwiny jo mukene bene kwako jingo ki kweyo cwiny ngat ma cwinye otur. Ka wanongo kare me cuko cwiny ngat ma kit meno, omyero walok kwede i yo me mar dok mupore. (Car. 12:18) Medo i kom meno, omyero ‘wawiny lok oyotoyot’ dok ‘pe omyero warune me gamone.’ (Yak. 1:19) Ka wawinyo lok ki cwiny me kica, ci wabiniang gin ma oturo cwiny Lakricitayo lawotwa dok man weko wawaco gin ma twero konye me lweny kwede.

14. Kikonyo omego mo ma cwinye otur nining?

¹⁴ Nen kong kit ma laelda mo ma tye ki cwiny me kica okonyo kwede omego mo ma ticce me pwony okwe woko pi mwaki mapol. I kare ma laelda-ni otero ite ka winyo lokke, en oniang ni omego-ni kara pud tye ki mar matut pi Jehovah. En obedo ka kwano Wi Lubele ducu dok onongo tute me bino i cokke kare ki kare. Ento gin ma jo mogo i kacokke gubedo ka timone ocwero cwinye dok owango iye adada. Laelda-ni owinyo lokke ki cwiny me kica labongo ngolo kop dok onyuto ni eparo pi omego-ni kacel ki jo me ode. Motmot, omego-ni oniang ni etye ka weko jami maraco mutimme i kare mukato angec tye ka genge me tic pi Lubanga ma emaro-ni. Laelda-ni olwongo omego-ni me cito kwede i ticwa me pwony. Ki kony pa laelda-ni, omego-ni ocako tic ki mit kom i ticwa me pwony, ka lacen kicime me tic macalo laelda dok aye.

15. Pwony ango ma wanongo ki bot Jehovah ka odok i lok me cuko cwiny jo ma cwinygi otur?

¹⁵ Ngat ma cwinye otur pe romo winyo maber cutcut nyo jolo kony ma wamiye oyotoyot. Omyero wamedde kikonye. Paulo owacci: “Wukony jo ma goro, wudi cwinywu bene i kom dano ducu.” (1 Tec. 5:14) Ma ka kwero oyotoyot konyo jo magoro, omyero ‘wakonyugi’ dok wamedde ki teno korgi. I kare mukato angec, Jehovah odiyo cwinye i kom luticce mogo ma i kine mukene onongo cwinygi otur. Me lapore, Lubanga odiyo cwinye i kom Elia, kun tamo pi kit ma en winyo kwede ki i cwinye. Jehovah omiyo jami ducu ma mitte bot lanebine wek en omedde ki tic pire. (1 Luker 19:1-18) Pien Daudi ongut ki cwinye ducu, Jehovah otimme kica pi balle. (Jab. 51:7, 17) Lubanga bene okonyo laco Jabuli 73, ma onongo mito kwero tic Pire woko-ni. (Jab. 73:13, 16, 17) Jehovah diyo cwinye dok timiwa kica, tutwalle ka cwinywa otur. (Nia 34:6) Kicane “giroc gidoko nyen rupiny ki rupiny” ki dok “bene pe bigik.” (Koko 3:22, 23) Jehovah mito ni walub lanenne kun watero jo ma cwinygi otur i yo me kica.

WACUKU CWINYWA KEKENWA ME MEDDE KI WOT I YO MA TERO DANO I KWO

16, 17. Ka agikki me lobo-ni woto ki nyiko cok, omyero wamoku tamwa me timo gin ango, ki dok pingo?

¹⁶ Lumabuc alip mapol guto ki i kom 33,000 ma gua ki i gang buc me Sachsenhausen. Ento, Lucaden pa Jehovah gin 230 ma onongo kitweyogi i gang buc meno-ni pe guto kadi wa acel. Lok me cuko cwiny kacel ki kony ma gunongo i kingi kekengi oweko wot meno me cito i to-ni olokke odoko wot me cito i kwo.

¹⁷ I kare-ni, wan watye i ‘yo ma tero dano i kwo.’ (Mat. 7:14) Cokcok-ki, jo ducu ma giworo Jehovah gibiwot lumuku i lobo manyen ka ma kit ma atir bibedo iye. (2 Pet. 3:13) Wamoku tamwa me konyo luwotwa i yo man ma terowa i kwo ma pe tum-mi.