Tam I Kom Kodi Dano Ango Ma Myero Ibedi

1, 2. ‘Omyero wabedu jo ma nining’ wek wanong cwak pa Lubanga?

POL pa dano gitye ki miti me ngeyo gin ma jo mukene gitamo i komgi. Ento, wan macalo Lukricitayo, kit ma Jehovah tamo kwede i komwa pire tek adada. En tye Ngat ma pire tek loyo ducu i polo ki lobo ki dok en aye “wang it me kwo ducu.”​—Jab. 36:9.

² Kun loko i kom ‘kodi dano ango ma myero wabed’ i wang Jehovah, lakwena Petero ocuko cwinywa me bedo ki “kwo maleng ki me woro Lubanga.” (Kwan 2 Petero 3:11.) Wek wanong cwak pa Lubanga, omyero wabed ki “kwo” maleng i kitwa, tamwa, ki dong i yo me cwiny. Medo i kom meno, omyero wati tic me “woro Lubanga” kun wabedo ki lworo i kome ki dok wanyuto ni wagene. Yenyo cwak pa Lubanga pe kwako kwowa keken ento kwako bene kitwa ma pe nen kiwoko. Pien Jehovah ‘ngiyo cwiny dano,’ en ngeyo ka ce kwowa tye maleng dok wawore ki cwinywa ducu nyo pe.​—1 Tekwaro 29:17.

3. Ma lubbe ki watwa ki Lubanga, lapeny mene ma myero watam i komgi?

³ Catan Larac-ci pe mito ni wanong cwak pa Lubanga. Ki lok ada, en timo jami ducu ma en twero wek wabal watwa ki Jehovah. Catan tiyo ki goba kacel ki bwola me bitowa wek wawek woro Lubanga. (Jon 8:44; 2 Kor. 11:13-15) Pi meno, omyero wapenye kekenwa ni: ‘Catan mono bwolo dano nining? Gin ango ma aromo timone me gwoko watta ki Jehovah?’

CATAN MONO BWOLO DANO NINING?

4. I tutene me balo watwa ki Lubanga, miti pa Catan tye me timo gin ango, ki dok pingo?

⁴ Lapwonnye Yakobo ocoyo ni, “Dano acel acel gire mitine kene aye ma bite, ywaye, kun omo cwinye. Miti ka oyac ci nywalo bal. Bal ka dong odongo muteggi nywalo to.” (Yak. 1:14, 15) I tutene me balo watwa ki Lubanga, Catan mitine tye me balo ka ma mitiwa cakke ki iye, ma en aye cwinywa.

5, 6. (a) Jami ango ma Catan tiyo kwede me bwolowa? (b) Diro macalo mene ma Catan tiyo kwede i tutene me pito miti marac i cwinywa, dok en obedo ka tic ki diro magi pi kare ma romo mene?

⁵ Gin ango ma Catan tiyo kwede me balo cwinywa? Baibul waco ni, “Lobo ducu tye i te loc pa Larac.” (1 Jon 5:19) Jami lweny pa Catan kwako “gin ma tye i lobo.” (Kwan 1 Jon 2:15, 16.) Pi mwaki alip mapol, Larac-ci obedo ka tic ki jami murumowa macalo owic. Kit macalo wakwo i lobo-ni, omyero wagwokke ki i kom diro pa Catan.​—Jon 17:15.

⁶ Catan tiyo ki diro mogo me pito miti maraco i cwinywa. Lakwena Jon onyuto jami adek ma Catan tiyo kwedgi me bitowa: (1) “miti me komwa,” (2) “miti marac pi gin ma waneno ki wangwa,” ki dok (3) “wakke ki jami ma watye kwede i kwowa.” Catan otiyo ki diro magi bene me bwolo Yecu i tim. Pien Catan obedo ka tic ki owic magi pi mwaki mapol, en i kare-ni tiyo kwedgi maber adada, ma lubbe ki miti ma ngat moni tye kwede i cwinye. Ma peya waneno kit ma waromo gwokke kwede, kong wanenu kit ma Catan otiyo kwede ki diro mo acel me bito Kawa ento ongayo wange woko i kare ma otemo tic kwede i kom Wod pa Lubanga.

“MITI ME KOMWA”

7. Catan otiyo nining ki “miti me komwa” me bwolo Kawa?

⁷ Dano ducu gimito ginacama wek gikwo. Lacwecwa oyubo lobo wek ocek cam mabup. Catan twero temme me bitowa me turo cik pa Lubanga kun tiyo ki miti ma kinywalowa kwede me cam. Nen kong kit ma en otimo meno kwede i kom Kawa. (Kwan Acakki 3:1-6.) Catan owacci Kawa romo camo nyig “yat me ngeyo gin maber ki marac” labongo to, kun wacci inino ma en ocamo litap ci en bidoko calo Lubanga. (Acak. 2:9) Larac-ci onongo tye ka wacci kadi bed Kawa pe owinyo dog Lubanga, en pud bimedde ki kwo. Man twon goba mo ma tere otuc adada! I kare ma Kawa owinyo tam man litap, en onongo twero yero i kin jami aryo: Me kwero tam man lajwac, nyo me lwodone kun dongo miti me camo nyig yat meno. Kadi bed ni Kawa onongo romo camo nyig yadi mukene ma gitye poto-ni, en oyero me lwodo lok i kom gin ma Catan owacce ma lubbe ki yat ma tye i dye poto-ni, ci en “opwono nyige, ocamo.” Pi meno, Catan opito miti i cwiny Kawa pi gin ma Lacwecce ogenge pe me camone.

8. Catan otemo bito Yecu nining kun tiyo ki “miti me komwa,” dok pingo man pe otiyo?

⁸ Catan otiyo ki diro acel-lu bene i kare ma otemo bito Yecu i tim. I kare ma Yecu orii kec pi dyeceng 40 ki dyewor 40, Catan otemo bito Yecu kun tiyo ki mitine me cam. Catan owaco ni, “Ka in i Wod pa Lubanga, wac ki got man olokke odok kwon.” (Luka 4:1-3) Yecu onongo tye ki jami aryo ma myero oyer: En onongo romo yero me tic ki kerone me timo tango me cobo mitine me cam, nyo onongo bene romo kwero timone. Yecu onongo ngeyoni pe myero eti ki kero meno i yo marac. Kadi bed ni kec onongo tye ka neke, cobo mitine me kec pe obedo gin ma pire tek kato watte ki Jehovah. Yecu odokke iye ni: “Yam gicoyo ni, “‘Dano pe bibedo kwo ki kwon keken, ento bedo kwo ki lok ducu ma a ki i dog Lubanga.’”​—Luka 4:4.

“MITI MARAC PI GIN MA WANENO KI WANGWA”

9. Lok man ni “miti marac pi gin ma waneno ki wangwa[-ni]” nyuto gin ango, dok Catan otiyo kwede me bwolo Kawa nining?

⁹ Jon bene owacci “miti marac pi gin ma waneno ki wangwa” bitowa. Lok man nyuto ni ngat moni twero cako bedo ki miti i kom gin moni ka ce oneno. Ma lubbe ki gin mutimme i kom Kawa-ni, Catan otiyo ki miti pa Kawa kun wacci: “Wangwu biyabbe woko.” Pien Kawa obedo ka neno nyig yat ma gigenge ni pe ocam-mi, man opito i cwinye miti me camone. Ki bot Kawa, nyig yat-ti onongo “nen ma mwonya” adada.

10. I yo ango ma Catan otemo kwede ki Yecu kun tiyo ki “miti marac pi gin ma waneno ki wangwa,” dok en odok iye nining?

¹⁰ Ento Catan otemo tic ki miti man me bwolo Yecu nining? Catan “onyutte [Yecu] ker ducu ma i wi lobo i kine me kare matidi mo, owacce ni: ‘Abimiyi twer man ducu ki deyo man ducu.’” (Luka 4:5, 6) Yecu onongo pe romo neno ker me lobo-ni ducu ki wange i kare matidi mo, ento Catan nen calo otamo ni deyo me ker magi ducu kit ma en onyuto kwede i ginanyuta-ni, romo ywayo tam pa Yecu. Labongo lewic mo, Catan owacce ni, “Ka iwora, ci jami magi ducu bibedo meri.” (Luka 4:7) Yecu onongo pe mito bedo ngat ma Catan mito ni ebedi. Yecu ogamo dog Catan cutcut. En owacci: “Yam gicoyo ni, ‘Wor Rwot Lubangani, dok bene iti pire keken.’”​—Luka 4:8.

“WAKKE KI JAMI MA WATYE KWEDE I KWOWA”

11. Catan obwolo Kawa nining?

¹¹ I kin jami ma gitye i loboni, Jon oloko i kom ‘awaka me jami ma watye kwede i kwowa.’ I kare ma Adam gin ki Kawa keken aye onongo pud gitye i lobo, gin onongo pe giromo ‘wakke ki jami ma gitye kwede i kwogi’ bot jo mukene. Ento gin gunyuto cwiny me awaka. I kare ma tye ka bwolo Kawa, Catan owacci Lubanga tye ka kano gin mo maber adada ki bot Kawa. Larac-ci owacci inino ma en bicamo iye nyig “yat me ngeyo gin maber ki marac[-ci],” ci en ‘bidoko calo Lubanga, miyo en ngeyo gin maber ki gin marac.’ (Acak. 2:17; 3:5) Pi meno, Catan omiyo tam ni Kawa pe bibedo ite loc pa Jehovah. Awaka aye oweko en oye bwola man. En ocamo nyig yat ma kigengo ni pe ocam-mi, ki tam ni pe ebito matwal. Kawa pud dong obwole kekene ya!

12. I yo mene ma Catan otemo bito kwede Yecu, ento en odok iye nining?

¹² Yecu pud dong oweko lanen maber adada me mwolo ka iporo ki Kawa! Catan otute me temo Yecu i yo mukene, ento en pe obedo ki cwiny me timo gin mo me aura me temo Lubanga. Meno onongo binyuto cwiny me awaka! Ma ka meno, Yecu owaco atir ni: “Yam giwaco ni, ‘Pe item i Rwot Lubangani.’”​—Kwan Luka 4:9-12.

WAROMO GWOKO WATWA KI JEHOVAH NINING?

13, 14. Tit kong kit ma Catan tiyo kwede ki jami mogo me bwolowa i kare-ni.

¹³ I kare-ni, Catan tiyo ki bita ma en otiyo kwede i kom Kawa gin ki Yecu-ni. Pien mito ni wacob “miti me komwa,” Larac-ci tiyo ki lobo-ni me ilo malo tim tarwang kacel ki mato kongo ki dong camo cam wa i labyel kweri. Kun tiyo ki jami ma tugo miti me buto, tutwalle ki i Intanet, Larac-ci twero bito jo ma ming ma pe giryek wek gucob ‘mitigi marac pi gin ma gineno ki wanggi.’ Jami me kom, bedo ki twero, ki yweka romo bedo atematema bot jo ma giwakke kadiwa bot jo ma gimito ‘wakke ki jami ma gitye kwede i kwogi.’

¹⁴ “Gin ma tye i lobo” kiromo porone ki labit rec. Ginen ma mit me acama, ento nongo kirwako i wi goli. Catan tiyo ki jami ma dano gineno ni mitte pi kwogi me nino ducu dok man weko gituro cik pa Lubanga. Atematema magi kiyubogi me tugo miti marac i cwinywa. Owic magi gitye me bwolowa wek waye ni yenyo jami ma wamito kacel ki bedo ki kwo maber pire tek loyo timo miti pa Lubanga. Tika waromo moko i owic magi?

15. Waromo lubo lanen pa Yecu nining wek wacung matek ka Catan tye ka temowa?

¹⁵ Kadi bed Kawa omoko i atematema pa Catan, ento Yecu pe omoko iye. I atematema ducu, Yecu otiyo ki Ginacoya, kun wacci: “Yam gicoyo ni” nyo, “Yam giwaco ni.” Ka wakwano Baibul ki cwinywa ducu, ci wabibedo ki ngec me Ginacoya dok wiwa bipo i kom tyeng mogo ma bikonyowa me tam i yo matir ka watye i atematema. (Jab. 1:1, 2) Ka wiwa po i kom lanen pa jo mogo ma gubedo lugen bot Lubanga, ma kicoyo lok komgi i Baibul, ci man bikonyowa me lubo lanengi. (Rom. 15:4) Gin ma bigwokowa aye ka watye ki lworo matir i kom Jehovah dok bene wamaro gin ma en maro kun wadag gin ma en dagi.​—Jab. 97:10.

16, 17. Adwogi ango ma “teko me niang” ma watye kwede gudowa?

¹⁶ Lakwena Paulo ocuko cwinywa ni wati ki “teko me niang” ma watye kwede wek walub tam pa Lubanga ento pe tam me lobo-ni. (Rom. 12:1, 2, NW) Kun loko i kom kit ma pire tek kwede me gengo jami ma watamo i komgi, Paulo ocoyo ni: “Waturo kwede tam ma pe atir, ki kit wakke ducu ma tinge me pyem, ma gengo dano miyo pe gingeyo Lubanga, kun wamako tam acel acel macalo opii, waketo i te loc pa Kricito.” (2 Kor. 10:5) Tamwa nyuto kodi dano ango ma wabedo, pi meno mitte ni ‘waket tamwa’ i kom jami ma dongowa.​—Pil. 4:8.

¹⁷ Pe watwero bedo jo maleng matwal ka ce wajolo tam kacel ki miti maraco. Omyero wamar Jehovah ma nongo ‘cwinywa leng.’ (1 Tem. 1:5) Ento cwinywa aye bwolowa, dok pe watwero ngeyo kit ma “gin ma tye i lobo” tye ka gudowa kwede. (Jer. 17:9) Pi meno omyero ‘wangine kekenwa, wek wanen ka ce wacung matek i niyewa, dok watemme kekenwa’ ki cwiny me ada kun watiyo ki gin wakwano ki i Baibul.​—2 Kor. 13:5.

18, 19. Pingo omyero wamoku tam me bedo kodi dano ma Jehovah mito ni wabedi?

¹⁸ Gin mukene ma romo konyowa me lweny ki “gin ma tye i lobo[-ni]” aye ka watamo i kom lok man ma Jon ocoyo-ni: “Lobo tum woko ki mitine ducu; ento ngat ma tiyo gin ma Lubanga mito ri nakanaka.” (1 Jon 2:17) Lobo pa Catan-ni cal ki gin ma birii nakanaka. Ento nino mo acel kibijwerone woko. Jami ma tye i lobo pa Catan-ni pe birii. Ka wiwa po i kom lok man, ci bikonyowa wek Larac-ci pe obitwa.

¹⁹ Lakwena Petero ocuko cwinywa ni myero wanong cwak pa Lubanga ka nongo ‘wakuro nino pa Lubanga, dok waketo cwinywa iye wek ninone oo oyotoyot. I nino meno polo bilyel, leny woko, ki lakalatwe bene bileny woko i mac.’ (2 Pet. 3:12) Cokcok-ki, nino meno bibino, ci Jehovah bijwero lobo pa Catan-ni ki pete tere ducu. Nio wa i nino meno, Catan bimedde ki tic ki “gin ma tye i lobo[-ni]” me bitowa, kit ma en otimo kwede i kom Kawa ki Yecu-ni. Omyero pe wabed calo Kawa kun wacobo mitiwa. Ka wacobo mitiwa, ci man nongo te lokke ni Catan tye lubangawa. Omyero wabed calo Yecu kun wacung matek i bita ma kit meno kadi bed ginne ber adada. Pi meno, wan ducu ki acel acel omyero wamoku tamwa me bedo kodi dano ma Jehovah mito ni wabedi.