Lubanga Ciko Wange Me Neni

GIN MUMIYO JO MOGO GITYE KI AKALAKALA: Ma lubbe ki kwed mo ma kitimo, kinongo ni yogo ma watye iye-ni tye ki jami mogo calo lobo makato bilion 100 kulu. Kit macalo polo dit tutwal-li, dano mapol giwaco ni ‘Lacwecwa ma en aye won twer ducu-ni pe neno gin ma dano gitimo i lobo kany.’

GIN MA LOK PA LUBANGA PWONYO: Lubanga pe ominiwa Baibul keken, ci dong owekowa niyak. Ma ka meno, Jehovah ocikke botwa ni “Abimiyi ryeko dok abineni.”​—Jabuli 32:8.

Nen gin ma otimme i kom Agar, Laejipt ma okwo i cencwari me 20 K.M.P. Agar onongo pe woro laditte Carai, man oweko Carai ocako timme aromaroma ci en ongweco i dye tim. Kit macalo Agar otimo bal-li, tika Lubanga bene oweko paro pire woko? Baibul wacci: “Lamalaika pa Rwot [Jehovah] ononge.” Lamalaika meno ocuko cwiny Agar kun wacce ni: “Rwot [Jehovah] obedo ka neno aromani.” I ngeye, Agar owaco bot Jehovah ni: “In Lubanga ma neno.”​—Acakki 16:4-13.

“Lubanga ma neno[-ni]” bene neni. Me labolle: Mego ma lamar pol kare ciko wange me neno lutinone kun paro pigi kit macalo latin matidi pud nongo mito kony pa lunyodone tutwal. I yo acel-li bene, Lubanga ciko wange me neno jo ma cwinygi otur ki ma gigoro. Jehovah owaco ni: “An abedo i kabedo maleng ma otinge malo, dok bene abedo kacel ki ngat mamwol, ma cwinye cwer, dok ma ngut, pi miyo kwo manyen bot jo ma cwinygi cwer dok ma gingut.”​—Icaya 57:15.

Kadi bed kumeno, itwero penye keken ni: ‘Lubanga nena nining? Tika en ngolo kop i koma ma lubbe ki kit ma anen kwede nyo tika en nena i yo matut wek eniang kit me kwona?’