Ker pa Lubanga Ocako Loc Awene?—BUTE ME 2

LOK WIYE WIYE I KOM LEK PA NEBUKADNEJAR

Peter: Apwoyo neni doki, Jon. Amaro kwano Baibul kacel kwedi cabit ducu.a Itye nining?

Jon: Atye maber, apwoyo dwogo.

Peter: Cwinya yom ni itye maber. Nino ca ma abino, wanyamo tyen lok muweko Lucaden pa Jehovah giwaco ni Ker pa Lubanga ocako loc i mwaka 1914.b Kit ma wanyamo kwede, wanongo gin ma pire tek ma moko lok meno i buk pa Daniel cura 4. Tika wi pud po lok ma kicoyo i cura meno?

Jon: Meno obedo lek pa Kabaka Nebukadnejar i kom yat mo ma odongo madit adada.

Peter: Meno lok ada. Nebukadnejar oneno twon yat mo ma odongo mabor wa i polo. Ci owinyo ka ngat mo ma Lubanga ooro waco ni kitong yat meno kiret woko piny, ento kiwek ajutte ki lwite gudong i ngom. I nge mwaka abiro yat meno onongo dok bidongo madit.c Wanyamo bene pingo lok meno onongo bicobbe wang aryo. Wi tika po kare ma lok meno ocobbe iye pi tyen mukwongo?

Jon: Meno aye gin mutimme i kom Nebukadnejar, pe kumeno? En odoko lapoya pi mwaka abiro.

Peter: Meno lok ada. Nebukadnejar odoko lapoya pi kare mo, pi meno, locce bene ogik pi kare mo manok. Ento ma pire tek loyo, lok meno onongo bene bicobbe i kare ma loc pa Lubanga kong bigik pi mwaka abiro. Kit ma waneno kwede mwaka abiro-ni ocakke i kare ma kituro Jerucalem i mwaka 607 K.M.P. Nicakke i kare meno, kabaka mo keken onongo dong pe ma bicung pi Lubanga Jehovah me loyo jone. Ento i nge mwaka abiro, Lubanga onongo bicimo Laloc manyen ma biloyo jone—ngat mo ki i polo. I yo macek, i agikki me mwaka abiro meno Ker pa Lubanga onongo bicako loc ki i polo. Dong waneno awene ma mwaka abiro-ni ocakke iye. Ka waniang kare ma mwaka abiro-ni onongo bitero, ci wabiniang awene ma Ker pa Lubanga ocako loc iye. Tika dong iniang jami ma abedo ka lok iye-ni?

Jon: Aniang, dong iweko aniang maber jami ma waneno con.

Peter: Meno ber adada. Dong wacak ki neno kare ma mwaka abiro-ni otero. Pud atyeko kwano gin ma wabinyamo-ni atyeka me poyo wiya i kom lok ma pigi tego. Abitute me titone maber i yo ma itwero niang iye.

Jon: Aya.

KA MWAKA ABIRO OTUM CI KARE ME AGIKKI BICAKKE

Peter: I kare ma lok man ocobbe i kom Nebukadnejar, mwaka abiro-ni otero bene mwaka abiro kikome. Ento i kare ma lok meno onongo bicobbe i kom Ker pa Lubanga, mwaka abiro-ni onongo birii makato.

Jon: Pingo iwaco kumeno?

Peter: Me acel, wi opo ni kicako kwano mwaka abiro-ni i kare ma kituro iye Jerucalem i mwaka 607 K.M.P. Ka wacako kwanone ki i mwaka 607 K.M.P, ci mwaka abiro keken onongo bigik i 600 K.M.P. Ento pe tye gin mo ma pire tek ma otimme i mwaka meno ma kwako loc pa Lubanga. Medo i kom meno, kit ma wanyamo kwede con, ma Yecu obino i lobo mwaki miya mapol i nge tur pa Jerucalem, en onyuto ni mwaka abiro-ni onongo pud peya otum.

Jon: Ada. Wiya dong opo iye kombeddi.

Peter: Dong, me ka tero mwaki abiro keken, mwaka abiro-ni onongo bitero kare malac maloyo.

Jon: Birii pi kare ma rom mene?

Peter: Buk me Niyabo, ma pol lok ma iye bene tye i buk pa Daniel, konyowa me niang kare ma mwaka abiro man otero kikome. Niyabo onyuto ni mwaka adek ki nucu rom ki nino 1,260.d Man nyuto ni mwaka abiro ma dodo mwaka adek ki nucu kiryo-ni nongo rom ki nino 2,520. Tika pud itye ka niang?

Jon: Ee, abedo ka lubo loki. Ento pud pe aneno gin ma nyuto ni Ker pa Lubanga ocako loc 1914.

Peter: Aya, dong wanen kit ma lokke kubbe kwede. I kine mukene, ka odok i lok pa lunebi me Baibul, nino acel cung pi mwaka acel.e Ka watiyo ki cik meno ni nino acel rom ki mwaka acel, nongo mwaka abiro-ni rom ki mwaki 2,520. Ka wacako kwanone ki 607 K.M.P., ci mwaki 2,520 terowa i mwaka 1914.f Meno aye kit ma wamoko kwede ni mwaka abiro-ni otum i 1914, dok en aye acakki me loc pa Yecu macalo Kabaka me Ker pa Lubanga. Dok jami mogo ma Baibul otito ni bitimme i kare me agikki ocako timme i mwaka 1914.

Jon: Jami ango?

Peter: Nen kong lok ma Yecu owaco i Matayo 24:7. Madok i kom kare ma en bicako kwede loc i polo, Yecu owaco ni: “Rok bilweny ki rok wadi, ki ker bene bilweny ki ker wadi, ki kec bene bipoto i lobo, ki oyengyeng biyengo lobo i kabedo mapol.” I neno, kany Yecu owaco ni kec bipoto i lobo ki oyengyeng bitimme i kare meno. Jami magi omedde adada pi mwaki mogo mukato angec nio wa kombeddi, pe kumeno?

Jon: Kumeno.

Peter: I tyeng man, Yecu bene owaco ni lweny bibedo marac adada ka ecako loc macalo Kabaka me Ker pa Lubanga. Dok buk me Niyabo bene owaco ni man pe lweny matino tino ma bedo i lobo acel keken, ento ni obedo lweny ma biromo lobo ducu i kare me agikki.g Tika wi po mwaka ma lweny me acel me wi lobo ocakke iye?

Jon: Meno obedo i mwaka 1914, en mwaka ma itye ka wacone ni Yecu ocako loc iye-ni! Onongo dok pe angeyo ni lokke kubbe kumeno.

Peter: Dong ka wakubo kin lok magi ducu—lok pa lunebi i kom mwaka abiro-ni kacel ki lok pa lunebi mukene ma tye i Baibul madok i kom kare me agikki—ci dong kelo wiwa i niang. Lucaden pa Jehovah pe gitye ki akalakala mo ni Yecu ocako loc macalo Kabaka me Ker pa Lubanga i 1914 dok ni kare me agikki bene ocakke i mwaka meno.h

Jon: Pud atye ka temo niang lok man ducu.

Peter: Meno niange gire. Kit ma awaco kwede con, otera bene kare me niang lok man maber. Ento ageno ni nyamo lokwa olo okonyi me niang ni kadi bed pe kicoyo mwaka 1914 i Baibul, ento pwony pa Lucaden pa Jehovah ma kwako mwaka meno jenge i kom Baibul.

Jon: Ada, meno aye gin ma yomo cwinya i kom Lucaden pa Jehovah—ni gin mo keken ma wuloko iye nongo jenge i kom Baibul. Nongo pe obedo mere tam ma tye i wiwu. Ento pud atye ki ur pingo lok man niang iye tek. Dok pingo Lubanga pe owacciwa ka maleng i Baibul ni mwaka 1914 aye mwaka ma Yecu bicako locce i polo?

Peter: Meno lapeny maber adada, Jon. Ki lok ada, tye jami mapol ma pe kitito ka maleng i Ginacoya. Dong pingo Lubanga oweko kicoyo Baibul i yo ma mitte ni dano gutute ki tek ka wek guniang lok ma iye? Watwero nyamo lok meno ka adwogo.

Jon: Cwinya bibedo yom adada.