Tika Iloko ki Lubanga?

Kadi bed wuloko wang ki wang, wukubbe ki cim, e-mail, nyo coyo waraga, lurem ma gimarre giloko i kingi ka ce kare ononge. Pi meno, wek wabed cok ki Lubanga, mitte ni myero wakubbe kwede kare ki kare. Ento, watwero timo man nining?

Watwero lok ki Lubanga ka ce walego bote. Lega bot Lubanga pe obedo calo boko lok ma waboko ki lawotwa mo. Myero wange ni meno ka watye ka lega, ci nongo watye ka lok ki Lacwecwa, ma Ngat ma Mamalo Tutwal-li. Man myero omi waleg bote ki twon woro kacel ki mwolo madit adada. Wek Lubanga ogam legawa, mitte ni omyero watim jami mogo. I kine tye jami adek magi.

Me acel, omyero waleg atir bot Lubanga Jehovah​—pe bot Yecu, “lacaden remo” nyo cal mo keken. (Nia 20:4, 5) Baibul waco ka maleng ni: ‘I lok ducu wumi Lubanga onge gin ma wumito i lega ki i bako dogwu kacel ki miyo pwoc bene.’ (Jo Pilipi 4:6) Me aryo, myero waleg kun wawok ki i nying Wod pa Lubanga, Yecu Kricito. Yecu kikome owaco ni: ‘Pe tye ngat mo ma bino bot Won, kono ki i an keken.’ (Jon 14:6) Me adek, legawa myero orwatte ki miti pa Lubanga. Baibul waco ni: ‘Ka walegge gin mo kun walubo gin ma en mito, ci en winyo legawa.’a​—1 Jon 5:14.

Ki lok ada, wat macok ma i kin jo aryo pe moko matek ka ngat acel aye bedo ka lok ki lawote. Kit macalo lirem aryo ginongo mit pa kubbe i kingi-ni, wan bene myero waye ni Lubanga olok kwedwa ki dok myero wawiny lokke. Tika ingeyo yo ma Lubanga tiyo kwede me lok kwedwa?

I kareni, Jehovah loko kwedwa kun tiyo ki Baibul. (2 Temceo 3:16, 17) Pingo wawaco kumeno? Me lapore: Ket kong ni inongo waraga ki bot laremi mo macok kwedi adada. Ka itye ka kwanone, bedo calo iwacci en tye ka lok kwedi kadi bed ni en pe i cawa meno! I yo acel-li, ka itye ka kwano Baibul bedo calo iwacci Jehovah tye ka lok kwedi. Pi meno, Gina ma waloko i kome i pwony me acakki-ni, owaco ni: “Atamo ni ka amito ni Lubanga otera macalo an lareme, omyero akwan Baibul, ‘waraga’ ma en ocoyo botwa.” En omedo ni, “Kwano Baibul nino ducu oweko anyikke cok bot Lubanga.” Tika iye ni Jehovah olok kwedi kun ikwano Baibul nino ducu? Timo meno bikonyi me nyikke cok ki Lubanga.