Alubo “Kit Ducu ma Dano Gitye Kwede”

MITINA me ngeyo lok ada me Baibul onongo dong kitugo wacon. Mamana onongo buke ma jenge i kom Baibul, ci abedo ka kwanone ki cwinya ducu, kun aketo tamma tutwalle i kom lapor ma tye iye. Babana onongo pe mito ni mamana otitta jami ma en tye ka pwonyone. Ento onongo amito niang dok abedo ka penyo lapeny mapol, pi meno, en obedo ka kwan kweda ka babana onongo peke gang. Macalo adwogine, amoko tamma me dyero kwona bot Jehovah. Anongo batija i Blackpool, England, i 1943 ma onongo atye ki mwaka apar keken.

ACAKO TIC PI JEHOVAH

Cakke i kare meno, wabedo ka cito i tic me pwony kacel ki mamana. Onongo watiyo ki gramofon me cako lok i kom Baibul. Gramofon magi onongo gipek dok gitye ki kilo ma romo 4 ki nucu kulu. Go kong, awobi matidi ka yelle ki tingo acel i kine!

Ma atye ki mwaka 14, onongo amito tic calo painia. Mamana owacci myero kong apeny brethren (kit ma onongo kilwongo kwede laneno me adwol). Ci en omiya tam ni onongo myero kong anong diro mo ma konya me tic calo painia. Dok meno aye gin ma atimo. I nge tic pi mwaka aryo apenyo laneno me adwol mukene pi tic calo painia. En owacca ni, “Cak woko cutcut!”

Pi meno, i April 1949, an ki mamana wacato jami ma watye kwede i ot ma onongo watye ka pangone, ci wakobo i taun me Middleton, macok ki Manchester, ci wacako tic macalo painia. I nge dwe angwen, ayero omego mo me bedo painia lawota i tic me pwony. Jang gang kal ocuko cwinywa me kobo i kacokke mo manyen ma tye i Irlam. Mamana obedo ka tic calo painia kacel ki lamego mo ma onongo tye i kacokke mukene.

Kadi bed onongo atye ki mwaka 17 keken, kiminiwa tic me doro cokke pien omege ma gupore onongo ginok i kacokke manyen-ni. Lacen kilwonga me kobo i Kacokke me Buxton, ma onongo tye ki lutit kwena manok dok onongo gimito kony. Kare ducu abedo ka neno jami magi ma gutimme-ni calo pwonye pi mot me tic ma bibino i anyim.

I 1951, apongo fom me cito i Cukul me Gilead. Ento, i Decemba 1952, kilwonga me donyo i mony. Apenyo ni kiye wek pe adony i mony kun awaccigi ni atye latit kwena ma tiyo pi kare malac, ento kot onongo pe twero ye meno ci kitweya i buc pi dwe abicel. I kare ma atye kunnu, anongo waraga pi lwongo me cito i cukul me Gilead me 22. Pi meno, i Julai 1953, aito yeya ma kilwongo ni Georgic, me cito i New York.

I kare ma ao kunnu, acito bene i Gure me New World Society me 1953. I ngeye, atiyo ki gar me cito South Lansing, New York, ka ma cukul-li onongo tye iye. Onongo atye ki cente manok pien onongo pud akato akata ki i mabuc. I kare ma alor ki i gar, onongo myero ati ki bac me cito South Lansing, dong me culo pi bac, alego cente ma romo ciling 25 ki bot lawot mo ki i bac.

TIC I LOBO MUKENE

Cukul me Gilead omiyo pwony mamwonya me konyowa me ‘lubo kit ducu ma dano gitye kwede’ i ticwa macalo lumiconari. (1 Kor. 9:22) Wan adek​—Paul Bruun, Raymond Leach, ki dong an​—kicwalowa me tic i lobo Philippines. Onongo mitte ni wakur pi dwe mapol me nongo waraga ma ye ki wan me donyo; i nge meno onongo wabimedde ki wot ki yeya kun wawok ki i Rotterdam, i Nam me Mediterranean, nam me Suez Canal, Indian Ocean, Malaysia, ki dong Hong Kong​—nino 47 kulu i dye nam! I agikkine wao Manila i Novemba 19, 1954.

I ngeye wacako ngi ki dano, lobo, ki leb manyen. Ento, wiati wan adek ducu onongo kicwalowa i kacokke mo i Quezon City ka ma pol pa jo ma kibedo iye giloko leb munu. Pi meno, i nge dwe abicel, onongo pud wangeyo nyig lok manok adada i leb Tagalog. Tic ma kimiyowa i ngeye onongo bicobo peko meno.

I nino mo acel i Mai 1955 i nge dwogo gang ki i ticwa me pwony, wan ki Omego Leach wanongo waraga mogo ma kiketo i ot butowa. Waniang ni kitye ka miniwa tic manyen macalo luneno me adwol. Onongo atye ki mwaka 22 keken, ento tic man omiya kare me ‘lubo kit ducu ma dano gitye kwede’ i yo mapol.

Me labolle, amiyo pwonya mukwongo calo laneno me adwol i nyim dukan mo ma onongo tye ka maleng. I nge kare manok aniang ni obedo kit ma timme bot jo me Philippines i kare meno ni pwony i dye lwak bedo woko ka maleng i nyim lwak! I kare ma atye ka limo kacokke me adwolwa, amiyo pwony i ka namo pa lwak, i cuk, i nyim opic pa gamente, ka tuko odilo, i pak, ki dong i kare mogo i teng gudi. I kare mo ma atye i boma me San Pablo, kot ocwer matek adada ci ogenga ki miyo pwonya i cuk, pi meno, amiyo tam bot luelda ni kimi pwony meno ki i Ot me Ker. I ngeye, luelda-ni gupenya ka ce gitwero lwongo cokke ma kit meno ni cokke pa lwak ka gitye ka coyo ripotgi, kit macalo pe otimme woko i dye lwak mapol!

Kare ducu onongo wabuto i gangi pa utmego. Kadi bed ni rwom me kwogi tye lapiny, onongo gigwoko odigi bedo maleng cawa ducu. Pol kare kabutona onongo mukeka ma kipeto i dye ot me bao. Kalwok onongo pe tye ka mukanne, pi meno apwonyo kit me lwok woko i yo ma pe kelo lewic. Onongo atiyo ki mutoka mo ma kilwongo ni jeepney ki bene i kare mogo ki bac, ki dong atiyo ki yeya ka atye ka cito i cula nam mukene. Pi kare me ticca ducu pi Lubanga, pe abedo ki mutoka ma mega.

Nywako i tic me pwony ki limo kacokke okonya me pwonyo leb Tagalog. Pe acito i cukul mo me pwonyo leb man, ento apwonyo ki bot omege ka watye i tic me pwony ki dong i cokke. Omege onongo gimito konya wek apwony, dok abedo ki pwoc pi diyo cwinygi ki tam ma gumiya.

Ka kare woto ki kato, tic manyen mukene omiyo atimo alokaloka mogo dok i kwona. I 1956, i kare ma Omego Nathan Knorr olimowa, kimiya tic me kubo kin lwak i gure madit. Onongo apeke ki ngec mo, ento jo mukene gukonya. Ma peya oo mwaka acel, kiketo gure madit mukene dok Omego Frederick Franz ma oa ki i jang gang kal madit olimowa. I kare ma atye ka tic calo laneno me gure madit, anongo pwony ki bot Omego Franz i kit me loko kwona wek orwatte ki pa jo mukene. Cwiny utmege obedo yom adada i kare ma guneno Omego Franz oruko bongo barong Tagalog, ruk me tekwaro pa jo Filipino, i kare ma tye ka miyo pwony ma kiyubo pi lwak.

Onongo mitte ni aket alokaloka mukene i kare ma kicima me bedo laneno me distrik. I kare meno, wabedo ka nyuto cinema me The Happiness of the New World Society, cokcok nino ducu. I kine mogo, jami matuk ata onongo gimaro yelowa. Onongo gilubo dero mac ma kati ki i projector dok gimoko woko i kome. Dunyo projector i ngeye onongo obedo twon tic adada! Keto yub me neno cinema magi onongo pe yot, ento onongo abedo ki yomcwiny ka aneno adwogi maber ma dano ginongo i nge niang kit ma dul pa Jehovah tye kwede i lobe mukene.

Lutela dini pa Katoli guketo dic i kom ludito pa gamente me te dero ni pe omyero guminiwa twero me bedo ki gure. Nyo gitemo gengo dano ki winyo yubwa ki goyo olang me Kanica malongo ka watye ka miyo pwony cok ki kanicagi. Ento, kadi bed ni meno obedo ka timme, tito kwena pud omedde anyim, dok jo mapol i kabedo magi dong gitye luwor Jehovah i kare-ni.

TIC MOGO MA ONONGO MITO NI DOK ATIM ALOKALOKA MUKENE

I 1959, anongo waraga ma waco ni kicima me tic i jang gang kal. Man onongo mito ni apwony jami mapol. I nge kare mo, kipenya ni acak limo lobe mukene. I kare ma atye i lim acel, arwatte ki lamiconari mo i Thailand ma nyinge Janet Dumond. Wabedo ka kubbe ki waraga pi kare mo ci lacen wanyomme. Dong wanongo yomcwiny ki yengo i tic pi Jehovah kacel macalo luot pi mwaki 51.

Ka kiribo, dong abedo ki kare me limo jo pa Jehovah i lobe ma romo 33 kulu. Atye ki pwoc madit atika ni tic ma atimo con okonya me bedo ma ayubbe me tic ki dano ma gia ki ka mapatpat! Lim magi oyabo wanga i kom jami mapol, dok okonya me neno kit ma mar pa Jehovah gudo kwede dano me rok ducu.​—Tic 10:34, 35.

PUD ATYE KA MEDDE KI TIMO ALOKALOKA

Pud dong abedo ki yomcwiny madit ya, me tic kacel ki utmege ma gitye i Philippines! Wel lutit kwena ma dong tye i kare-ni dodo wel ma i kare ca ma acako tic kunnu tyen apar kulu. An kacel ki Janet watye ka medde ki tic i jang gang kal me Philippines ma tye i Boma me Quezon. Kadi wa i nge tic pi mwaki makato 60 i lobe mukene, pud mitte ni abed atera me keto alokaloka ma lubbe ki gin ma Jehovah mito. Alokaloka ma gutimme i dul pa Jehovah cokcok-ki, mito ni wabed atera me timo tic mo keken pi Jehovah kacel ki pi utmege.

Watute me timo gin mo keken ma waniang ni obedo miti pa Jehovah, dok man obedo yo maber loyo me nongo yengo i kwo. Watemme bene me keto alokaloka ma mitte me tic pi utmegiwa maber. Adada, watye atera me ‘lubo kit ducu ma dano gitye kwede’ teke obedo miti pa Jehovah.