“Obedo Mic ma Pire Tek Loyo ma Pud Dong Anongo”

Meno aye kit ma anyaka mo me mwaka 13 owinyo kwede i kare ma kimine latin gwok macalo mic. Lacat wil mo ma oywek owaco ni, kompiuta mo ma wonne ominne i kare ma pud etye i gang kwan aye obedo mic ma oloko kwone. Laco mo ma pud onyomme nyen owaco ni, kad mo ma dakone oyubo ki cinge me po pi nino nyomgi i nge mwaka acel aye obedo mic mo ma pud dong ber loyo ma enongo.

Mwaka ki mwaka, dano mapol gitero kare ki kerogi me yenyo mic “maber loyo” pi luremgi nyo wadigi pi nino ma pigi tego. Jo mapol cwinygi bedo yom ka guwinyo pwoc macalo meno ma waloko i komgi malo-ni. In kono? Tika imito ni in bene ibed ki kare me miyo nyo gamo mic ma weko ibedo ki pwoc?

Kodi cwiny meno twero miniwa yomcwiny adada, pe pi alokaloka ma mic meno twero kelo i kwo pa ngat ma kimine ento bene pi kit ma lami mic meno winyo kwede. Baibul waco ni: “Miyo mot kelo gum [yomcwiny] makato gamo agama.” (Tic pa Lukwena 20:35) Ki lok ada, yomcwiny ma bino macalo adwogi me miyo mic medde ma lubbe ki kit ma lagam mic meno tero kwede mic ma kimine.

Pi meno dong, itwero weko mic ma ibimiyo bedo me yomcwiny bot ngat ma ibimiyo bote ki in macalo lami mic nining? Ket kong ni pe itwero miyo mic “maber loyo” kono, ngo ma ibitimo wek kipwo mic ma ibimiyo-ni?