3 Pwonyi ki Kit me Ciro Peko

TWO MA PE CANG

Rose owaco ni: “Atye ki two mo ma anongo ki bot lunyodona ma weko abedo i arem malit kare ducu. Kerona odok piny adada.” Par madit ma en onongo tye kwede aye ni i kine mukene nongo en pe twero kadi wa keto cwinye i kwano Baibul ki timo jami mukene me cwiny. Ento lok pa Yecu ma kicoyo i Matayo 19:26 okonye adada: “Ki bot Lubanga jami ducu twere.” Rose oniang ni tye yo mukene ma etwero kwano kwede ki Baibul. Pien arem ma en winyo i kine mukene onongo weko pe twerre bote me kwano Baibul akwana, en ocako winyo Baibul kacel ki bukewa ma kimako i dwan keken.a En owaco ni: “Kono onongo yo meno obed pe, pe angeyo kit ma onongo atwero gwoko kwede watte ki Jehovah.”

Ka cwiny Rose tye ka cwer pien pe dong twero timo jami ma onongo yam en timo, ci nongo kwecwiny ki i lok ma kicoyo i 2 Jo Korint 8:12: “Lubanga gamo mot ma dano tye kwede, tekke en obedo ki miti me miyone, ma pe paro gin ma pe etye kwede.” Lok meno poyo wi Rose ni cwiny Jehovah yom i kom jami ma en timo, pien ni etute matek me timo jami ducu ma kerone twero.

KUMO

Delphine, lamego ma waloko i kome i pwony mukato-ni wiye po ni: “I kare ma nyara ma mwakane 18 oto, abedo ki arem malit adada ma onongo pe angeyo ka atwero medde ki kwo. Kwona onongo dong pe bibedo kit macon.” En onongo kwecwiny madit ki i lok ma kicoyo i Jabuli 94:19, ka ma laco jabuli owaco bot Jehovah ni: ‘Ka aparo pi jami mapol, in ikweyo cwinya ki kicani.’ Delphine owaco ni: “Alego bot Jehovah wek okonya me nongo gin atima ma twero kweyo cwinya ki i arem ma atye kwede.”

Delphine olungo wiye i konyo jo mukene. I nge kare mo, en ocako pore kekene ki lawe cal pa latin​—kadi wa ma gutur ma ginen calo pigi pe tek, pud kitwero tic kwede me wero cal maleng. I yo acel-li, kadi bed ni en neno calo pire pe tek, ento en oniang ni pud etwero konyo jo mukene. En owaco ni: “Acako niang cutcut ni ka atiyo ki Cik kacel ki tam me Baibul me cuko cwiny lutino kwanna me Baibul, ci Jehovah bene nongo tye ka kweyo cwinya.” En ocoyo piny nying jo mogo ma kiloko i komgi i Baibul ma guwok ki i arem malit. “Labongo akalakala” en onongo ni “jo magi ducu onongo gimaro lega kare ducu.” En oniang ni “pe tye yo mo ma kitwero gamo ki legawa ka pe wakwano Baibul.”

Kwano Baibul opwonyo Delphine ki gin mukene​—me keto cwinye i kom jami ma anyim ento pe i kom jami mukato angec. Gen ma kiloko pire i Tic pa Lukwena 24:15 cuko cwinye adada: “Dano gibicer woko, jo ma kitgi atir wa jo ma kitgi pe atir.” En onyuto nining ni epe ki akalakala ni Jehovah bicero nyare? En owaco ni: “Agoyo cal pa nyara i anyim. Nino ma wabirwatte iye dong kimoko woko, bedo calo Wora me polo dong omoko nino meno woko i kalendane. Agoyo calwa maber adada ma watye kacel i potowa mo mamwonya kit ma anene kwede i nino ma anywale iye.”