Ngo Ma Lubanga Bitimone?

Ka itye ka wok ki i kwo matek, ngene kene ni ibibedo ki gen ni laremi mo macok twero timo gin mo me konyi. Pi meno, jo mukene giwaco ni Lubanga pe obedo laremgi pien ni Lubanga pe tye ka timo gin mo me konyogi. Ki lok ada, Lubanga dong otimo jami mapol ata me konyowa dok en bene bicobo pekki ki can ducu ma watye iye i kare-ni. Ngo ma Lubanga bitimone i anyim?

EN BIGIKO TIM MARACO DUCU

Lubanga bigiko tim maraco ducu kun kwanyo ngat ma tye ka kelone woko. Baibul onyutiwa ngat ma kelo peko ducu i kare ma owaco ni: “Lobo ducu tye i te loc pa Larac.” (1 Jon 5:19) “Larac” meno obedo ngat ma Yecu olwongo ni “lalo lobo man,” ma en aye Catan. (Jon 12:31) Dano tye ka kato ki i pekki ki can mapol i kare-ni pien Catan aye tye ka doro lobo. Ngo ma Lubanga bitimone?

Macok cok-ki, Lubanga bitic ki Wode Yecu Kricito, me ‘nginyo ngat ma tye ki twero i kom to, ma en aye Catan.’ (Jo Ibru 2:14; 1 Jon 3:8) Ki lok ada, Baibul wacciwa ni Catan kikome bene “ngeyo ni karene tye manok!” (Niyabo 12:12) Lubanga bene bijwayo lutim maraco ducu.—Jabuli 37:9; Carolok 2:22.

EN BILOKO LOBO DOKO PARADIC

I nge jwayo tim maraco woko ki i lobo, Lacwecwa bicako tic me cobo yubbe wek dano gubed kwo pi naka labongo roc mo i paradic i lobo kany. Gin ango ma myero wakur?

Kuc marii pi naka ki piny ma okwe mot. “Wek kit ma atir omedde ameda i kare me locce, dok kuc bene obed i lobone nakanaka nio wa i kare ma dwe dong bibedo pe!”—Jabuli 72:7

Cam mabeco dok muromo. “Cam bene myero ocek mabup i lobone, opong wa wi godi-gu woko ducu.”—Jabuli 72:16.

Odi mabeco kacel ki tic ma yomo cwiny. “Dano gibigero odi ci gibedo i igi, gibipuro poto olokgi, ci gibicamo nyige bene. . . . Jona ma an aye ayerogi gibibilo tic me cinggi pi kare malac.”—Icaya 65:21, 22.

Tika itye ki miti me neno kwo ma kit meno? Cok cok-ki jami magi bidoko kwo me nino ducu pi dano weng.

EN BIKWANYO TWO KI TO WOKO

I kare-ni dano ducu two makogi dok gito, ento pe bibedo kit meno pi naka. Ma pe otero kare malac, Lubanga biweko dano ginongo adwogi maber ki i ginkok pa Yecu “wek dano ducu ma ye en owek to, ento obed ki kwo ma pe tum.” (Jon 3:16) Adwogine bibedo ngo?

Kibijwayo two woko. “Pe tye dano mo ma bedo i lobowa ma biwaco ni, ‘An koma lit.’ Jo ma bedo iye ducu gibitimo botgi kica pi balgi.”—Icaya 33:24.   

To dong bibedo pe. “Rwot Lubanga dong bimwonyo to woko matwal, dok en bidunyo pig wang dano woko ducu.”—Icaya 25:8.

Dano gibikwo pi naka. “Mot ma Lubanga miyowa nono, en aye kwo ma pe tum i Yecu Kricito Rwotwa.”—Jo Roma 6:23.

Jo ma guto gibidwokogi cen me kwo odoco. “Dano gibicer woko, jo ma kitgi atir wa ki jo ma kitgi pe atir.” (Tic pa Lukwena 24:15) Gin bene gibinongo adwogi maber ki i mic pa Lubanga me ginkok.

Ngo ma Lubanga bitic kwede me cobo jami magi ducu?

EN BIKETO GAMENTE MA PUD DONG BER LOYO

Lubanga bicobo yubbe pi dano ki lobo-ni kun tiyo ki gamente ma tye i polo, ma Yecu Kricito aye Lalocce. (Jabuli 110:1, 2) Man aye obedo gamente nyo ker ma Yecu opwonyo lulub kore ni guleg pire i kare ma en owacci “Wonwa ma tye i polo, . . . Ker meri obin.”—Matayo 6:9, 10.

Ker pa Lubanga biloyo lobo kun kwanyo pekki ki arem ducu ma dano tye ka kato ki iye. Ker man aye pud dong gamente maber loyo ma dano twero bedo i te locce! Meno aye oweko Yecu otiyo matek me tito “kwena maber me Ker pa Lubanga” i kare ma en tye i ticce me pwony i lobo kany dok ociko lukwenane ni gutim kit meno bene.—Matayo 4:23; 24:14.

Pi mar madit ma en tye kwede pi dano, Lubanga Jehovah ocikke me timo jami mamwonya magi ducu pigi. Tika man pe miyo ibedo ki miti me ngeyo en ki nyikke cok bote? Ka iyero me timo meno, adwogi maber ango ma ibinongo? Pwony ma lubo man bititone.